10
【親子餐廳】Origami Kids Cafe 紙飛機親子餐廳由 kimfamilytravel 於 2018-01-09 09:06:03 發表 | 累積瀏覽 4059
攻略日期：2018-01-06
是次消費：每人平均約HK$ 300.00
如果要揀親子界全年盛事其中之一，我一定揀 Origami 紙飛機親子餐廳 的開幕！這家親子餐廳無論由環境、設施至美食等各樣配套絕對係一人
由九龍灣德福有專線小巴 68號直達啓德郵輪碼頭，大家可以向前行至 Zone B 入口搭Lift直上 R層平台
如果你有車，泊好車後於 Zone N 直上 R層(留意 Zone N 是不通往地下層)，一出 Lift 就見到 Origami
由於今日天氣不太好，就沒有影低餐廳外的面貌了，只送上官方美美圖吸睛
今日雖然正式開幕，但早陣子見其他Bloggers到場介紹，都已經略知一二，因為呢度嘅設計簡約自然，以白色、木色及透明物料為主調，都係我呢個木控最鍾意的。
先介紹呢個繪本區，原來有成幾百本中英文兒童繪本，如果等緊餐嘅時侯，過嚟親子閱讀一番就最適合不過。
繪本區以線條式階梯為設計，感覺就好似坐咗喺梯田間，坐喺度睇繪本真係感覺超舒服
估唔到呀芊一入到嚟就揀咗喺呢度睇咗陣書
定係佢仲未發現更多好玩得意嘅地方呢！？
全餐廳設計都係由陳幼堅 Alan Chan 一手辦，我讀 Design 嗰時已經聽過佢大名，同埋留意佢嘅作品，但係估唔到 Origami 先係佢第一個跟兒童有關的室內設計項目
其實餐廳屬開放式空間，中間係用餐區，其餘四邊都係兒童玩樂區，家長們可以安心地邊食邊睇住小朋友玩，不過最後當然跟埋一齊玩一齊食就最好啦，咁先算係「親子」嘛！
其實整個餐廳兒童區，都適合 0—7 歲的小朋友玩。
另一邊近落地玻璃位置係帳篷區，仲有個木屋仔可以俾小朋友有自己私人空間，入面放咗超多款外國進口木製玩具。
近年都越嚟越多家長喜愛小朋友玩木製玩具，因為比較安全又不含有害化學物質。
有個帳篷放喺度，最適合一班女仔，同自己閨密走入去傾吓計玩公仔！
真係好似去咗露營咁，喺帳篷走番出嚟，仲可以嘆番個 High Tea
呢款英式下午茶真係好味 (有個女的爸爸福利：呀芊邊玩邊餵我食，我又要扮好味，但個心超甜。)
呀芊突然發現咗D嘢！
像真度極高吧！真係有個木製茶包在茶壺裡
真係玩玩具學英文！「Tea」
走到餐廳最入位置係一個大型玩樂區，有多組遊樂設施。
遊樂設施就係美國出品，Cedar Works 的原木攀爬架、滑梯，可以俾小朋友盡情咁玩。
小朋友最鍾意係拉呢個繩袋，將物件運上最高點，呀芊，你運咩上去呀？
呀芊：「BB呀！」(滴汗ing...)
