曉出世之後一直有盤算要影下家庭相，見到朋友著同一套衫影大肚相同埋家庭相覺得好有趣，但我生完之後個大肚腩並冇變成纖腰，到慢慢變到fit過未preg之前時，又覺得等小朋友識行識走識擺post應該更靚，拖下又再拖，終於到相隔兩年後係同一個地方再影相﹗我諗刺激我行動嘅應該係家姐影咗家庭相，見到佢哋咁靚嘅成品我又開始羨慕了～當年影大肚相係好朋友Dor送俾我嘅團購coupon，當時嘅拍攝experience同成品都好滿意嘛(請參閱：28-2-2015：懷孕扎記32w0d．maternity photography@SENS Studio之拍攝篇同埋14-3-2015：懷孕扎記34w0d．maternity photography@SENS Studio之成品篇)，我同day都傾向再去番SENS Studio影，最近見Groupon又有SENS Studio嘅coupon就諗住買，呢排我迷上HKTV mall購物，俾我發現同一個價錢都有得賣時就即刻買咗了～
買咗喇，電子coupon寄去e-mail喇，打開嚟睇喇⋯oops﹗點解剩番一個星期就到期嘅？﹗拿拿聲打去SENS Studio問有冇期，好在佢哋都俾我extend少少，隔個星期嘅星期就我哋就影相啦﹗減肥嘅時間梗係冇啦，置裝嘅時間都仲夠嘅～
影相前嗰個weekend有day睇住曉時我就去Uniqlo睇下可以有咩造型去影相，逛下睇下就慢慢有啲眉目了～好，決定啦﹗一set係睡衣家居風格，曉著西瓜圖案紅白睡衣，我同day就著家居悠閒風格嘅白色tee同埋鬆身灰色褲～一set係smart casual風格，我同day都著淺藍色恤衫配灰褲，曉就著衛衣紗裙可愛襪褲～最後一set就係北海道旅行時係旭山動物園買嘅親子tee，配藍色牛仔褲～三個風格完全唔一樣，發揮就靠攝影師嘅指導啦～而道具方面，我希望盡量用多啲平時玩開嘅玩具，多過想用影樓嘅道具，所以我帶咗兔兔(始祖兔)、Dora & Daisy、茶具套裝、書書、零食，原本帶咗250ml麥精代表我、125ml麥精代表曉，去到再搵便利店買多包375ml麥精代表爸爸，點知時間唔夠就買唔到啦，呢個concept就冇同攝影師哥哥講lu～
影相當日其實都用心良苦，因為曉最近調整緊午睡嘅時間，有時瞓一覺有時瞓兩覺，如果瞓兩覺就會係午飯後，which is我哋book咗影相嘅時間，所以我要make sure佢影相前瞓咗一覺先，咁先唔會變成得番我哋兩個影情侶照/夫妻照﹗影相嘅planning由較鬧鐘開始﹗一心諗住七點起身，早餐後要瘋狂放電，咁午飯前就一定瞓一覺啦～唉，見到佢咁眼瞓咁可憐，俾你瞓到七點半啦～慘慘～跟住都同我嘅計劃差唔多，早餐後去咗我哋最近好喜歡嘅老鼠洲遊樂場，玩咗應該有一個鐘，回程返屋企時曉成功瞓著了﹗
等車出門口等得耐咗，唔夠時間好好坐低食個lunch，結果買咗Delifrance外賣去到Studio度食，錯有錯著，食咗法式小蛋糕同埋飲咗橙汁嘅曉似乎hyper咗少少，慢熱嘅佢因為食咗甜嘢加埋攝影哥哥豐富嘅經驗，好快就玩熟咗啦，雖然未睇相片嘅效果，但以曉笑得多嘅程度嚟講，我估應該都影咗唔少靚相～我哋先影親子裝，影相對於我哋三個嚟講都耗好多energy，要抱、要跑、要追、要跳、要攬、要錫，好似好攰，但整個過程都好enjoyable呀～影到咁上下我哋換第二套衫，係睡衣party呀，攝照師哥哥拎咗個帳幕出嚟，呢排熱愛捐窿窿嘅曉就興奮到有少少唔聽指示了，連Dora同Daisy都要不停捐窿窿，要搵到配合佢玩嘅遊戲，攝影師哥哥再趁機會捕捉鏡頭，辛苦了﹗呢個造型仲有玩薄紗蚊帳、sir滑梯、又有同Dora Daisy佢哋睇書書，畫面應該都好多變化又豐富嘅～換第三套衫我哋過隔離嗰間房影，開頭嗰間房係白底色為主，有大落地玻璃拉上薄紗窗簾，應該會多用自然光，之後嗰間房就比較多場景同埋道具，但曉去到呢個時候已經冇電了，完全唔受控制，有時就坐係度發呆，有興緻時就拎起啲玩具嚟玩，當然係唔理鏡頭啦～唔，試下出動近排喜愛嘅音樂，睇下有冇幫助啦，一播起「羊咩咩」(The Sound of Music入面嘅"Lonely Goatherd")，曉即刻有啲反應﹗攝影師哥哥好驚訝佢嘅口味呢，居然係1965年嘅電影嘅soundtrack﹗冇錯，由"Do-Re-Mi"為首開始引起動機，到"So Long, Farewell"、"Maria"、"Sixteen Going on Seventeen"等多首經典金曲已經高踞「曉曉流行音樂排行榜」嘅頭幾位好幾個星期啦，我哋想介紹其他歌俾佢聽暫時都未得，去到婆婆屋企就記得要聽「羊咩咩」，甚至食飯都諗住要聽，明明未飽都話「飽飽抹抹」～不過即使播音樂都捱唔到幾耐，都係影唔到多幾張相了，時間都差唔多夠鐘，我諗整體應該都夠晒相俾我哋揀啦～
最快一個星期後就可以去揀相了，我哋下星期有節目，好啦，約咗18/3去揀相，好期待呀～大家都要留意住我個blog呀，有相睇一定同大家分享～
SENS Studio官方網站：
http://www.sensstudio.com.hk/index.php?router=FrontPage
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 246956
全部攻略 705
全部回應 10
