平時去酒店食High Tea 幾多錢都好，都係為咗食個景，食物質素好但又唔代表食材好矜貴。今次食呢間，有景、有質素、有高級食材，絕對物超所值。
第一次帶媽媽去新商場 K11 Musea 行下，經過呢間好靚既餐廳「Glasshouse Greenery」就入去試下。
我哋點咗兩份「華麗寶盒下午茶」
![]()
![]()
食材相當矜貴，賣相擺盤都好吸睛。
頭盤先嚟一個「頂級魚子醬配迷你鬆餅及配料」
冰鎮着嘅頂級魚子醬別具氣派咁出場
迷你鬆餅的的式式好可愛，口感似鬆餅加熱香餅，細細件加埋準備好嘅配料同魚子醬一齊食，一啖一件啱啱好。
「頂級意大利凍肉拼盤」擺盤佈局得好靚，有唔同種類嘅凍肉同埋芝士，包埋一齊食好好味。
呢杯細細杯嘅其實係「黑松露雜菌濃湯」，唔好睇佢細細杯，其實相當濃厚，勁香濃嘅黑松露味，一杯實在唔夠喉。
精選迷你多士有兩款選擇
1. 頂級和牛多士
2. 香煎法國鵝肝多士
因為同媽媽食，唔想佢食太多鵝肝咁高膽固醇，所以選擇咗頂級和牛多士。香脆多士夾著厚切和牛，一啖一件，夠晒過癮。
最後就係甜點啦。「精選蛋糕首飾盒」，勁大勁蛋糕呀。一般食下午茶，甜品都係好細件迷你版，但係呢度係大大件，夠晒滿足。仲有四款口味俾你品嚐。
分別有
1. 冧酒黑朱古力（香濃黑朱古力，勁幼滑）
2. 青蘋果白朱古力
3. 清甜芒果味（口感豐富多層次，好味）
4. 清新柚子味
飲品可以選擇香檳或鮮榨是日果汁。
我哋揀咗鮮榨雪梨汁，好清甜。
仲有咖啡或茶，不過食到尾聲唔記得咗叫了。
驚唔夠飽可以叫多個飯，「蜜汁炭燒黑豚肉鵝肝煎蛋飯」，食到尾聲其實已經好飽，但係都忍唔住試咗呢個飯，個鵝肝超級好食，入口勁香勁滑勁濃，那股香濃味道在口腔中久久不散，極之回味。
今餐非常之滿意，媽咪都食得好滿足。
「華麗寶盒下午茶」$388 位
Glasshouse Greenery (Victoria Dockside K11 Musea) (尖沙咀)
尖沙咀梳士巴利道18號Victoria Dockside K11 Musea5樓501及503A號舖
