嵯峨野 Sagano：櫻紅本色

兩次揀三月份去日本，都與櫻花無緣，今次專登揀南部嘅九州，仲要喺南九州嘅宮崎同鹿兒島，喺日本較早開櫻花嘅地區，雖然就出發，但睇近期嘅「花見」情報，已知又喺與櫻花無緣，我哋三月中尾返嚟，佢就三月尾先開始開花，滿花就晌四月初。其實，舊年有留意過千禧新世界香港酒店內嘅嵯峨野晌三、四月會推出「櫻花特色午餐」，風評不俗，雖然錯過咗，但見今年又再推出。正所謂輸人唔輸陣，輸運（氣）唔輸心（態），運氣嘅嘢無得控制，但心態可以自主，我哋一樣未出發先興奮，小弟就專登嚟到一試呢個櫻花特色午餐，再培養多啲旅行情緒。


入口位垂下嘅深藍色布簾，唔會直接望到入店內情況，令私隱度提升；而入到餐廳內，充滿和風嘅環境好闊落，枱椅安排亦保持距離，每組枱椅更架設半身木屏風作間隔，既唔會變得侷促，又減少騷擾度，讓人感到更自在舒適。你知啦，有時我等相機先食嘅人，影相動作會誇張少少，不過溫馨提示吓大家，遇到環境較幽暗嘅餐廳，真喺需要打燈嘅話，盡量留意吓光源集中番啲菜式上，避免騷擾到隔離枱，因為有次去間扒房食晚飯，見過有幾個女生，可能影得太興奮，打燈打到好似拍戲咁，搞到隔離枱嘅客人都要搵手遮面，好彩嗰枱客氣量大，否則一口角就搞到唔好氣氛。





我哋被安排四人位，前後都有木屏風，自成一角，加上嚟光顧嘅客人都喺以斯文客居多，感覺更顯祥和寧靜；旁邊偌大嘅玻璃窗，雖然外邊有啲高架天橋擋擋海景景觀，但勝在開揚，採光十足，如果是日有啲暖和嘅陽光仲正。女侍應全都穿上和服，禮貌周周，動作輕柔，送上熱茶同毛巾，枱上嘅餐巾綉上青綠色店名嘅中英文字，望上清新醒目。



言歸正傳，講番個「花見御膳」- 「花見」櫻花特色午餐（$350 + 10%），講得主題喺櫻花，就梗喺季節限定，只晌3月及4月午市供應，星期一至日都有。當然，仍有其他定食、鐵板燒定食供選擇。此外， 晚市另提供「櫻花懷石套餐」（$1,250），估計食材質素更上一層樓。



午餐未上，先有野菜沙律及酸香嘅漬物開開胃口，前者喺以椰菜絲、車厘茄、海帶、珊瑚海藻及一啲鹹魚仔組成，再按自己喜好淋上柚子醋，入口清新鮮爽；後者漬物大概喺一啲白蘿蔔絲、甘筍絲煮成，灑上芝麻，食落輕怡。

日本菜向來賣相精緻，所以，份櫻花特色午餐亦絕不例外，擺放得以藝術品般。整個午餐可以睇為分開兩組，一組喺以竹籃盛載嘅雜錦季節拼盤，而另一組則如常見嘅定食咁有刺身、雜錦天婦羅、三文魚籽飯及麵豉湯，另有甜品作結。



雜錦季節拼盤 睇見個拼盤咁豐富，未食已有一份幸福感，7個小碗或小碟，共盛載住10款食物，其實晌餐牌上將菜式都已經寫得一清二楚，我就唔累贅再抄一次，反正一陣都會逐樣分享。但點食法？有無次序？侍應就無點特別提及，有啲人就會慣常由淡至濃食起，小弟就覺得無所謂，隨心食就可以。不過，食嘅時候，就不妨多花時間欣賞一下每款食物，可有留意到以白蘿蔔做成嘅櫻花作裝飾，造型唯肖唯妙，仲清甜爽口呢！





浸煮春菜 春菜我估都喺有咩時令菜就用咩菜，今次食到嘅似喺春花菜，近頂位「花冧」部份，鮮嫩無渣，配少少木魚絲，算喺幾清淡嘅一道前菜。



西京醬燒銀鱈魚、日式煎蛋卷、小糯米糰 中間一大碗嘅就放咗銀鱈魚、煎蛋卷及糯米糰，銀鱈魚香燒過外層帶焦脆，但肉質依然咁滑，甚富油香；煎蛋卷藏晌葉內，差啲錯過咗，蛋卷蛋味濃，挺身而嫩；三色小糯米糰本身其實無乜味道，咬落煙韌，唔會好似有啲擺咗成晚咁又乾又韌。



