陶寶B回鄉記

每一年莎拉娘家既傳統都會返大陸過新年, 而今次係陶寶B既第一個農曆新年, 所以就試吓第一次帶佢出門啦. 同BB出門真係好多嘢準備, 雖然只係3日(實情加埋只係48小時)既行程, 但係就足足拖咗個大喼, 因為衫又要帶多啲作後備, 又要帶佢既玩具, 紗巾及口水肩帶咗N條, 仲有重點係帶咗2支水用嚟開奶及整粥仔, 避免出現水土不服.

平時莎拉去番禺都係搭直通巴士, 但係車程都要差唔多3.5HR, 而今次因為帶陶寶B同行, 所以就改搭船, 因為一來行程短啲, 二來萬一陶寶B扭計, 莎拉都可以企起身氹陶吓寶B.

大年初一搭下午16:15船, 所以就之前沖定涼先出發, 而為咗方便上落及減輕行李, 所以今次出門就無用BB車, 反而就同用i-angel 既hipseat carrier. 陶寶B出發啦, 入咗閘等落船中, 陶寶B頭望望四圍look.



莎拉就負責孭陶寶B, 而呢一大喼行李就交俾謝菲啦.


可能係年初一既關係, 搭船既人唔多, 直情係包船咁, 陶寶B你就威威啦, 第一次出門就好似包船咁.


全程1.5hr, 陶寶B就瞓咗差唔多1hr, 所以時間都過得好快, 莎拉仲可以玩到candy crush添!!!


終於都到岸啦, 不過同陶寶B過海關就發生咗段小插曲呢, 平時都知帶住小朋友過關係會耐少少, 但係當到莎拉同陶寶B既時候, 足足用咗成2分鐘, 莎拉心諗無理由咁耐架, 原來陶寶B既中文名內既"鋑"字出現問題, 因為如果用簡體中文打呢個"鋑"字係搵唔到架, 所以個關員試咗好耐都搵唔到, 最後佢要用繁體中文先可以打到呢個字呢, (當莎拉回程返香港時, 同樣出現呢個問題, 關員又係試咗好耐先打到呢個字, 今次仲要後面有一大條長龍, 真係樣衰到震), 所以莎拉以後同陶寶B返大陸都睇怕會再遇到同樣問題.

去到大家都等緊我地先開飯, 而陶寶B既外出booster seat又可大派用場啦, 座定定食番佢既至愛sophie. 


可能因為環境陌生及有好多未見過既人, 所以陶寶B都顯得好好奇. 而陶寶B都好叻叻豬, 因為佢絕對唔怕生保, 仲很俾第一次見既人抱抱都唔喊呢, 佢直頭成個親善大使咁.


陶寶B第一晚瞓"生保"床, 之前都擔心佢會瞓唔慣, 好彩陶寶B盡得莎拉真傳, 就係去到邊瞓到邊, 當晚陶寶B仲瞓得好"林", 半夜都無醒過呢.
陶寶B同平時一樣, 8am就醒咗啦, 餵完佢食奶就放咗係張椅度俾佢玩, 咁啱有兩張好大既椅, 將呢兩張椅對住擺就自製咗個playgound俾佢自己係度玩, fit晒呀!!!


今日大年初二, 同嗲哋嚟個格仔父子裝先,好醒目仔!!!


琴日莎拉掛住執出門既事忙到利同是都唔記得俾陶寶B(大頭蝦媽媽), 媽媽祝陶寶B身體健康, 精靈快樂, 開心BABY, 陶寶B接過利是後, 又發揮佢既小吉本式, 想將利是放入口度食咗佢.


好啦, 座車車出發去拜年啦. 莎拉發覺陶寶B好鐘意座車車, 因為可以望住就圍既境物, 可以座大半個鍾頭車都唔扭計呢.



呢日天氣好好呀, 見到啲桃花(雖然唔係真花)好靚呢, 同陶寶B影翻張相先.


玩咗一陣陶寶B又要瞓個覺叉一叉電先, 謝菲嗲哋抱住陶寶B瞓覺, 單手都仲可以玩到Candy Crush, 勁勁呀!!!


瞓醒後又再精靈唔扭計, 見到棵真既大桃花, 都同嗲哋影番張相先!


返到屋企就同陶寶B睇魚魚, 陶寶B都係第一次見咁多同咁大條魚魚呢, 所以佢個樣好好奇.




好彩呢幾日天氣好好, 唔凍之外仲陽光普照, 心情都靚啲!




到咗年初三, 同一大班親戚(成5圍檯)食午飯, 陶寶B再一次証明自己係親善大使, 又係咩人都跟, 真係唔知好定唔好.

食完Lunch之後, 就起程搭船返香港啦, 呢次回程, 陶寶B全程個半鐘無瞓覺, 所以有啲扭計, 想玩想跳, 所以唯有出絕招, 就係攞部Ipad出嚟開sesame street俾佢睇, 不過都係安撫到一陣間咋, 好彩全個船程係1.5hr, 如果再耐啲真係唔知點搞.



後記: 今次第一次帶陶寶B出門, 都可以叫做俾個經驗俾莎拉, 等下次帶陶寶B去旅行時有個預計, 唔會拿手唔成勢, 其實整體嚟講, 陶寶B既表現都唔錯, 係搭船時因好悶而扭計, 所以係呢方面真係要諗諗計先得.