Moshi Moshi：喂喂，蟹霸丼喺度嗎？

一諗起海鮮丼，就第一時間諗返起舊年暑假去札幌時，到訪過二条市場，真喺好多海鮮丼店，又平又靚。最近去咗南九州一轉，主要嚐過宮崎山、宮崎地雞……等等，就未有試當地嘅海鮮丼得唔得，所以，貪口爽，返到香港就一支公走去食餐海鮮丼。


其實，食海鮮丼真喺無咩心水，而且，上網摷一摷，晌香港食日式丼飯嘅餐廳非常之多。咁啱出開尖沙咀商務印搵書，就揀咗晌附近嘅「Moshi Moshi」，即喺日本人接電話時所講「喂喂」嘅意思。走進餐廳，餐廳嘅格局都有啲「騎呢」，近門口地面層有張4-6人枱，可謂自成一角，再升上一排梯級先喺主要用餐區。

主用餐區地方細細，裝修簡約，採用和風溫色木系，加上燈光十足，有份親和感。



然而，小弟一支公，就梗喺揀最入嘅吧位啦。可惜，眼前放有擺放魚生嘅大雪櫃擋住，未有機會睇到師傅切刺身、扼壽司嘅情況。



雖然嚟食午餐，目標都喺午市套餐，但都影低主餐牌做個記錄，亦可讓大家有個參考。散點菜式分為丼飯（有成18款之多）、刺身、壽司、沙律、理料、燒物、揚物、手卷，都算樣樣齊備。















而午市套餐共有14款，有玉子燒配飯、咖喱飯、拉麵、海鮮丼……等等，定價$63-$238，正所謂豐儉由人。午餐仲包三小碟開胃前菜，飲品半價優惠，以及免加一服務費。







三小碟前菜 其實，主餐牌都有此前菜，每份$16，依家午餐有得送，就再抵啲。前菜有螺肉、鮑片及中華沙律，啲螺肉煙韌咬口，鮑片軟腍有鮑味，中華沙律清翠爽口，再飲啖茶，靜候海鮮丼上場。



蟹霸丼 $166 晌散點餐牌所見要$172一客，問過店員，午餐份量跟散點一樣，所以，晚包前菜，又免加一，當然就到時間嚟食午餐就划算好多。小弟點咗個蟹霸丼，貪佢個名夠霸氣囉，哈哈。



個丼飯主要有3款食材：軟殼蟹天婦羅、鮮拆蟹肉及蟹膏，將飯面鋪得滿滿，再加埋半隻糖心蛋及4片紫菜，甚有睇頭。蟹膏唔喺人人都鍾意，鍾意嘅話就覺得佢甘香豐腴，用嚟撈飯好食；啲蟹肉絲雖然唔及成隻蟹鉗食咁豪氣，但啲蟹肉都頗鮮甜；至於件軟殼蟹天婦羅，薄軟入口卻煙韌酥香，食落一啲都唔覺油膩，內裡亦有唔少蟹肉。糖心蛋亦做得有水準，口感岩啱啱好，蛋黃凝香軟滑，而啲紫菜點用，咪自製壽司卷囉，不得不順帶一提，啲飯既有飯香，又黏糯軟綿。













日本南瓜薯餅 $32 個海鮮丼果然有質素，既然食得開心，就再追加一道揚物。南瓜餅喺心水之選，入口外層鬆脆到咔嚓聲，一啲都唔油，而且南瓜味濃，又加咗啲紫菜碎，食味不俗。





整體嚟講，啲海鮮丼認真唔錯，難得有平又有貴，悉隨尊便。環境亦幾雅致，讓人可以輕輕鬆鬆咁用餐，有時候，撇低老婆一支公吊兒郎「丼」嚟食個海鮮丼，都幾好吖！
個人評分
味道：8/10
環境：7/10
服務：7/10
抵食：8/10
平均每人消費：HK$198
餐廳資料：
Moshi Moshi
尖沙咀金巴利道35號地下B舖
2387 7200

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================