帶著 BB 去沖繩。2018。11月。國際通。宜野灣飯堂。Aeon Mall (Day 4)

27.11.2018

小地勤今次住在美榮橋附近 , 由酒店行去國際通只係一條大路 , 約 15 分鐘就到 . 國際通是手信街 , 亦係那霸市最旺的地方 , 點都要帶老爺奶奶過黎行下買下野 .

正當小地勤同奶奶係藥店尋寶時 , 老公帶左 BB 去大街到影相 . 藥店的確唔太適合同老公去 !

每次黎到 Calbee 專門店都會係到影張相 , 因為佢最搶眼 . 對面有個商場 , 又轉手了 , 印象中係轉第 3 次 , 依個地段咁旺都做唔長 .

另外 , 那霸依幾年改變好大 , 以前 5 點多就人影都無個 , 現在開了不少 24 小時店 , 仲要手信店都開到成 9 點多 . 同香港一樣 , 好多店改左做藥店 , 亦突然多左好多酒店 . 這都是花花航空作出的貢獻 , 花花一日最少有 2 班航班飛去沖繩 , 重點係機票大平賣 , 帶旺了這個地方 .

又係親子裝的時間 , 旅行時 , 老公最愛著到一模一樣 , 驚死會走失咁 !

由頭行到落尾 , 有一間小型的 Aeon 近住牧志 , 是一間 24 小時的超市 , 平日小地勤住開個邊時 , 就每晚都係個到消磨下時間 . 去到日本 , 總有無限精力 , 仲總愛吃雪糕甜品 .

午餐在宜野灣飯堂解決 , 每人一個餐 , 海鮮飯的海鮮多過飯 , 我老爺大讚又平又抵 . 的確 , 抵食先會一食再黎 .

永遠都係以小為尊 , BB 食完先到小地勤食 . 小地勤吃飯時 , 老公就帶左 BB 出去望海 . 原先想帶 BB 去波上宮神社下的海灘 , 比佢試下踩沙同踢水 . 可惜同行人大多 , 計劃仲有阻礙 , 唯有等下年再來 .

午餐後就到附近的 Aeon Mall Shopping . 小地勤都只買 BB 野了 , 當媽後更沒時間打扮 , 不要緊 , 為左你 , 我做癲婆也樂意 .

Aeon Mall 內有個大魚缸 , BB 很喜歡看魚 , 所以係到花左好多時間影相 . 小朋友天天都在長大 , 樣子也一直在變 . 初出生時 , 他跟爸爸一樣小眼睛 , 大大下就越黎越似我小時候的樣子 . 希望老公唔好傷心 , 哈哈 ...

係 Aeon Mall 的玩具反斗城買左好多 BB 食物 , 當中我最推介係 85 Yen 一包的即食粥仔 , 用熱水浸暖就食得 . 最適合唔識煮飯既小地勤 . 去日本真係唔洗帶太多野 , 四圍都有 BB 野買 , 仲一定平過香港多多聲 .

最近係網上 , 就見到網店賣 HKD 35 , 賺到笑吧 . 日本買才 HKD 5 .

小朋友大得快 , 所以我都無買咩衫比佢 , 多數著二手衫 . 來到日本 , 小地勤就專係特價區尋寶 . 300 Yen 2 件短袖衫 , 男仔著咩都無所謂啦 . 女仔就話要打扮下姐 .

老公每次黎都要去幫襯雪糕菠蘿包 , 其實我覺得一般般 , 不過 5 , 6 百 Yen 咪食下囉 .

老公好鐘意夾公仔 , 好彩今次同個仔一齊 , 阻住佢玩 . 無得夾 , 都要入去行一圈 , 趁我去買 BB 野 , 就帶埋個仔入去見識下 . 大唔透爸爸 .

老公旅行前買左依件波衫比我 , 話特價 99 蚊 , 但日本賣成 5 百幾蚊 , 睇黎佢都係呃我架啦 . 邊有可能大特價 !

係 Aeon Mall 逗留左 3 個多小時 , 我們便回程了 . 雖然小地勤來過沖繩十幾次 , 但都只係食過一次 Blue Seal 雪糕 . 今次終於有機會停車入去幫襯下 . 試左個聖誕限定版 , 比起超市買的雪糕 , 佢無冰得咁厲害 , 所以比較好味 , 但價錢又唔算好抵 . 不過黎到沖繩 , 都值得試下 .

返到酒店 , 奶奶放我地去拍下拖 , 我兩就回去神德拉麵幫襯下 . 某年食過一次之後 , 就次次都去食 . 老公話好食過通堂拉麵 . 我已經記唔起同堂的味道 , 但如果好食 , 通常都會一去再去 . 通堂我就去完一次 , 無衝動再去 .