我好鍾意叫朋友上我屋企食飯, 今晚就約左一班朋友上黎, 預早慶祝中秋節嘛 !
菜式都幾豐富架, 3 個菜 : 蒜蓉豆苗, 南乳炆鴨, 蝦丸釀豆卜 再加白飯 ! 因為要炆鴨, 所以冇 capacity 煲湯, 朋友又唔記得左買湯丸, 有少少唔完美咁, 不過呢 3 個餸應該都可以令大家食得好滿足架啦 !!
我都幾滿意今晚的作品, 順手 post 埋點整呢個南乳炆鴨啦 ~
==============================================================
早排見 Supermarket 的全鴨有特價, 就想想試下煮鴨, 咁o岩早排阿媽特登係 HK 偷運左 一樽南乳俾我, 就更加想試下炆鴨啦 ~
我好鍾意食用南乳煮的野食, 婆婆農曆新年時煮的齋啦, 家常南乳雞翼, 蓮藕炆豬肉 …. etc. 英國唔係買唔到南乳, 但 Quality 真係唔得呀, 得個咸字, 又唔香 !! 忍唔住同阿媽講聲, 佢就特登去九龍 d 豆品舖買左 4 磚, 再入落一個空樽咁寄俾我 ! 嘩 … 未煮只係聞下, 都知係正野 !!
今晚南乳炆鴨, 材料有 : 鴨一隻, 豆卜, 冬菇, 枝竹 同 Garlic
全鴨一隻, 洗淨同擦乾水, 係英國買的就一定要清好晒 d 毛, 佢地洗得太求其啦 ~
Then 切件, 不過我好怕食到碎骨, 所以我直頭手起刀落咁成隻起晒肉, 連上脾都起埋, 全碟只係得 4 條腿骨, 至於個骨架同副內臟想用黎煲湯, 但未諗到煲乜… 切鴨時記得去 Pat Pat 同多餘的皮, 鴨真係好鬼油架, 我第一次炆鴨, 唔 sure 去晒皮會唔會太乾, 所以留番 d 係度, 結果炆時成層油, "畢" 極都仲有呀 !!
將發好的冬菇切件, 拍碎 Garlic. 先開鑊爆香 Garlic, 放入冬菇炒香, 再放入鴨件. 當鴨肉炒至轉色時, 加入南乳 (連汁), 生抽, 糖, 麻油, 酒, 蠔油, 炒勻後放入一粒冰糖 (阿媽教煮南乳一定要落粒冰糖, 我唔知點解, 但確實會好食 d 架喎 !)
當冰糖溶好, 就可以加水開始炆, 呢個時候先放入豆卜一齊炆 … 慢火 1 hr. 我早煮呢個餸, 所以 1 hr 後熄左火由佢焗住係個煲內. 到黃昏開始煮其他餸時, 先再開番火, 加水, 放入枝竹再炆直至上菜 ! 枝竹係非常吸水架, 所以加左入煲就要 Keep 住夠汁, 唔係會煲濃 !
嘩 ! 呢道菜完成啦 !! 真係好入味又好"送"飯呀 !! 有少少美中不足係 d 鴨炆耐左有 D 實, 所以下次我決定先炆再切件 !!
