探險家攻略 > 2-9-2016：北海道三人行day 6(part 2)．旭山動物園(下)之小小動物園

2-9-2016：北海道三人行day 6(part 2)．旭山動物園(下)之小小動物園

由 Rita 於 2016-09-02 00:00:00 發表 | 累積瀏覽 374

分類：

食完午飯之後，其實我都估到曉曉差唔多要再瞓多一覺了～

影下動物園嘅招牌先～

曉瞓覺之後就變成(假)二人世界咁去逛動物園啦～我一心諗住等佢瞓醒先去睇兒童牧場，所以我哋盡量先去睇其他嘢～

我想睇嘅長頸鹿啱啱抱恙同唔到大家見面，我諗睇嘅其他動物之中，我印象最深刻嘅應該係河馬了，河馬有兩隻，一男一女，女仔嗰隻個名我記得好嬌俏的，係「咩子」嗰啲⋯呀，我search番旭山動物園個官網，原來係旭子呀﹗旭子呢個名同佢龐大嘅身軀非常唔搭調﹗雖然我哋覺得河馬好笨重，但佢哋屋企有個好大嘅水池，原來旭子游水時體態都好輕盈又優美呢～好可愛丫﹗

旭子優美嘅泳姿～

之後又睇咗鴕鳥，佢哋同山雞(？)一齊住呢，唔知係咪好朋友？

旭山動物園嘅鴕鳥對我嚟講印象唔深刻，不過一見到鴕鳥，就會諗起當年仲讀緊中學時跟媽咪佢哋學校去韶關，參觀鴕鳥園，我有騎鴕鳥，而大家同鴕鳥影完相又話佢哋好cute之後，竟然係食鴕鳥宴，我真係接受唔到，直至今日我都唔食鴕鳥肉呢～

似乎旭山動物園都鍾意將啲和諧共處嘅動物放埋一齊呢，呢度係呢種豬同埋馬騮一齊住～

豬豬曉都未醒，我哋唯有唔等佢，先去一趟兒童牧場啦～講起兒童牧場，我就諗起之前去埼玉縣嘅寶登山小動物公園(請參閱：17-5-2010：東京埼玉trip day 3(part 2)．長瀞宝登山．阿佐美天然刨冰)，全部都係溫馴可愛嘅小動物﹗今次真係大開眼界，我會估到有羊咩咩，我會估到有兔仔，但我估唔到居然會有鴨，有狗，仲要連倉鼠都有﹗﹗

有個飼養員好似好悠閒咁同隻金毛尋回犬梳毛，我就話，有份工，有得同心愛嘅狗仔玩，又有錢賺，真係好好﹗﹗day就現實地話我知，應該唔係淨係同狗仔玩，可能輪住去其他房舍執屎屎～咁多小動物之中，我最記得啲鴨真係好嘈，叫到鬼咁大聲，好搞笑～

又有綿羊，又有山羊～似乎啲羊咩咩好鍾意行去啲驚險嘅位置呢，專登起咗啲木橋俾佢哋係上面行～

鴨鴨好可愛呀～

瞇埋眼瞓晏覺嘅悠閒鴨鴨～

可以摸摸佢哋㗎～

仲有各種可愛嘅小動物～

我瞓醒啦﹗

啱啱瞓醒，要引下佢落地熱身﹗如果可以同小動物玩就好了～

曉曉都係好緊張呀，佢平時鍾意睇書入面嘅鴨鴨、毛公仔嘅鴨鴨，居然佢咁怕真嘅鴨鴨﹗

曉曉比較接受到羊咩咩同埋狗仔～不過都係遠遠咁望咋～

此情不再了﹗曉細個時會兩隻手各豎起一隻手指扮兔兔，打blog嘅呢一刻佢已經22m，只會用口講兔兔，唔再扮啦～

最後我哋去埋早前人山人海嘅北極熊館，今日嘅旭山動物園就參觀得差唔多了～

最後要去血拼買紀念品丫﹗靚嘅嘢好多，我都唔知點揀，最好買咗一家三口嘅親子tee，係有猩猩趴係我哋背脊上面㗎～我又買咗一條手巾仔，因為上面嘅斑斑(我愛嘅斑海豹)吸引咗我﹗仲有一個斑斑folder，我就用嚟返韓文班時用啦～好開心～

