Naked 原の味：原汁．原味．完美

「Naked」有一種原始、赤裸裸嘅意味，加上「 原の味」嘅譯名，多多少少你就估到店家堅持嘅喺乜嘢。較早陣子，喺從雜誌嘅介紹認識這家店，主打新派日菜，並非常有創意及互動，仲記得早前到訪嘅Le Rêve，以西日融和風格帶嚟唔少驚喜，所以，對Naked亦萬分期待。

店舖嘅正門喺開放式設計，摺門趟開晒後，從外望入去十分開揚，擺上高腳枱椅，只喺嚟飲番杯又得，作為餐前坐晌度輕鬆小酌亦可。但當真正踏進餐廳，近門口右邊嘅巨型壽司吧，十分搶眼，坐晌度唔單止睇到師傅搓壽司，有興趣更可跟師傅交流，而背後嘅電視屏幕，不斷播放刺身、壽司相關嘅片段，絕對唔喺硬銷飲食嘅「節目」。

因為我哋被安排坐晌一面，跟住侍應一路走，一路窺探內裡環境，原來地方非常之大，以多組雕花屏風作間隔，提升私人空間感。而一室以金、啡及木系為主調，帶點和風嘅裝潢，卻不失典雅及氣派，然而，唔會有太俗氣嘅感覺。







餐廳設有貴賓房，人多大可訂個房自成一角，不過，溫馨提示一下，由於間隔只喺雕花屏風，唔能夠完全隔聲，悄悄話就唔好講得太大聲。除壽司吧位搶眼之外，裡面一張U型大枱，足可容納15人，侍應話人多唔想太拘束，揀坐依道喺幾唔錯，因為可以圍埋有傾有講外，更可以聽到由廚師站晌中央位置講解菜式。

翻翻餐牌，比較意外嘅喺菜式選擇非常多，因為好多時賣日本菜嘅餐廳都比較做得專注。分類大致為蠔類、沙律、湯品、前菜、壽司、刺身、特上卷物、廚師推介、食事及甜品，難得喺試過之後，無話太多選擇而做得參差不齊。而且，細閱一遍，發覺用上唔少靚食材！















散點外，亦有供應3款二人套餐，定價為$588、$818、$1068，同樣都喺以6道菜為標準，價錢貴啲，就自然所奉上嘅菜式會喺矜貴啲啦。





魚子醬迷你脆筒二重奏 $138
先上一道小食過吓口癮先，迷你脆筒二重奏其實好簡單，就喺以加拿大海膽拼三文魚籽、鮮吞拿魚蓉拼黑魚子醬做成兩款迷你「雪糕」。賣相的的骰骰，非常得意，脆筒脆口喺應有嘅效果，而無論邊一款口味，都好有海洋氣息。 





加拿大海膽拼三文魚籽迷你脆筒 海膽色澤鮮橙有光澤，喺新鮮嘅表現，入口綿滑，一啲腥味都無，三文魚籽嘅鹹味更吊出海膽嘅鮮。




鮮吞拿魚蓉拼黑魚子醬迷你脆筒
吞拿魚蓉刴得細緻仍保持口感，鹹鮮嘅黑魚子故然特別醒神，但啲吞拿魚嘅鮮味亦唔失禮。



赤海老水雲豆腐 $98 水雲，喺海藻嘅一類，雖然食過，但次數唔多，黏滑得嚟有啲爽口感，加入咗少少柚子醋，變得好醒胃；豆腐少少黃黃哋、綠綠哋，店長上菜時就介紹過喺混入鱈場蟹膏嚟做，認真特別；再配上爽口嘅鮮蝦刺身，擺放晌隻玻璃杯內，確喺賞心悅目。就連幾粒杞子，都搵梅酒浸過，又放一片食用花作裝飾，食心思、心機都抵番晒啦！







紅菜頭汁牛油果蟹肉卷 $148 不得不讚讚佢哋做菜嘅賣相，就好似依一道壽司反卷，「整色整水」之後，喺咪耀眼奪目靚仔好多呢！紫紅色嘅壽司飯，喺搵紅菜頭汁混入珍珠米煮成，捲入牛油果、蟹肉，放點飛魚籽，砌成花形，賣相夠晒美觀優雅，最緊要仲喺好睇又好食嘛，整體口感綿密緊致，清新健康。





