本來只係諗住去雜貨店買片糖整蕃薯 , 唔知點解無端端想買多包黃豆，雜貨姐姐問我今日買黃豆想整咩 ???
平時都同呢個姐姐有一兩句計傾 , 不過我個答案係 : 其實我未諗到，買左番去先算 , 其實用黃豆最簡單的烹調方法就係整豆漿 , 整一大支豆漿可以俾袁生食早餐的時候飲 , 而且豆漿仲可以用黎整豆腐花添 , 豆腐花簡直係袁生至愛，每星期放假袁生一定要整番碗 , 出街買的話，咁不如自己整 , 另外整豆漿一定會有豆渣剩低 , 以前的我一定會將豆渣掉晒佢，而家諗番起真係覺得好浪費 , 因為豆渣好有益架，仲好健康
所以就決定整個豆渣餅食，咁一包黃豆就有三種食法 , 又好味，又可以廢物利用，一舉三得 !
黃豆三吃
材料(豆角煙肉豆渣餅) : 豆角<半斤>，煙肉<4片>，豆渣<適量>，洋蔥<半個>
調味料 : 生粉，糖，黑胡椒粉，鹽<少許>
做法 :
1. 豆角，洋蔥，煙肉切粒
2. 燒紅鑊，爆香洋蔥至金黃色後加入豆角，煙肉蒜香盛起
3. 豆渣放入鑊中加適量水煮至收乾，盛起加入豆角粒，洋蔥粒，煙肉粒，調味料拌勻，做成一個個餅形放入鑊中煎至兩面金黃色即可
***********************************************************************************
材料(豆漿) : 黃豆<1包>
，冰糖<適量>，魚袋<1個>
做法 :
1. 黃豆洗淨加水浸6小時
2. 將浸好的黃豆加水放入攪拌機內打爛
3. 將打爛的材料放入魚袋隔去豆渣，豆渣再加水攪勻後，再放入魚袋再隔渣，重複此步驟4-5次
4. 將隔去渣的豆漿煮滾加適量冰糖調味即可
***************************************************************
材料(豆腐花) : 熱豆漿<500ml>，石膏粉<1/4茶匙>，生粉<1/2茶匙>，水<100ml>
做法 :
1. 將石膏粉同生粉拌勻後加入水攪勻
2. 將熱豆漿撞入粉漿內，倒入時盡量由高處撞入，撞入豆漿後蓋上蓋等約20分鐘
3. 撇走豆腐花上的泡泡
4. 另外將冰糖加水煮成糖水，淋在豆腐花內，再加上適量黃糖即可
感謝 袁太廚房 提供以上資料
個人日誌: http://elanie-kitchen.blogspot.hk/
