Day and Nite by Master Kama：龍重登場

聽聞依間主打食龍蝦嘅西日料理餐廳好耐，據聞非常有人氣，由銅鑼灣總店開到嚟旺角，一間餐廳開得分店，理應有一定支持度先得，所以，抱住一試嘅心態嚟到試試。


餐廳開晌一幢商廈二樓，但商廈地下正門已有餐廳招牌，白底黑字，十分易認，並有員工做接待。而上到餐廳，店內環境比較狹長，用餐區分一左一右，長得嚟都幾深。



而裝潢主要喺以湖水藍襯白瓷磚，一派悠閒風，感都唔錯。

餐牌設計精美，內裡所見，菜式選擇非常之多，圖文並茂，包括沙律、前菜、日式串燒、招牌龍蝦菜式、飯麵、海鮮、主菜大盤、濃湯石窩系列、甜品及酒精或非酒精嘅特色飲品。除龍蝦作為招牌亮點，西日料理亦為核心，故見到唔少菜式加入日式元素。

































上面都提及咗有一款濃湯石窩系列（Kama Pot），究竟喺乜嚟？見成用店方嘅名字，據店員介紹，原來店名「Kama」喺取自「Kamameshi」嘅簡稱，即喺日式嘅釜飯，依等熱窩系列就喺借用釜飯概念。濃湯有5款選擇（$8-$15），配料有8款選擇（$65-$88），再選配燴飯定手打烏冬，自由配搭。





日式叉燒+溏心蛋配龍蝦濃湯燴飯 $12 + $72 上枱時個石窩滾熨，熱氣逼人，但賣相就無餐牌張相咁靚仔，可以講喺賣相零分，因為太多湯冚過晒所有食材，只喺勉强仲見到隻溏心蛋而已。

個龍蝦濃湯實在不俗，濃郁鮮香，溏心蛋亦做到恰到好處，湯內又有木耳及粟米嚟增加口感，不過，要挑剔就喺燴飯比較少，叉燒亦被啲湯沖到碎濕濕，想撈一塊完整嚟影相都唔得。其實湯上一半或3/4份量都夠晒，更可以另上，上枱時先好似啲鐵板燒咁倒落個窩度，既被客人睇到所有食材，倒湯所發出嘅吱吱聲更有睇頭。



主菜大盤中，我哋揀咗個有龍蝦元素嘅薄餅，因為，從他人食評中都讚佢哋啲薄餅做得唔錯。



意式龍蝦海鮮薄餅 $168 對比起個石窩燴飯，放上半邊龍蝦頭上面嘅薄餅隆重登場，個薄餅嘅賣相明顯吸引好多，加上餅面上加咗唔少沙律菜，令顏色更好睇。薄餅喺薄脆批底，算做得幾脆口，食落龍蝦肉確實唔少，又爽口，仲有啲蝦肉、魷魚、蜆肉等等，加上落咗唔少芝士，香濃好食。





Apple Crumble $68 原先，喺想試梳芙厘，不過，店員告之是夜好爆場，梳芙厘製作唔撤，所以，退而求其次，搵咗「蘋果金寶」代替，不過都要預等10分鐘左右。依度嘅蘋果金寶喺以小煎鑊盛載，火辣登場，加上一大球雲呢嗱雪糕及幾粒爆谷，淋上焦糖漿，未食已好期待。

平時食「金寶」主要喺牛油麵粉粒嚟，晌度就加入大量燕麥片，而下面嘅蘋果焗得香甜，帶微微玉桂香，混和啲燕麥金寶，極具口感；再溝埋啲雪糕一齊，一熱一凍，非常過癮。順帶一提，睇見啲雲呢嗱籽，你就知球雲呢嗱雪糕唔喺普通貨色。



Mike Caramel Tea $58 餐廳有一系列特色茶品，以日本「山田詩子紅茶店」所出嘅茶包沖泡，一共有12款，唔單止圖文並茂為每款味道作介紹，更奉上載有茶葉嘅小樽，等你聞一聞茶葉嘅香氣先選擇都得。







友人結果揀咗焦糖王子牛奶茶，佢最欣賞套茶壺及茶杯，精緻有趣，然則，就覺得杯奶茶雖有焦糖香，但奶味略嫌重啲啲，蓋過啲茶香。







Latte $38 襯甜品，小弟指定喺拿鐵，不過，好老實，眼前杯咖啡真喺唔知佢喺拿鐵定意式泡沫咖啡，泡沫好厚而唔喺混和咖啡中，雖然唔可以講難飲，但入口口感唔得，好唔平均，離一杯真正有水準嘅拿鐵好遠。先旨聲明，我有重複問店員杯嘢喺拿鐵定意式泡沫咖啡架！



整體而言，Master Kama嘅菜式喺擺放唔少心思，雖然只試咗薄餅，但其他龍蝦系列菜式又幾吸引，但部份菜式個人覺得仍有很多改善空間，期望餐廳晌擴展版圖同時，都能夠保持好出品嘅水平！
個人評分
味道：7/10
環境：8/10
服務：7/10
抵食：7/10
平均每人消費：HK$230
餐廳資料：
Day and Nite by Master Kama
旺角山東街50號1-2樓
3106 0900

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================