0

小地勤要當媽媽了 !

小地勤點滴 於 2017-08-23 12:31:54 發表  |  累積瀏覽 1508

分類:

23.08.2017


去完北海道返香港不久 , 小地勤既身體就開始有變化了 , 無時無刻也很想睡覺 , 起初都不以為以 . 以為玩完即刻返工 , 跟沒休息沒分別 , 所以才有渴睡的感覺 . 到了六月頭 , 我就已經開始懷疑 , 結果去了診所一轉 , 就被告知 " 有喜 " 了 ! 醫生仲讚我叻 , 咁早發現 , 當時才 4 week . 


當日我老公好似接受唔到咁 , 失去聯絡左幾小時 , 不過當佢回家時 , 卻帶住 3 個奶樽 , 真係笑死小地勤 . 洗唔洗咁早去買奶樽呀 ! 老爺奶奶亦好開心 , 因為我叔仔夫婦年頭公佈完喜訊 , 接住又到我地 .


做左三十幾年人 , 以為 " 有左 " 就只要安心等到生 , 就可以了 . 結果係 5 week 開始流啡 , 到 6 week 睇第一次婦科 , 已經話我作小產 , 當晚 , 小地勤已經見紅 , 入左急症 , 訓左 2 晚 , 醫生照到 BB 有心跳 , 就放返我出黎 , 回家訓床 .


出院 2 日 , 小地勤流血了 , 又返左急症 , 把自己跟家人都嚇死了 . 個刻得自己一個 , 好驚 , 護士仲話我血壓高 , 排左無 1 個鐘急症 , 我就已經上左房 . 好彩係仲有心跳 , 但就照到我子宮有血塊 , 比個 BB 仲大 , 係正 BB 旁邊 . 


返到房 , 旁邊的都是等待人工流產的孕婦 , 心裡壓力很大 , 很擔心 . 第 2 日 , 醫生話無野可以做到 , 叫我回家繼續訓床 . 我奶奶每天都上門煮三餐比我食 , 大家都好擔心 , 我亦過意唔去 . 每天我都睡起碼 15 小時 , 沒有作嘔 , 卻胃口不錯 . 停工接近 3 星期 , 7 月才再上班 .


返工工作很忙 , 再忙我都跟自己講 , BB 才是最重要 , 我照休息 , 唔 OT , 工作清唔曬亦都唔理 , 無野重要得過我呀 B ! 我同自己講 , 如果老闆有微言 , 我就請病假唔返工 , 等生完就轉工 , 下定決心後 , 再有責任心的我變成按章工作 , 別人點諗 , 我係唔會理的 .


流啡情況沒改善 , 所以我就去左睇中醫 , 食安胎藥 , 之後情況係改善左少少 . 每天我都吃得又訓得 , 睇住個肚開始大 , 個心都定左 .


7 月中產檢 , 呀 B 已經由一粒豆成左型了 , 生左條臍帶 . 醫生話要生埋胎盤先夠穩陣 . 7 月尾去醫院做唐氏 , 護士話呀 B 好百厭 , 唔合作 , 見佢不停郁手郁腳 , 好得意 .


最近 8 月中 , 再做產檢 , 已經知道係男仔 , 醫生仲話我唔洗增食 , 平常咁就可以了 , 仲話我體重增加得好好 . 唯一係胎盤比較低 , 暫時都係少郁動多休息 .


係醫院期間 , 每日都有孕婦要跟自己 BB 講拜拜 , 亦見到好多高齡孕婦訓床 , 聽過佢地所講既人工受孕既痛苦經歷 . 原來要成功懷孕以及順利生產 , 唔係一件易事 . 能夠當媽的感覺是很好的 , 希望我個小伴子可以平平安安來到依個世界 .




鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"
  • 小地勤點滴 於2017-08-23 20:16:07 留言
    原文由 EEChan 於 2017-08-23 15:55:05 發表
    恭喜,祝一切順利
    多謝,我會好小心保護佢 ?
  • 舉報 回覆
  • No.2
  • bfpush3 於2017-09-06 09:50:52 留言
    太好了!生一個叫小小小地勤!
  • 舉報 回覆
  • No.3
  • 小地勤點滴 於2017-09-08 19:21:05 留言
    原文由 bfpush3 於 2017-09-06 09:50:52 發表
    太好了!生一個叫小小小地勤!
    可惜佢係一個小胖子 , 女性行業 , 唔實合佢 , 哈哈 ~
  • 舉報 回覆
  • No.4
  • 1874飛飛 於2017-10-11 12:08:49 留言
    恭喜恭喜 正確, 一切要以BB 為重!祝一切順利!
  • 舉報 回覆
  • No.5
  • 小地勤點滴 於2017-10-13 20:52:40 留言
    原文由 1874飛飛 於 2017-10-11 12:08:49 發表
    恭喜恭喜 正確, 一切要以BB 為重!祝一切順利!
    係呀,我專心養胎,工作就盡做,做唔曬就搵人幫手,唔會再勉強自己 ?
  • 舉報 回覆
  • No.6

最多能輸入300字

累積瀏覽 495835

全部攻略 711

全部回應 4285