好在日本巴士可以食嘢，由旭山動物園出去旭川站都要搭大半個鐘車㗎，全靠提子乾，令車程變得美好～>v<

有見於我哋嚟到旭川時睇到個站好大好靚，站外嘅商場又大又新，我哋一心諗住出番嚟旭川火車站附近行街食晚飯，夜啲先返富良野～

我哋先去旁邊嘅Aeon Mall行，雖然屯門都有Aeon，但真係唔係同一個級別囉﹗幾層嘅Aeon Mall之中，我哋只行咗地面嗰層嘅糕點禮品，同地下一層嘅supermarket咋～好在一入去見到有商場內用嘅bb車可以免費借用，曉曉又肯坐喎，我哋可以輕鬆少少～啲禮盒糕餅真係好靚，本身諗住行完街返轉頭先買，我哋先去supermarket，點知後來趕住走就冇買到了～supermarket超－－級－－大－－﹗可以係度買餸真係超開心，之前係富良野逛嘅小型local超市覺得啲嘢好平好抵買已經好amazing，估唔到係呢間豪華超市，啲東西都係好平好抵買丫﹗全部都係因為香港人太愛日本產品，嚟到香港抬高晒嗰價囉～但我哋逛逛下超級市場發覺曉曉開始有啲唔對路，哎吔，佢發燒病病豬呀﹗原本有考慮食超市嘅豪華熱食，又有諗住搵間餐廳坐低食晚飯，通通都打消晒念頭了，我哋都係快啲返去富良野嘅酒店，起碼有藥食，又可以俾佢早啲休息啦，因為miss咗早啲呢班火車，下一班就要九點幾十點先返到去了～

打blog時間隔得太耐(曉由16m -> 22m，有足足半年)，中間又去多個trip，啲detail真係唔記得咗，我問番我隔離嗰個，佢竟然連曉曉病咗都唔記得，要我講多幾個片段佢先記起⋯我記得，返到酒店之後曉曉喊得好勁(係咪因為醒咗又未瞓夠？？唔記得咗了～)，要逛啜奶奶先冷靜落嚟，仲要一離口就狂喊，唯有左右左右不停啜到我變人乾，我哋嘅晚飯都係唔太樂觀，所以由day出去買嘢番嚟食啦～我繼續變人乾+哄曉瞓嘅時候，day買咗福壽司嘅外賣番嚟食，打blog今日講起，佢先話原來佢當時諗：「兩母女都係專去旅行時病～」佢講嘅係我哋幾年前去韓國嗰個trip(請參閱：14-4-2012：首爾濟州櫻花遊day 7．笨蛋的奇遇)，我又係病到留係酒店混混沌沌，佢又係出去搵食﹗

唔記得點解我俾曉occupy住，day要先食完飯，之後先輪到我，我記得我係黑麻麻嘅環境食個豚肉飯同埋鰻魚飯，仲係要有啲鬼鬼崇崇咁食，好似day有揹住佢出去行一圈暗佢瞓，係咪俾機會我沖涼定係點？結果又係眼光光咁返嚟房～anyway，總之呢一晚榨乾晒我哋啲energy啦～原本定好day 7會參加巴士tour去美瑛，我哋決定，如果曉仲有發燒我哋就留係富良野唔去美瑛lu，直接返札幌～今晚大家先早啲休息，再睇下點啦～

旭山動物園官方網站：

http://www.city.asahikawa.hokkaido.jp/asahiyamazoo/index.html

前往其他日本旅遊blog