不過最洗版的就係呢個兩層高樹屋，下層就係沙池，不過並非用上真沙，全部都係木粒鋪成的，木粒仲要係由韓國訂製番嚟， 係香港首次引入。
爬上去上層仲可以有屬於自己嘅小天地
整個區域配合埋外面射入嚟嘅光線，真係感覺好和諧好舒服！
在玩樂區旁邊有個 LEGO 及英文字母磁石牆
當然叫呀芊砌番自己個名，順手當練吓佢眼明手快啦
連 Origami 負責人都讚呀芊個英文名好好聽！ ^>^ 這下要俾個 Credit 老婆「改得好！」
餐廳內設有洗手間，同用餐區有一段距離，非常乾淨！除咗男女厠外，仲有哺乳房及兒童洗手間，避免要小朋友同大人共用洗手間，十分周到。
女洗手間就唔影啦！同埋如果我影得到，你都應該見唔到我出文喇！
返回近正門那邊是廚房區，超市和廚房仿真度極高囉唔該，呀芊見到真係當自己去買餸煮飯，從未見佢玩煮飯仔可以咁開心，今次真係「芊姐去Shopping」。
呢兩件火龍果，連我工人日買夜買，當佢睇到呢張相知道火龍果係假之後都即刻嚇親！
希望佢大個時侯可以煮番餐我食吓啦！
在真假廚房之間的一個小空間多功能房，可定期舉辦不同的活動和工作坊，亦可包場當開 Party 用，不過今日 Grand Open，大會就安排咗導師喺度教小朋友做小手工。
好俾心機去製作佢幅小畫作
呀芊大功告成！
玩咗咁耐都係時侯番埋位，因為 Origami 的開幕儀式就快開始
枱上已經準備咗前菜及些飲品，
小童 餐具仲好得意
就算小朋友掛住玩唔食嘢，有呢套咁得意嘅餐具拎住，都會開心到係咁食。
呀芊話呢碟前菜嘅雞好食到不得了
難得有幸被邀請到現場一齊慶祝開幕，梗係要影番張開心到跳起嘅相，嚟形容我依家呢一刻嘅心情。
原來大家仲可以參加會員計劃，分別有 NEMO、DOLPHIN 及 WHALE 三個級別的尊貴會員
始終是一間親子餐廳，「玩」這一 Part 真的不錯，不知道「味」這方面又點呢？
其實坊間好多親子餐廳都係重「玩」不重「味」，所以好多時對食物要求都勉勉強強過得去就算數
但係紙飛機有見及此，專誠請來曾於上海小南國及出身香港米芝蓮一星酒家的修建林師傅主理，提供精緻時尚的江浙菜
不講都唔覺，紙飛機係全香港第一家以中菜為主打的親子餐廳。
食到好飽好飽，最後呀芊好想番去木粒池玩，所以就俾佢玩多陣先至離開
聽負責人講，夏天時候，戶外平台公園靠近餐廳的位置，仲會放置外國甚為流行的藍色大積木(Big blue blocks)，小朋友可以自行組合自己喜歡的大型遊樂設施。
仲會貼有賽道，等小朋友可以盡情飛滑板車，而且仲會舉行親子主題的市集。嘩豐富到「貢」！
Photo by CANON 5D Mark IV, Len | EF 16-35mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分: 10分
呀劍評語: 我好喜歡 Origami 的理念，「紙飛機」就是對童年來說是一種「簡單」，是一種「純粹」，不要那麼複雜，不要那麼多顧慮，自由的飛出去尋找自己的夢想。不論「味道」及「玩樂」都同樣出色，看見每位員工專心地做好每一件事情，令家長及小朋友可以享受一個難忘的用餐體驗。
Origami 紙飛機親子餐廳 簡介
以紙飛機為名，一來是因為餐廳位於前啟德機場，二來紙飛機是簡單純粹的童樂代表，藉以表達餐廳理念，希望小朋友的玩樂可以像摺紙(Origami)這門藝術一樣，返璞歸真卻包含無限可能性。
紙飛機由幾位理念相同的媽媽共同創辦，希望為自己的子女建立一個自然快樂，充滿想像力的空間,同時也為其他家長，提供一個大人和小朋友都喜歡的親子場所。紙飛機位於啟德郵輪碼頭頂層花園平台，餐廳室內面積近 4,000 呎，外加 230,000 平方呎的戶外平台公園。
地址
九龍灣承豐道 33 號啟德郵輪碼頭 B 區北面頂層(R)平台
預訂電話
6063 7470
營業時間
10am—8pm
入場費
小童
星期一至五 $138/兩小時(每小時追加$60);
週末及公眾假期 $198/兩小時(每小時追加$80)
12 個月以下嬰兒及成人免費
交通
綠色小巴 86
由九龍灣地鐵站開往郵輪碼頭。B 區電梯上花園平台層。
泊車
郵輪碼頭提供 113 個時租車位。
開放時間：由早上七時至晚上 11 時。
收費：星期一至五 每小時 $10。星期六、日及公眾假期 每小時 $15。
累積瀏覽 585125
全部攻略 319
全部回應 118
Origami Kids Cafe
CANDY PARK
Aries BBQ PartyRoom
香港競技場
Paragon Club
G-fit
Party Ideas HK
Funhouse