東涌至伯公坳

好耐無正正式式行山，又無影D靚相，所以想試吓影吓大東山日落。於是約埋一班朋友，兩點由東涌起行。

因為我目的地係伯公坳，所以之前搵下D資料，到㡳由邊度起行，點行會好D。最後我由東涌出發，唔駛受車程影響。不過就靠住簡單既指引，由地鐵站既D出口出發，一路行去達東路，再行順東路，經過消防局同埋警署再繼續行，跟住就上天橋，之後行去東涌路，見到D村屋，記得之前都有行過，之後接住走一條車路，就是入去黄龍坑道既入口。沿黄龍坑上，就會經過赤立角村，之後一路沿車路上斜， 就會去到黄龍坑郊遊地。

我哋係黄龍坑郊遊地停咗一陣，跟住就進入上大東山既梯級路。上山既樓梯真係幾甘，係不停地行樓梯。行咗差唔多半個鐘先叫做有條短短既平路。所以我係平路等埋我既團友一齊行。

估唔到我等咗差唔多廿五分鐘。不過都OK，因為我聽住歌坐底等，都無咩嘢姐。等埋大家，再停留一陣，我哋就再起行。中間見到其中兩個行山友，佢哋話頭先係十級難度上，跟住就係7級難，再之後係5級。果然前面都係樓梯路，不過真係俾前段好好多，上多一陣，仲有石椅坐添！之後就再緩緩上山。之後跟住既上山路比較濕，可能周圍環境都比較大帽，D水氣好勁。行濕既青苔路就最驚佢滑，所以大家都好小心。不過雖然係咁，但呢條濕路真係簡單咗，我哋可以一路行一路傾吓計。

過咗D濕路，再行多一陣就見到有個地圖，而指示牌所指仲有個半鐘到伯公坳。不過實在太大帽啦！應該咩日落都睇唔到。

當我哋繼續行，行多一陣，開始見到D廢屋。不過同上次嚟一樣。唔行到去都唔知係咩樣。兩次行大東山都係咁，真係無癮。行咗無耐，見到另一間比較大既爛屋，門前坐咗個長髮男子，仲要坐係度低頭玩手機，遠望真係幾恐怖。可能我哋講得太大聲，佢都問我哋有冇俾佢嚇親。

之後我哋繼續行，行多一陣就到頂，跟住開始落好大既樓梯級。呢part 真係我最弱，行得好慢。

沿路落山，見到好多人反而上山，佢哋個個都一大個背囊，完全係準備扎營。估唔到天氣咁差都有咁多人嚟。

落山都行咗成個鐘，之後6點半落返伯公坳，去返車路，完成今日原先影日落既大東山之行。