前兩日見到Blog友仔小飛俠既木糠布甸, 就挑起條筋想星期六整呢個甜品, 食住嚟睇會笑到甩轆既香港先生.
呢個甜品之前每次去澳門都會食, 原來真係好容易整架, 真係想食一啲都唔難. 最Surprise係, 謝菲話我近來整既咁多款甜品, 佢最鐘意就係呢個木糠布甸啦 (真係容易滿足呀)!
而呢個食譜係改良自小飛俠, 因為佢原先有可可粉, 但係屋企無, 所以就無加. 而自己就加咗幾滴既雲尼拿香油, 令佢香啲呢!
材料:
淡忌廉 250ml
煉奶 50g
馬利餅 100g (約24塊)
雲尼拿香油 2-3滴
做法:
1) 用攪拌機打碎馬利餅備用
2) 淡忌廉用打蛋器打至7成企身, 然後加入煉奶及雲尼拿香油, 繼續打至完全企身.
3) 在杯內先鋪上一層已打起的忌廉, 之後再鋪上一層馬利餅碎, 再鋪上忌廉, 然後馬利餅碎, 如此類推, 直至最上的一層鋪上馬利餅碎.
4) 放入雪柜約 3 小時即可.
Tips:
A) 馬利餅最好用攪拌機打碎, 因為要夠碎才可以食既時候覺得滑溜. 如果沒有攪拌機, 可以用麵粉棍輾碎.
B) 煉奶及馬利餅份量因應個人口味而可加可減.
C) 可以用唧忌廉袋將忌廉唧入杯中, 咁樣可以比較容易控制每一層既份量(厚度).
