未結婚未有小朋友時, 一直覺得麵包機呢一樣電器係極度無聊, 因為買麵包咁方便, 麵包又唔係貴喎, 買嚟把鬼咩. 哈哈, 宜家莎拉終於知道點解要買麵包機啦, 原來就係因為想小朋友食得健康. 最大推動力其實係因為陶寶B呢一排餵飯有時好扭計, 但俾麵包佢食就自己食得好好喎, 加上遲啲會慢慢早餐都俾包類佢食, 咁如果買出面既軟包, 又要買啲比較靚既麵包, 一來價錢真係唔平, 二來始終自己動手整一定健康啲, 所以就最後都買咗部P牌麵包機啦.
其實平時返工, 莎拉都會為自己及謝菲準備三文治做早餐, 雖然未至於日日都整, 但起碼五日內都有三日, 所以一星期都會買一至兩次麵包, 所以呢部麵包機自己一星期整兩次都真係唔會浪費呢. 麵包機價錢$16xx, 仲再送3盒麵包粉, 所以一回家就可以試機架啦.
好啦, 新機落地, 就跟住說明書內既做法, 用普通麵包程式差不多4小時之後就可以架啦. 莎拉晚上就將所有材料放入機內, 設定好預定時間, 第二朝早上就被香噴噴既麵包味整醒啦, 唔係誇張真係全屋都充滿焗麵包既香味架. 第一次就試整提子麵包, 打開麵包機, 脹bokbok既麵包呼喚緊"食我啦食我啦", 一切開真係好軟熟, 熱鬧鬧香噴噴既麵包真係特別好食呀.
今日我地就搵嚟客席食家"陶瀾"嚟試吓莎拉既第一個自家麵包.
陶瀾: "
好有麵包既麵包味, 新鮮熱鬧好好食."
第一爐麵包好快就KO晒, 所以第二輪就試回original既白麵包及抺茶牛奶麵包. 用自家焗既白麵包整份蛋治再加杯coffee, 真係無敵早餐呀.
兩款麵包都可以放約1-2日, 不過到第3日麵包就開始好乾啦, 上網search過原來可以試加湯種增加柔軟度, 睇嚟莎拉要努力硏究吓先得啦.
感謝 莎拉蛋糕 提供以上資料
莎拉蛋糕的網誌 http://sarahcakeblog.blogspot.hk/
