生日晚飯 - 秋田日式鐵板燒

 

話說之前係facebook度曾經見到有啲朋友去咗一間日式鐵板燒既餐廳, 個廚師會用炒飯既材料去砌啲公仔圖案, 好鬼得意呢, 於是就去openrice度search呢一間餐廳, 原來呢間鐵板燒叫"秋田", 再望一望啲價錢, 真係嘩咗一聲呢, 因為真係好貴呢, 無咩特別原因都睇怕唔會嚟食,  所以呢間餐廳一直都係我個"must try" list度.




而謝菲知莎拉一直好"恨"食, 所以就一早神神秘秘book咗呢間餐廳作為我生日慶祝晚飯!!!!

星期五晚, 餐廳內未算多人, 而每一張鐵板燒檯可以座6人, 當晚我個張檯就另外夾咗2pair既couples.Menu內有套餐, 有散叫, 而我地當晚就order咗個套餐, 由頭盤至甜品, 總共有10道菜.


當我地係度正想自拍時, 個鐵板燒師傅就好主動咁話幫我地影相呢, 真係好service呀!



鐵板燒旁邊有糸多隻雞蛋殼, 正正諗緊係咩嚟, 原來係appertizer"鵝肝蒸雞蛋配魚子醬", 一人一客.



一啖食落去, 真係好好味呀, 雞蛋夾住魚子醬及鵝肝嚟食真係好香滑.


而係我地慢慢係度嘆緊個蒸蛋時, 師傅已經開始準備我地第二道菜: 龍蝦.

龍蝦係來自印尼既, 師傅好純熟咁將隻龍蝦拆肉起殼, 燒燒吓時師傅話佢要落酒點火, 真係on fire呀!!!! 龍蝦既味道唔駛點形容, 一個字: 鮮!!! 師傅用龍蝦頭內既膏嚟煮咗個sauce, 真係ichiban呀!!!



再嚟就係鐵板燒活鮑魚, 我都係第一次近距離見住隻鮑魚係咁煮, 隻鮑魚仲係咁係度郁!!! 每人有一隻既份量, 鮑魚加上少量既蒜蓉, 好香呢, 食落就好彈牙呢!!!


嘩嘩嘩, 其中一個主角嚟啦, 就係萬眾期待既 "香煎頂級鵝肝",


唔係講笑, 塊鵝肝真係好厚, 同塊toast真係一比一咁厚架!!! 再次高叫: 膽固醇萬歲!!!!



食完個鵝肝Toast, 有啲"漏漏"地, 飲番個用先前既龍蝦殼煲既高湯, 老實講, 呢個就真係麻麻地, 因為有啲淡, 唔係太飲到龍蝦味呢.



本食個套餐裡面就有個"和牛薄燒", 但係因為莎拉又好想食到個種大大粒cube既和牛粒, 所以就upgrade咗做8oz既澳洲和牛排呢!!!! 師傅燒得好好食, 5成熟剛剛好, 加埋啲好脆口既蒜片, 真係一食落口就唔想講嘢, 因為個牛粒真係好juicy呀!!!!


而呢間鐵板燒其中個gimmick就係炒飯既材料(櫻花蝦, 蔥, 飯, 魚子醬) 去砌啲公仔圖案, 而當晚師傅就對住同檯其中一位client 既 iphone case砌出little twins star公仔呢. 師傅真係好俾心機去砌呀, 差唔多前後用咗成30分鐘呢.
 


生日既朋友當然可以叫師傅寫字啦, 啲字係用雞蛋黃嚟寫架.



真係一定要影番張相呢,,,



大家玩完影完相後, 師傅就真係開始整秋田炒飯啦, 一人一大碗, 加埋個炒翠玉瓜, 食完就真係飽飽啦.
 


當我以為個"精選甜品"係雪糕時(我啱咗一半啦), 師傅就攞出一碗粉漿同一碗紅豆蓉, 哦,,,,原來師傅係整叮噹既"飛彿"豆沙餅呀!!!!

 

除咗有豆沙餅食仲有雪糕呢, 呢兩個dessert真係為呢一晚dinner畫上完美句號呀!!!!

當正想埋單既時候, 待應話送番個birthday cake俾我呢, 真係估佢唔到, 個cake係chocolate fudge, 味道都唔錯呀, 太飽啦, 所以最後都KO唔到個cake呢.


雖然呢一餐真係一啲都唔平(真係食爆呀謝菲個銀包呀), 但係成晚個dinner真係食得好開心, 好似睇表演咁望住廚師為你煮既每一道菜! 加上service都係好好呢, 所以如果有啲咩嘢喜慶慶祝的話, 呢間都係唔錯既選擇呀!