東霖小廚餐廳：歡迎光霖

雖然美孚區人口唔少，亦養起唔少食肆，不過，選擇就比較狹窄，佔絕大多數都喺港式餐廳。正所謂一雞死，就一雞鳴，之前嘅「御·上澄」日式小店卒之結業，新一員喺間茶記小廚。早前就打算嚟食下午茶，但人多就過門不入，擇日搵埋老死嘅美孚街坊早啲嚟食晏。


環境一派茶記格局，裝修極簡單，數張圓枱，數張卡位，務求光猛四正，乾淨企理。嚟得茶記，一向唔要求咩環境。



既然喺茶記定位，碟頭飯必然喺午市主角，不過，東霖嘅午餐、晚餐喺同一個餐牌，亦喺同一個價錢，無分早晚，平貴都有（$44-$75），悉隨尊便。順口一提，我見佢門口有貼啲早餐出嚟，但店內餐牌就唔見有，而且，營業時間11:00am-11:00pm，相信新張關係，未做早市住。

順帶介紹埋餐廳其他時段有咩選擇，好似下午茶時段，有大路嘅下午茶餐（$26-$35），碟頭嘅中式下午茶餐（$36），仲有啲三文治、多士、包類食物供應。



作為茶記，必不可少嘅炒粉飯麵（$45-$50），但唔包嘢飲，飲品需要另外加錢。

此外，店家以小廚自居，小菜亦喺主打之一，不過咁講，依家好多茶記都喺賣碟頭飯加小菜模式，名字嘅嘢都喺個名而已。然而，小菜選擇真不少。

因為街坊老友已嚟過食晚飯，覺得小菜有水準，所以，建議我哋嚟食吓。雖然嚟食晏，唔介意俾多少少，就可以好似我哋咁點小菜套餐。套餐分為蒸魚套餐（$70）、2人套餐（$168）、4人套餐（$388）、6人套餐（$488），人多人少嚟都無問題。

結果我哋揀個4人餐，想假日食得豐富啲嘛，4客燉湯、半隻雞、龍躉兩味、自選小菜2款，包飯、包甜品，都喺$388，無加一，好過上附近啲連鎖酒家啦。而套餐小菜有指定嘅，不過足有29款供選擇。

2、4、6人套餐都包無味精足料燉湯，有咩燉湯都會寫晌牆上黑板，是日就有蟲草花燉雞湯及杏汁菜膽燉豬肺湯。基本上午飯時段已經有供應，問過吓店主，佢話每日預二百個燉湯左右，新開張呢段時間，晚市初段都有機會賣晒。睇番佢個散點餐牌，原來啲燉湯都唔喺收得好貴咋喎，$28一客。如果你點午餐、晚餐、炒粉飯麵，俾$14都可以加配一客，算叫半價優惠。





蟲草花燉雞湯 湯色浸沉，撈兩嘢，好足料，個湯飲落非常潤，而且，湯味濃郁，唔會得個樣。我老婆喺味精測試專員，佢對味精好易有反應，佢飲完都話喺無落味精，証明個湯都幾真材實料。



杏汁菜膽燉豬肺湯 老友就推崇備至佢哋個杏汁豬肺湯，湯色呈奶白，當然唔可以跟城中出名嘅杏汁白肺湯相比，人哋嗰啲賣近百蚊一碗，但東霖嘅豬肺湯以咁嘅價錢，一啲都唔失禮喎，有杏仁香氣，啲豬肺爽口無臊味，有水準。



貴妃雞半隻 散叫要$90一客，4人餐就包半隻，啲雞做得幾好，雖然唔知喺新鮮定冰鮮，但絕唔喺雪藏貨，因為既無雪味，肉質又好嫩滑，兼且皮下脂肪少，味道帶些微鹹鮮。



龍躉炒球 龍躉拆肉炒球，炒得極有鑊氣，魚肉炒得嫩滑，又有魚味；就連啲西蘭花都做得好，好嘅意思喺色澤保持翠綠，咬落仍帶有爽脆感，真喺試過唔少茶記嘅西蘭花，一早烚定，又黃又腍唔好食。



蒜蓉蒸龍躉頭腩 蒸頭腩唔喺個個都啱，因為啲頭腩皮面位通常有一層「骨膠原」嘅啫喱狀魚脂，咬落感覺腍而啜口，但其實啲頭腩搵蒜蓉蒸，蒜香惹味，肉質好滑溜。



涼瓜炒肉片 老友喺涼瓜嘅「粉絲」，所以，指名點客惹味嘅炒肉片，涼瓜入口苦中帶甘，而肉片炒得頗為爽身，配以豉椒，的確惹味非常，送飯食就最正。



金銀蛋浸時蔬 幾道菜都喺肉，雖然白肉多，部份菜式亦夾雜唔同蔬菜，但都想健康啲，故另一道小菜就揀金銀蛋浸時蔬，而時蔬就揀白菜仔。個湯底好濃香，所以，啲白菜仔入口唔寡，菜內放有好多雞蛋同皮蛋，做得都唔錯。



熱奶茶 本來套餐跟甜品，但午市未煲好，就讓我哋轉餐飲，冷熱隨意。嚟茶山記嘅必然之選喺奶茶，因為，真喺茶記先沖到杯靚奶茶，而依道嘅奶茶，茶底不俗，好有茶香，口感都頗幼滑，但就未去到絲滑嘅感覺。

個4人套餐真喺超抵食，5餸1湯，實情5、6個人都夠食，食得我哋鬼咁飽，要小弟依個包底王出馬先清得晒。雖則話茶記唔講服務，但服務都唔差，至少無遇到晦氣、黑面嘅店員，上菜亦快手，最搞嘢個店主見我喺咁影相，走埋嚟竟然唔喺同我講：「你做乜影相？」、「依度唔俾影相喎！」，而喺問我：「點先影得啲餸菜靚啲？」佢話想自己影嚟貼晌廚窗喎。
個人評分
味道：8/10
環境：7/10
服務：8/10
抵食：8/10
平均每人消費：HK$97
餐廳資料： 東霖小廚餐廳
美孚美孚新邨吉利徑36號地舖
2219 8448

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================