中文科活動日

小齊學校今日開始放假啦~
而早兩日雖然要返學, 
但其實就係返去玩!
一日係中文科活動, 一日係視藝科活動
中文科活動日仲可以著中國服唔駛著校服





係咪就放假我心情都放鬆左?!
 呢朝居然唔記得較 ALARM, 
好彩我都有生理時鐘個人醒一醒啫
但遲左起身爭D 趕唔到校車 >_<



只能上車前匆匆影幾張相
今日小齊呢套中國衫回頭率好高咖, 
敗家媽媽o係淘寶揀左好耐, 最後先決定呢件,
 云云淘寶中國服之中呢間d 衫我覺得無咁"娘"
日本風布料o既中國旗袍, 
仲係櫻花圖案, 太應節啦
 89蚊人仔咋~抵呢~!
而且布料唔錯, 實物無色差, 買得過



中文科活動日節目豐富, 
有表演有賣物有攤位遊戲! 
小齊返屋企滔滔不絕講佢玩左咩比我聽
原來小齊咁好彩比老師揀中上台試玩打鼓
所以我o係intranet 睇到佢d 相
但點解你一臉茫然?!



至於賣物呢? 原來都有好多, 
手工藝, 字畫, 懷舊小吃...等等
之前一日小齊已經問定我攞錢返去買o野
我問佢要幾多? 佢話要100蚊左右
好啦! 睇你會唔會用晒先?



最後小齊買左咩呢? 
買左兩個吊飾 -- 一個係砵仔糕, 一個係臘腸卷
每個盛惠 20蚊
而食物呢? 小齊就一樣都無買
咁即係駛左唔夠一半錢啦
第一次有錢o係身都唔算好"身痕"~ 哈哈
咁點解買砵仔糕同臘腸卷呢?! 
小齊話覺得好得意想比我睇下喎!

難得今日穿中國服, 公公都話要同小齊影返張相先!





是日靚衫:

============================================

感謝 敗家媽媽 提供以上資料

敗家媽媽的網誌: http://buyjiamama.blogspot.hk/

============================================