餃掂手工餃子雲吞專門店 Nom Nom Dumpling：松善如流

我老婆喺幾鍾意食餃子嘅人，尤其中式嘅湯餃，就連早個月前去南九州旅行，行程最尾一晚都搵咗間賣中國菜嘅「紅虎餃子房」食餃子。最近，先知太子有家特色餃子店「餃掂手工餃子雲吞專門店」，有多款特色餃子，有湯餃，有煎餃，專登過嚟會一會佢，老婆鍾意食嘅嘢，小弟一向從善如流。


門面上面有個電子屏幕，打住「天下第一餃」，喺咪咁堅先？走入店內，以餃子店而言，佢哋裝修都算喺幾摩登精緻，一室以黑色為主調，牆上不時見到唔少有開松茸嘅介紹，以及一啲處世之道或趣味格言。





滿以為要等位，原來廚房旁嘅走廊，可以入到鋪後嘅另一個用餐區。裡面都唔細，擺到三數張枱，坐到十鬆啲人。

途經走廊時，睇到半開放式廚房內，幾位店員以熟練嘅手勢不停咁包餃子，另一邊廂就不停煮餃子。



一坐低，枱上最吸，晴就喺嗰大大罌嘅酸泡菜，主要喺白蘿蔔，少少紅椒及青椒，但醃得好食，啲蘿蔔入口爽脆，酸香得嚟一啲都無嗆喉，越食越開胃，仲喺免費任食。

食住泡菜嘅同時，睇睇有啲咩好食。至尊松茸餃子講到全球首創，亦喺吸引我哋嚟嘅原來之一，仲要中英日韓文嚟介紹，真巴閉。

餐牌內，故然餃子嘅選擇喺最多，餃子以外，仲有麵食、涼菜、湯品及飲品，圖文並茂，印刷精美。

















野味酸辣雲耳 $16 先嚟兩碟涼菜，因為見定價抵食，老婆又鍾意雲耳依類養生食材。雖然只賣$16，但份量交足貨，啲雲耳好爽口，酸酸辣辣，清爽開胃。



回味手拍青瓜 $16 青瓜切得比較大條，但又確喺有拍過，故啲蒜味幾入味及平均，口感爽脆就唔使多講。

隔無耐，至尊松茸豬肉餃就送到嚟，亦喺今晚嘅主角。因為喺店家招牌，所以認真大事鋪張咁介紹。除餐牌有介紹松茸之外，牆上嘅電子黑板亦都有介紹，更講到媲美法國嘅黑松露。自行睇睇相，小弟就唔多講佢有咩功效。





至尊松茸豬肉餃（跟狀元九鼎湯）$65 份量分中碗（8隻）及大碗（12隻），而灼同煎亦唔同價錢，每份松茸餃都跟狀元九鼎湯。因為打算試埋香煎軟心芝士餃，所以松茸餃就要灼嘅。每隻餃子都包到脹卜卜，無乜太多虛位，皮薄透餡，可見用料十足無欺場。餃皮除咗薄之外，亦頗滑溜，內裡嘅豬肉饀刴得幼細，而且，唔覺有太多肥豬肉，不過，好老實，啲餃子唔喺好食到啲松茸味，但附有一碟松茸醬，一邊微辣，一邊唔辣，沾咗之後真喺添份幽香，味道層次大升級，不愧為鎮店之作。



除咗啲松茸醬，枱上仲有其他佐料，如醬油、醋、芝麻醬、青瓜醬、四川辣醬……等等，按個人口味再配餃子食，感覺幾特別。

題外話，行經「走廊位」，見有盒裝松茸、松茸醬出售，不過，因為無打算買，就無刻意問賣幾多錢，亦唔見餐牌有列價錢，有興趣就要自行查詢。

至於個狀元九鼎湯又喺咩料？餐牌中又大篇幅介紹，功效、材料都印晒出嚟，咁實際味道會喺點？味道極似生魚煲粉葛，但頗為清淡，原來喺無加鹽，店員話健康啲，但我就覺得喺淡口咗啲囉，哈哈！





香煎軟心芝士餃 $48 份量跟松茸餃有中碗（7隻）及大碗（10隻），比起松茸餃，小弟就更加鍾意依款芝士餃，一來煎得金黃，食落甘香脆口，二來裡面堅塞滿好多芝士，軟綿綿嘅芝士混埋粟米同豬肉，極之好食。





四川涼麵 $20 咪以為淨食餃子會唔夠飽肚，其實啲餃子包得好足料，幾夠飽，但點客四川涼麵就純粹過吓口癮。涼麵淋咗少少麻辣汁（可以少辣）及灑上少少花生碎，自行再加啲芝麻醬及青瓜醬，味道紛陳，不過，麵條有點腍就美中不足。

雖然只喺試咗兩款餃，但兩款都做得不俗，當然芝士餃較為討我歡心多啲，此外，啲涼菜好食又抵食。喺個涼麵差咗啲，可能食得辣嘅人要大辣，效果會唔同啲。
個人評分
味道：8/10
環境：7/10
服務：8/10
抵食：8/10
平均每人消費：HK$83
餐廳資料：
餃掂手工餃子雲吞專門店 Nom Nom Dumpling
太子界限街30號地下
3105 9968

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================