由 漂泊中的魚 於 2008-09-20 00:00:00 發表 | 累積瀏覽 1157
中秋節之時, 朋友的媽媽送了一個自家種魚翅瓜俾我, 要趁去旅行前趕快吃掉, 所以今日煮了這道菜 !
哈, 魚翅瓜聽就聽得多, 食呢, 都好似只係食過一/兩次, 見呢, 好似完全冇印象, 講到煮, 就更唔知點落手囉 !! 望住手上成個西瓜咁樣的, 即刻上網搵下料, 得知佢基本上都幾易搞的, 咁我就先處理好個瓜先啦 ~
第一難處, 就係呢個瓜的皮異常咁硬, 我出動到"家傳大刀"都劈佢唔開, 後來為求保護自己隻手, 唯有以刀就瓜, 終於劈出大小極度唔平均的 2 邊出來 !
先拿個瓜去隔水蒸 15 - 20 mins, 等瓜肉熟透後, 先去核, 再用叉係咁挖出一絲又一絲的瓜肉 ! 哈, 話就話叫魚翅, 但我覺佢地似煮熟左的米粉多 d 喎 ! 而且一個小小的瓜, 點會有咁鬼多肉架 ?!
我即時放瓜肉入口試試味, 非常爽口, 但除左青青地的瓜味就乜味都冇, 有點似爽口的粉絲, 我想呢個魚翅瓜都應該可以當粉絲咁用 !!
咁o岩朝早浸左 1 打冬菇, 打算今晚用黎炆的, 為求簡單方便, 炆好個冬菇之後, 用番個汁黎撈 d 瓜肉, 再隨意煮番幾分鐘當加熱, 最後將冬菇放面, 咁就搞掂 !
下晝仲煲番個老火菜乾排骨湯, 非常足料 !!唉 ~ 呢排又燥又虛, 加上冬天將至, 是時候補充番下啦 !
