莎拉同陶寶B點樣渡過2013至2014呢?! 咪就係患病中渡過呢! 除夕夜(2013/12/31)陶寶B有少少咳及低燒, 所以就帶咗佢去睇家附近的家庭醫生, 當晚食藥過後都沒有大問題, 只係仲有咳!
到咗2014/01/01新年第一日, 全日都無咩異樣, 又沒有發燒, 只係開始多咗痰及少少鼻水, 不過都打算第二朝再去睇醫生. 到咗夜晚瞓覺就開始有發燒, 餵咗佢食退燒藥, 點知再到咗夜啲就聽到佢呼吸時"heeheehaahaa", 莎拉仲以為佢只係有痰係喉嚨度.
點知早上(2014/01/02)起身時, 陶寶B已經失聲了!!!! 莎拉就立即帶陶寶B去法國醫院睇門診啦, 嘩,,,真係多人都爆, 從來都未見過門診會多人都咁, 前前後後等咗3hr先見到醫生, 醫生一聽到陶寶B把聲及呼吸聲就話係"嘶哮"(croup), 需要立即入院治療, 因為嚴重既會出現呼吸困難, 可大可少 (大意既莎拉之前仲以為係咳不出痰呢, 而家諗起都一額汗).
安排上病房前先去治療室聞氣, 陶寶B起初見個氧氣罩出啲氣唔知係咩嚟隻手想拎起個氧氣罩, 不過之後都乖乖聞完啲藥. 上到病房姑娘一探熱, 原來陶寶B發高燒中, 要快快沖涼及塞藥降溫. 搞完一輪之後, 就到姑娘抱咗陶寶B去係手度整"豆豆"用嚟打點滴及落藥, 期間仲要抽血, 攞鼻水, 留小便作化驗. 唉~~~莎拉企係間房出面聽到陶寶B係度用緊餘既聲音係度大叫大喊, 真係好心痛. 過咗15分鐘後, 姑娘話陶寶B好大力, 好似同佢係度大戰一樣. 可憐既陶寶B真係喊到聲都沙埋呢, 餵完佢食奶之後, 終於佢可以瞓吓覺休息吓.
係醫院內, 一時就要食藥, 一時又要探熱/量度含氧量, 再唔係就又要聞氣, 所以陶寶B一見著白衫既姑娘/醫生就大喊. 晚上莎拉就留係醫院陪陶寶B, 不過深夜又再發高燒, 加上呼吸好唔暢順, 所以瞓得非常不好, 差不多抱住佢瞓到天光呢!
過咗一晚之後, 早上(2014/01/03)醫生巡房, 醫生見陶寶B因為呼吸好暢順而瞓得唔好, 就建議安排在床度加個帳篷在內加濕, 因為增加空氣濕度可以舒緩呼吸困難, 等佢可以瞓得好啲. 嘩嘩嘩, 跟手就有幾位姑娘來Set個帳篷, 真係好誇張呢, 不過陶寶B在帳篷內玩及瞓覺時又真係好似舒服啲呢, 不過陶寶B都係依然精神麻麻地.
到咗傍晚時份, 醫生就來通知陶寶B既化驗結果顯示佢感染咗甲型流感(H1N1), 所以要立即轉送去公立醫院隔離. 莎拉一聽到要隔離, 個心立即沉一沉, 因為好擔心係好嚴重, 不過姑娘就安慰我們不是特別嚴重, 因為今日之內, 法國醫院的兒科已經有幾位小朋友都係感染咗甲型流感而轉去公立醫院隔離.
謝菲搞好切手續(即係埋單)之後, 醫院就安排了救護車送我們去QE醫院. 莎拉今次係第二次上救護車(第一次係自己5歲既時候), 因為只可以一人陪同, 所以就只有自己同陶寶B在車上, 在救護車上, 救護員問了一大堆有關病歷及患病經過, 而因為陶寶B有"嘶哮", 所以就要開咗個氧氣罩放係陶寶B個鼻附近, 以防萬一. 好快就去到QE急症室啦, 多人都可以用人山人海嚟形容, 坐了唔夠5分鐘就叫名去分護士流站啦. 同護士又再一次講述病歷及患病經過後, 因為陶寶B有"嘶哮"加上已確認係甲型流感(H1N1), 所以護士好緊張Call晒電話係咁講"紅旗紅旗紅旗", 之後就叫莎拉同陶寶B立即入去急症室的房見醫生.