火炙帶子伴酸麵豉醬 厚身嘅鮮帶子單以火炙處理，外層輕燒，入口就唔會太生，但食落鮮嫩彈牙，淋上薄薄嘅酸麵豉醬，配大蔥，味道方面又真喺幾合拍喎。



燒牛肉
網燒牛肉，明顯唔喺入口滿有油脂嘅一類，但肉質軟腍又夠肉味，食得到唔喺普通質素；墊底仲有少少薯蓉，軟滑而薯味十足，絕唔喺溝粉貨色。



檸檬汁煮蕃薯 真喺從未食過以檸汁煮過嘅蕃薯，非常有趣嘅組合，蕃薯口感極為粉糯，清甜嘅蕃薯味中滲出絲絲清香，即時將香港春更納悶嘅濕氣驅走。



松葉蟹肉酸食 所謂「酸食」即喺加咗啲酸醋，微微嘅酸醋，令蟹肉鮮味更突出、更鮮甜，再加啲蟹膏上面，集鮮濃香於一身。



希靈魚籽 差啲認唔到依碟就喺希靈魚籽，因為希靈魚籽一向嘅印象都喺幾鮮黃，但依家既切成一條條，又混和咗啲筍絲、海藻，口感豐富咗。



蒸雞肉及海蜇 依道小碟比較平實，就喺簡簡單單，嫩滑嘅蒸雞肉撈爽口嘅海蜇，加少少菇菌，落啲麻油又芝麻，唔會有咩驚喜。

咪睇少少啲前菜細細碟，樣樣得一、兩啖，食完都已經半飽。而輪到另一組食物，因為用番好傳統而常見嘅日式餐具，擺到成份「定食」咁款，當然，睇樣都知豐富好多啦，又逐一同大家分享吓。



刺身（油甘魚、三文魚及甜蝦） 先試刺身，雖然一小碟，卻依然加入碎冰嚟冰鎮，務求啲魚生入口時冰爽而新鮮，因為啲魚生一攤暖少少就變質，鮮爽度打折扣。油甘魚好有魚鮮味，魚味相對濃；三文魚較為油潤，質感細嫩；甜蝦不愧稱之為甜蝦，嗰入甜味好鮮、好清，口感好彈牙。



炸物（雜錦天婦羅）
有櫻花葉、冬菇、茄子及海老天婦羅，炸漿非常薄而脆，入口一啲都唔油膩，喺手勢好嘅表現。兩條海老天婦羅好好食，蝦肉好爽口，又鮮甜。幾款蔬菜，喺最可惜無小弟嘅心水南瓜。



三文魚籽飯 成個特色午餐仲有一電三文魚籽飯，不過，好彩份量唔會太多，恰到好處，唔會搞到太飽要硬撐。個飯配上酸薑片、日本芥末，日本芥末我就唔喺太好，撥開一半，再將所以材料撈勻食，味道夠多層次，飯粒軟熟卻帶點黏糯；三文魚籽卜卜咁爆汁，鹹鮮味爆發出嚟；薑片及芥末令個飯多份刺激感，咁食魚生飯未必正宗，但勝在合我心水喎！



麵豉湯 我哋中國人就喜歡先飲湯，後食飯，但日本人就食完晒飯先嚟飲湯，我都無乜點理，邊食飯，邊飲湯。啲麵豉湯幾濃香麵豉味，配上少少油豆腐，索晒湯，幾好食。



甜品（櫻花布甸、櫻花雪糕） 兩款甜點都喺色澤帶淡淡粉紅，原來，亮點喺用咗自家鹽漬櫻花嚟做。櫻花布甸賣相精巧，質感十分軟滑，滲出少少花香味；而櫻花雪糕加入唔少鹽漬櫻花，花氣更幽香，亦帶牛奶香，所以，兩者都好好食。

雖然預期南九州之旅大多數時間都睇唔到櫻花，但食完依餐，多多少少都為自己添上幾分春日氣息，總之隨遇而安，好好享受所見嘅一切。整體而言，對於份「花見」櫻花特色午餐，睇到食材嘅質素，做菜嘅心思，以及服務嘅熨貼，今次喺一餐好享受嘅特色午餐。
個人評分
味道：8/10
環境：8/10
服務：8/10
抵食：8/10
平均每人消費：HK$385
餐廳資料：
嵯峨野 Sagano
尖沙咀麼地道72號千禧新世界香港酒店1樓
2313 4215

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================