加拿大親善之旅 - Montreal Day 2

Montreal Day 2

今日一早相信都係因為時差問題, 所以陶寶B又係好早已經起身, 不過情況已有改善, 大約6am起床. 不過摸一摸陶寶B個頭, 好似有少少與, 探一探熱有少少發燒(38.5C). 好彩出門時都有帶定啲退燒藥及散熱貼, 所以先餵陶寶B食咗退燒藥先.



發燒既陶寶B無晒心機, 連一早出去散步都唔多願意. 而期間莎拉都諗緊佢同上網Check吓發燒既原因, 最後估計有兩個可能性, 第一就係支1歲預防針引起既反應(因為剛係一星期前打針, 而出現發燒及出疹可以係12日內出現), 第二就係出玫瑰疹.



暫時都無咩可以做, 唯有俾陶寶B休息吓, 睇吓佢發燒既情況先再算, 所以今日所有活動安排取消呢. 唔緊要啦, 當係調較時差休息吓.
 
襯陶寶B食咗藥瞓覺時, 大人們就開食午餐. 雖然無得出街, 所以莎拉既弟弟就出去買我地既Favorite--->越南粉. 莎拉真係覺得Montreal既越南粉係好味過香港多多聲, 因為Montreal有大量既越南移民, 所以佢地做既越南粉係非常正宗.



雖然係買外埋回家, 但係細佬都整到好似係出面食咁樣. 味道當然係莎拉同謝菲懷念既一樣咁多食. 而講到份量, 真係好足夠, 啲料係鋪到滿滿的, 食每一啖既粉都有配料, 真係好滿足. 越南粉真係莎拉既Comfort food, 每次食完都係覺得好舒服呢.

除咗有越南粉, 仲有粉卷及春卷, 兩樣都同樣好味呀.


 
大人食飽之時, 就到陶寶B起身啦, 探一探熱已經退燒, 希望唔好再燒返啦.



因為今日係星期六, Shopping mall 5pm就關門啦, 所以唯有去行supermarket買番啲嘢飲for今晚BBQ啦.



因為莎拉好懷念係backyard bbq既日節呢, 所以細佬及媽咪特別準備. 哈哈哈, 今晚莎拉真係又係咩都唔駛做, 等食一族.