午餐同老公在稻香

完工差唔多十多日，每日都好似好忙， 呢個星期老公又開始放大假，今日同老公出咗九龍灣宜家睇下，太耐無出去行，以前初開時mega box 好多人同免費車過嚟，而家只得一架去九龍灣，行完買咗嘢諗住出返官塘飲茶，但已經差唔多3點怕出到去都收市，咁喺九龍灣行下睇下有咩食，點知見到有稻香就入去飲下午茶，我哋二個好似大鄉里，攞咗位時比咗包茶葉我哋就入去，伙記只問幾位後放咗碗碟，原來自己沖茶喺手機點嘢，我未試過酒樓咁先進，就問攞點心紙，她就話喺手機，搞咗好耐都唔得，原來出面未開枱等咗一陣就scan後點嘢，跟住見無水又叫人原來按制就自動加水同煲滾，真係好大鄉里，2公婆不停喺咁笑，之後又搞唔掂個機又down咗，原來禁得唔好死咗機，又叫人嚟搞咗好耐先搞掂，我哋叫咗5樣點心閒日真係好抵，如果正價應該唔太平，全部點心計小點17蚊，茶位應該十蚊一位，今餐食咗120老公話值得見識好多嘢，啲點心都好好味

呢套茶具，一邊喺自動入水同煲滾，另一邊就沖完後可直接倒入去

環境都幾好，好鬆動都隔得幾開

呢個喺鳳爪拼排骨

嬰花蝦脆腸粉好特別

呢個好似過大禮有四款點心，好多人行過見到都話好特別好靚

呢個喺尊點花膠雞粥都好足料

好少酒樓會各自2對筷子喺下午茶時段，而家呢個疫情更方便好難得