由 Rita 於 2016-09-03 00:00:00 發表 | 累積瀏覽 490
只考慮到係有限嘅時間運用手上有嘅資源去到美瑛嘅重要景點，當我知道有兩條bus tour路線，就決定二話不說上、下晝各去一個，上晝去完「展望之路」，下晝就去埋「拼布之路」了，其實有每個tour有咩睇都有少少矇查查～
再次由美瑛駅出發﹗
anyway，我哋係遊客中心換埋片之後又登上呢架巴士了，發覺tour嘅遊客比上晝少好多﹗點解呢？去完就明白了～曉雖然冇再發燒，但不停流綠鼻涕，我哋同佢抹佢又唔鍾意，個人唔舒服心情又麻麻地，今個tour好記得嘅就係佢比較扭計，落車還好，一上番車又唔鍾意～
出發﹗
幾個落車嘅景點之中，原來有兩個係睇樹﹗冇錯，係有故事嘅明星樹～一棵係「Ken & Mary之樹」，係汽車廣告入面嘅背景，男、女主角就係Ken同Mary了，因為廣告深入民心，美瑛風景令人讚嘆，所以棵樹就出咗名啦～另一棵係「七星之樹」，因為係香煙廣告嘅樹，我哋都對佢冇乜好感～
Ken & Mary之樹
七星之樹
之後仲有一個落車嘅地方，單張入面介紹係「北西之丘」，原來係一個觀景台，上到去可以飽覽美瑛嘅風景，呢度都唔錯～
觀景台+嗲到爆炸嘅小朋友
當然要360度環迴影晒幾邊嘅景色啦～
曉嘅表情全部都好唔願意咁，都係唔理佢了，哈哈～
就咁影風景先發現其實我哋兩個個頭都阻實晒～
美瑛風景特色在於好多山丘～
呢度有規劃過形狀嘅田地之中，我哋相信其中被修剪到光禿禿嘅，應該係過咗盛開時期嘅薰衣草，大家合埋眼再想像下，如果綠色嘅草地同紫色嘅薰衣草相間住，應該好靚～大概就係「北西之丘」嘅焦點所在﹗
對於我哋嚟講，「北西之丘」更重要嘅係，day係呢度嘅商店買咗條粟米，呢條粟米係今日接住落嚟嘅行程起到非常重要嘅作用丫﹗
一啲車上遊覽嘅景點我哋當然因為唔識日文而全部都miss晒啦～咁樣，下晝嘅「拼布之路」就結束了﹗吓？﹗行完拿？係呀～難怪呢個tour參加嘅人少咁多啦，大家咁醒目嘅？不過我又唔覺得好徙時間或者徙錢嘅，一場嚟到，睇多啲地方都好丫～
距離下一個活動Norokko慢車號開車仲有一段時間，我哋決定係美瑛站附近隨便逛逛消磨下時間～我諗對於曉嚟講，呢段時間應該仲開心，最重要係有得食雪糕﹗
自由跑步步﹗
悠閒時光with爸爸
薰衣草咁靚嘅？其實⋯可以呃到下人﹗哈～
只係咁細嘅花槽﹗﹗>v< 總算係北海道嘅薰衣草啦～
曉：最重要當然係食雪糕啦～
好啦好啦，去搭Norokko慢車號啦﹗呢架車其實行駛嘅路軌，都係我哋來往富良野美瑛呢段路唔同分段好幾次嘅同一條路軌，不過佢嘅特色係冇冷氣全天然生風，超大窗口可以好好享受富良野一帶嘅風景～
大家都超熱切期待要同列車影相，未免行得太出吧，要注意安全丫～
因為係純觀光列車，車上有小賣部又有紀念品，仲有每人一張乘車紀念咭～
我本身好想坐到打横對正窗口嗰啲位㗎，不過之前已經事先編好晒座位，我哋坐嘅係⋯同三個日本後生仔打對面嘅卡座﹗唔，我應該慶幸嘅係，人哋冇歧視我哋有搞搞震嘅bb啦～
其實成段路最靚都係美瑛開車嘅頭嗰段路了，山丘、綠蔭處處，花就唔多見嘅～沿途有廣播介紹附近嘅景點，我記得應該係有日文以外嘅語言廣播的，因為我哋聽得明㗎，不過係只有英文定係有埋中文我就唔記得了～
越駛近富良野時就田地比較多～
開車一段時間曉開始躁動不安時，粟米登場﹗﹗
即刻開心晒又安靜晒～我除咗要忙少少幫佢執番掉落嘅粟米粒之外，呢個車程總算輕鬆少少～本來一向覺得日本嘅鐵路遊係好輕鬆嘅，快捷、舒適、交通網絡覆蓋廣，但原來曉唔太喜歡搭鐵路囉，每次有長程嘅火車要搭我都超攰，出去玩又唔可以帶太多玩具同書，零食又唔可以不停食，結果只會同佢唱歌唱到聲沙～希望大個少少會好啲啦～講起嗰條粟米，有入就有出，而且呢啲咁纖維豐富嘅食物就⋯更有效﹗車程過咗大半，我哋好驚嘅事發生咗－－疴屎屎﹗其他JR北海道長途少少嘅列車洗手間入面都有換片台，我哋都抱住一絲希望睇下呢㗎遊覽列車有冇，點知係令人失望嘅結果～冇辦法啦，希望其他遊客聞唔到啲味啦快啲到站啦，快啲到站啦～曉曉唔好咁大動作丫﹗
太好啦，開始見到多啲建築物，應該差唔多返到富良野了～落車第一件事，即刻衝去換片丫﹗﹗
JR北海道觀光產品網站(內容隨季節變更)：
http://www2.jrhokkaido.co.jp/global/chinese/travel/index.html
前往其他日本旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 253334
全部攻略 705
全部回應 10