餐牌中有一欄喺廚師推介菜式，店長誠意推薦，尤其個牛肉海膽刺身板，佢話依家個價錢喺暫定嘅優惠價，試試市場反應，遲啲應該會調整。



48小時慢煮雪花牛小排 $248 先試試個慢煮小牛排，唔單用上美國安格斯牛小排，更以低溫53°C慢煮48小時，聽落都好吸引。雖然賣相無之前幾道菜咁特別，但用料無欺場，啲牛小排腍滑到不得了，好似做晒水嫩保濕咁，又有肉味，配上香蒜豉油汁，真喺好好食。伴上加入黃薑粉做嘅蕃薯蓉（店長解釋有抗氧化之效），鮮嫩無渣嘅露筍，少少百合，成道保健菜式咁，但另一特別之處，喺再放埋粉紅色嘅「心內美」絲，唔喺店長講講，真喺唔知乜嚟，其實喺一種紫紅色心嘅蘿蔔仔，口感帶點爽脆。







自家製特上牛肉海膽刺身板 $380 如果挑選全晚最難忘嘅菜式，非依道牛肉海膽刺身板莫屬，一上枱我哋已經嘩嘩聲嚇親隔離。之前提及過餐廳嘅菜式有互動嘅元素，正正可以晌依道菜上反映，一大塊木板之上，放上加拿大海膽、澳洲M3級和牛，以及和牛他他伴鵪鶉蛋、蒜蓉、韓國泡菜、紫蘇葉及韓國紫菜，唔知點入手，角落已擺放一件成品作參考，但亦大可以按個人口味隨心配搭，玩法極多。



小弟先以「樣辦」試試味道，入口紫菜鹹脆，紫蘇葉帶出濃香嘅氣味，跟住海膽嘅綿密，和牛嘅油潤，口感極有層次，更從蒜蓉、韓國泡菜引發出辛香惹味，所以，喺一道非常過癮嘅菜式。再試試由和牛他他配海膽，亦有試齊三者嘅組合，同樣效果出色，不過，紫蘇墊底再放紫菜嘅效果就絕不建議，因為失去咗紫菜嘅脆口感。







最後，理所當然想以甜品作結，睇到甜點嘅款式好特別，結果揀咗一款加入鵝肝嘅出品，喺款幾大膽嘅創作，以及一款意日聯乘嘅出品，又喺好睇又好玩嘅創作。



藍莓鵝肝番石榴雪糕 $148 以一個類似放魚子醬嘅盛器登場，裡面滿滿番石榴雪糕，酸香軟滑，番石榴哋非常突出，而雪糕面嘅鵝肝仲喺暖暖哋，將鵝肝拼合雪糕一齊食，感覺喺又熱又凍，味道喺又鹹又甜，然而，番石榴嘅酸味平衡鵝肝嘅油膩，再嗒番粒清甜嘅藍莓，成件事唔會令人覺得怪，卻有一份計算準確嘅心思。





意大利特濃咖啡配抹茶雪糕 $128 依道日本聯乘意大利嘅甜品，相信喺店家嘅招牌甜點，唔單賣相好有心思，食材嘅配搭亦好特別。為大家拆解吓個甜品先，上層漏斗型玻璃杯加入紅豆蓉墊底，並填滿加咗百利甜酒嘅意式奶凍，再放上大大球抹茶意式雪糕；唧管喺意大利濃縮咖啡，加唔加入奶凍就隨個人喜好，仲有三粒原粒烘培嘅有機咖啡豆，可以就咁咬嚟食，好香濃嘅咖啡味。一口過紅豆蓉、奶凍、雪糕，實在令人開心。

下層圓型玻璃杯主要放有喺原味及朱古力味脆米，以及少少食用花做裝飾，令整個甜點更好睇。啲脆米喺俾客人加落上層度一起食，不過，實際玩法可由客人隨心，例如倒翻轉，將部份雪糕放落脆米一齊食亦可。




今晚同友人嚟到「Naked原の味」聚餐，菜式唔止只喺賣新派、賣創意，仲加入好多健康食材，亦以呈獻原味為核心，可以講喺一道原味清泉。部份菜式加插亞互動元素，令用餐有更多樂趣！
個人評分
味道：9/10
環境：9/10
服務：8/10
抵食：8/10
平均每人消費：HK$510
餐廳資料：
Naked 原の味
尖沙咀麼地道61號冠華中心地下G1號舖
2363 7299

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================