海洋公園生日優惠 2019

04.05.2019

一直以黎都知道 , 每年生日月可以免費入海洋公園一次 . 對於住係偏遠地區又唔玩機動遊戲的小地勤來講 , 沒有太大吸引力 .

20 年前 , 小地勤去過一次海洋公園 , 當時讀緊中學 , 學校旅行 . 20 年後 , 因為我同老公撞正難得的 :

金絲猴誕下寶寶，5月或6月份出生的港人可於2019年5月1日至6月16日期間免費進園一次

兩公婆同一時間可以免費入場 , 所以決定帶埋 BB 去逛一下 .

原來去海洋公園 , 現在係咁方便 , 地鐵直到 . 好彩我地無開車過去 , 分分鐘想搵位泊車都無 . 輕鐵轉西鐵再轉地鐵 , 印象中轉了 4 次車先到達.

海洋公園 , 人 , 真的很多 , 很熱鬧. 跟沖繩美麗海水族館差很遠 . 海洋公園仲有吊車跟火車 , 小地勤畏高 , 所以我們坐火車 .

轉眼間 , 我的小寶寶已經學會走路 , 不過行到成隻企鵝咁 . 小朋友好似知道自己去玩咁 , 好開心 , 不停笑 . 媽媽好後悔無買依支吹泡泡比你. 睇返相 , 先發現你好似好鐘意咁.

慣左永遠由最入開始玩返出黎 , 所以一黎就坐火車去另一邊行下 . 今日天陰又下毛毛雨 , 不過無阻我地興奮既心情 . 真係好多年無黎過 , 好有新鮮感 .

我地去左睇海獅和海豹 , 因為我真係唔玩機動遊戲的 .

一出去就開始落大雨 , 剛好有表演 . 所以我地去左睇海豚表演 . BB 睇到眼定定 . 對比起 , 我個人覺得沖繩那場表演比較精彩 , 可惜上次 BB 訓左覺 . 我明明記得以前表演是很精彩的 , 現在只有海豚 , 無其餘海洋動物 ?

我地之後去左睇水母 , 鯊魚 , 中華鱘魚 , 但 BB 對大魚及黑既地方 , 很抗拒 . 爸爸又唔想我太攰 , 所以一直抱住 BB . 或許小朋友去到黑既地方 , 還是只能從媽媽身上得到安全感 . 明明之前同佢去鐘乳石洞 , 又黑又熱 , 佢都唔抗拒 , 無理由係怕黑的 ! 應該係爸爸抱既問題 , 哈哈 .

個個都話小地勤瘦得好快 , 因為返工的確好辛苦 , 辛苦過湊仔 ! 唔洗一年就同以前一樣 , 可想而知返工堅辛苦 .

BB 訓午覺 , 我地就坐返小火車返轉頭 , 先行探路 . 我地去左睇金絲猴 BB , 多得佢 , 我地先可以一家三口免費入場 ! 仲睇埋熊貓 , 以及水族館 .

唔知 BB 係唔係都似我又畏高又怕玩機動遊戲呢 ? 個個都話佢似我眼大大 , 白白淨 , 哈哈 !

佢依覺訓左 2 個半鐘 , 當 BB 起身 , 爸爸話要同佢去玩小遊戲 , 坐小火車 , 摩天輪以及旋轉木馬 . BB 好似呀呆咁 , 無咩反應 ...

海洋公園當中 , 我最喜歡香港舊街 , 以前的香港 , 感覺人情味很重 , 大家很窮 , 但很知足 , 亦無咁多怨氣 . 今時今日的香港 , 已經回不到從前了 .

再去多轉水族館 , 因為 BB 喜歡睇魚 , 但佢只喜歡細魚 , 太大既魚 , 佢好似好驚 .

望到眼定定的小孩 . 點解大得咁快 . 每個媽媽都唔捨得 BB 大 , 又想佢快 D 大 , 好矛盾 .

我地玩到 7 點半先返屋企 , 返到屋企已經 9 點幾 . 今日行左好多路 , 好攰 , 但好似去左一轉短途旅行咁 , 好開心 .

雖然尋日返工受左好大既氣 , 工作包埋做別人出氣袋 , 但份工又的確有佢既好處 , 珍惜仲有機票的日子 , 希望可以帶 BB 睇多 D ... 下一次再寫日記 , 應該係寫北海道旭川動物園 . 好期待我的 9 日大假 !