入到去見到急症室醫生及2位護士, 佢地好緊張立即Set up個氧氣罩俾陶寶B, 想幫陶寶B量度血含氧量, 雖然莎拉已經抱住陶寶B安撫佢, 但係依然受爭扎一輛先可以度到. 莎拉又一再同醫生講述患病情況之後, 雖然陶寶B現在呼吸及血含氧量正常, 但係醫生都當作係Urgent case, 所以護士再打咗幾個電話,不斷講"紅旗紅旗red flag red flag", 之後就好緊張咁推咗一張病床, 叫莎拉抱住陶寶B上病床, 而莎拉既任務就係盡量令陶寶B calm down, 因為佢一激動就會"嘶哮". 雖然陶寶B其實表面好似沒有問題, 但係因為相信係"紅旗red flag" case, 所以在推上9樓隔離病房的途中, 急症室醫生及護士都帶整所有急救用品一起護送上病房. 好似打衝鋒咁上了9樓兒童隔離病房後, 我們就被獨立安排在一間隔離病房!
經醫生檢查及相討後, 就可排陶寶B服食特敏福及用類回醇(對付"嘶哮"問題). 打完針, 食埋藥之後陶寶B終於都乖乖瞓咗啦, 望一望個鐘原來已經11:30pm, 莎拉同謝菲都未食晚餐呢. 莎拉快快手咁食咗個7仔既叮叮飯(好似20多年都未食過叮叮飯了), QE既兒童病房可以留一位家長過夜, 不過就唔似法國醫院或廣華醫院咁有張單人梳化床, 佢只得3張硬櫈, 所以莎拉就拍埋3張櫈就瞓啦, 可能因為前一晚沒有怎樣瞓, 所以好快莎拉都已經瞓咗.
第二天(2014/01/04), 陶寶B把聲及呼吸已經明顯有改善, 加上已經再沒有發燒. 可能已經差不多2日沒有食嘢既關係(之前只係飲奶), 所以佢好乖乖咁食咗一碗粥呢.
隔離病房內有電視(仲要係數碼電視, 可以自己轉台)仲有洗手間, 所以真係同私家病房沒有大分別.
今天陶寶B好精神, 明顯地同前兩日完全唔同, 所以莎拉都放心好多啦. 醫生巡房後同陶寶B康復進度滿意, 如果再觀察一晚都沒有發燒的話, 明天都可以出院. 莎拉帶咗啲玩具, 書仔及ipad, 所以陶寶B都不愁寂寞.
星期日(2014/01/05), 醫生巡房後就簽紙俾陶寶B出院啦(Yeah!!!!)
莎拉連續4晚都沒有瞓過真正的床, 雖然瞓咗一晚第二朝都仲係好攰呢, 最後莎拉都"射波"了!不過真係懶有懶著, 法國醫院打來話陶寶B既鼻水板本報告出咗, 所以要帶陶寶B反去門診見醫生. 原來陶寶B當時除了感染了H1N1, 仲有"金黃葡萄球菌"呀, 所以要食Antibiotic!
醫生話正常身體健康時係唔會感染金黃葡萄球菌, 但當身體有病, 抵抗力差時就會感染, 好多時染上流感引至嚴重到入深切治療既有部份就係因為咁樣原因, 同一時間身體有兩種病菌入侵.
後記: 大家唔駛擔心陶寶B, 經過一個星期時間乖乖在家休息, 已經完全康復啦. 不過呢排啲流感真係好勁, 唔好話小朋友, 就連大人都好容易中招呢, 所以大家要小心啲呀, 病咗先嚟過年就唔好啦.
感謝 莎拉蛋糕 提供以上資料
莎拉蛋糕的網誌 http://sarahcakeblog.blogspot.hk/
