i kitchen：東i西撞闖廈尋味

自從啲餐廳進駐入廠廈，就多咗嚟觀塘區食飯，漸漸去工廠區搵食都變得一啲都唔陌生，而且，工廠區內真喺卧虎藏龍。差唔多半年前同朋友食完飯，話遲啲再約過賀聖誕，講講吓農曆年都過埋，卒之都約得成事，造就今晚嘅飯聚。


雖然廠廈內嘅餐廳，一向俾人嘅感覺都好大好闊落，但入到嚟i Kitchen，有種廠廈「小店」嘅感覺，因為地方無想像中咁大，一室以黑色為主格調，襯白色餐枱，配點藍色霓虹光，帶點玄幻，感覺又有啲似間酒吧。由於全店配備真皮梳化椅，其實，都幾好坐。





雖然整體環境較昏暗，但裝置咗唔少聚焦燈，枱上又有小燭臺嚟營造氣氛，所以，不失情調。

晌等候友人期間，細閱一下餐牌，分門別類為前菜、小食、湯品、意粉 / 意大利飯、主菜、甜品及飲品。其實亦有晚市套餐供應，4道菜，包括前菜、餐湯、主菜、甜品及餐飲，定價於$188-$346，視乎所選嘅主菜。不過，惠顧主餐牌中嘅意粉、意大利飯、主菜，都可以加$48變成套餐，即喺有埋前菜、餐湯、甜品及餐飲，非常划算。







香脆魷魚圈 $68 本來都無諗過點小食，不過，店長推介依一味魷魚圈，話好多熟客試過都會再食，亮點喺佢哋會用新鮮魷魚做，果然，啲魷魚入口喺鮮甜柔軟好多，加上脆漿唔太厚，又香脆。就連伴碟嘅沙律都無「求先」，既落咗濃香嘅意大利黑醋調味，又刨幾片巴馬臣芝士做靚個賣相，好食，抵食！





紫薯蓉湯（廚師餐湯） $28 平常食親西餐，都會有個感覺喺啲是日嘅廚師餐湯都喺啲平淡見慣見熟嘅款式，但多口一問今晚個「例湯」喺乜，估唔到喺紫薯蓉湯，無錯，喺湯嚟，唔喺甜品，一身艶紫高貴嘅外表，呷一口，紫薯味極之突出，加上幼滑嘅口感，有份清甜潤和嘅感覺，好有驚喜嘅廚師餐湯。



鮮蝦木瓜蓉湯 $32 友人問究竟喺中湯定喺西湯？其實喺西湯，但木瓜做嘅西湯真喺未試過，所以，好奇之下又點嚟試。外觀唔講仲以為喺南瓜湯，小弟黐一口試試，口感同樣幼滑，木瓜味好濃郁，但味道偏甜有少少似食緊糖水。



白酒牛油煮美國馬拉蜆 $118 店長晌遞餐牌俾我哋時，都有略作介紹，佢話不時有新鮮貨返，今日其中一樣就喺依款美國馬拉蜆，小弟都喺第一次接觸，故然有啲好奇，點一客試試質素喺點？一客都有好多隻，堆到成個小山咁，以香草醬抹一抹做個裝飾，份外清新。馬拉蜆本身都幾大隻，蜆肉夠晒肥大肉厚，入口帶點牛油及洋蔥香，咬落柔軟，鹹鮮嘅感覺充滿海洋味道，隨之滲出淡淡白酒香，確喺令人回味。





香草蝦汁鮑魚意大利飯 $168 識我嘅人都知我鍾情意大利飯，晌小弟嘅食評中亦不時見有意大利飯登場，因為一般意大利粉都有個建議時間煮幾耐，連我見已晌屋企煮都好少失手，但意大利飯就未必人人煮得好，一喺煮過籠無咬口，一喺煮得唔夠火喉太生。眼前嘅「香草蝦汁鮑魚意大利飯」以兩個大蚌殼裝住啲飯，4隻鮑魚絕無欺場，單喺賣相已夠晒剎食。飯粒入口充滿鮮蝦味，口感濕潤，且帶煙韌感，煮得非常好食；鮑魚亦炆得軟腍，但不失咬口，鮑味十足，個飯認真超讚。





低溫慢煮美國牛仔肋骨 $200 肉類亦喺好喜愛嘅食材，早前晌上環嘅Upper Modern Bistro試過一道牛仔肋肉（去骨全肉慢煮）超好食，今晚再遇上，自然勾起之前美味嘅回憶不少。不過，i Kitchen嘅做法喺原條連骨燒，跟住再切片連骨擺好放晌石板上，配以甚有藝術美嘅伴菜，睇落賞心悅目。牛仔肋肉非常軟腍，又夠肉味，邊位帶焦香，沾少少燒汁，真喺一流享受。





自家製焦糖蘋果批伴雲呢嗱雪糕 $68 本來都好飽，無打算嗌甜品，但喺有心水嘅蘋果批，又怎能錯過，點一客共享過過口癮都好。批殼以酥皮做，甘香酥脆，內裡賣滿蘋果果，果肉清鮮軟綿，味道滲有少少焦糖香，如果俾多少少玉桂就更啱我心水。伴以雲呢嗱雪糕，一熱一凍，食得夠爽。





鮮奶咖啡 $26 唔好怪我老套，真喺餐後，再加上合口味嘅甜品，真喺唔可以唔襯番杯鮮奶咖啡，咖啡睇外貌覺得喺機沖，幸而咖啡保持到嗰份醇香。

臨走時晌門口拎咗張單張睇睇，午餐就幫襯唔到嘞，原來星期六有做早午餐（11:00am-3:00pm），個全日早餐仲可以揀多少款配料，非常有彈性喎，有機會都想走嚟試試！



服務上無疑好貼心，不時添水，換碟，而且，上菜嘅碟，就連咖啡杯隻碟，都喺熱過嚟，感受到服務上啲細節都好用心。環境幾舒服，價位亦唔貴，讓大家有稱心滿意嘅一餐！
個人評分
味道：8/10
環境：8/10
服務：8/10
抵食：8/10
平均每人消費：HK$250
餐廳資料：i kitchen
觀塘巧明街106號冠力工業大廈201室
2711 9777

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================