順利完成一個月的陪月工作

時間過得好快今日又last day啦，每次完工都好唔舍得，短短的一個月好開心，BB 都好乖由唔夠6磅的人仔，滿月已經有8-9磅，食得好瞓得好自然好長肉，回家時腳仔無咩肉而家就脹卜卜好得意，公公婆婆好錫呢個孫女，每日都影好多相，婆婆咩嘢都識BB又乖搞得掂就唔需要加長，喺度祝她們一家健康幸福，BB越大越可愛，聰明健康活潑，多謝她們的信同大利市，喺疫情下大家都好小心，而家工作比以前辛苦因為疫情做的準備工夫又多咗，每日入屋後喺門口先做快測，無事就換衫開工，雖然路途搖遠自己都一早出門盡量早到，每日時間都好緊迫還要浪費25-30分鐘去做測試，但都無法每個要求都唔同做咗安心就好，換完衫先清潔奶樽通常都好多，之後就準備湯食午餐就可以飲，因為我開工第一日就係工人姐姐last day, 見無咗姐姐又唔想公公婆婆自己另煮就午晚餐都預備埋她們，就更加忙午，晚餐都3個餸，下午茶燉湯我通常都配小食比媽咪，因為人多所以我就多數整容易同大份量，好似炒粉麵，餃子，薄餐...等，BB 好乖所以啲時間都好好用，每日雖然好趕但都唔洗搞到7點幾先收工，除咗頭2日好遲，好多時都6點幾就收得，雖然收5點半但好難會準時走再，6點收得就好好，收工前果個星期更忙，因為準備湯包，炒米茶包比個媽咪繼續補足100日，希望她有個健康的身體，還教她們幫囡囡沖涼，婆婆都話學好開心搞掂一齊安心完工

滿月的午餐，食咗笑哈哈的茄汁蝦，甜甜蜜蜜的蜜糖豆

送比BB同媽咪的紅雞蛋同蛋糕祝她們幸福滿滿

其中下午茶的蝦腸同菜苗豬肉腸

其中一晚的晚餐-金銀蛋紅莧菜，蒸馬頭同蟲草花杞子元肉蒸雞

其中的午餐

咕嚕排骨

蝦滑釀翠玉瓜

Last day婆婆幫我同BB影

滿月要出去前媽咪幫我同BB影多謝我送的紅雞蛋

婆婆的精心作品配合表情多多的BB