相信大家小時候每日放學後都係睇'430穿梭機'成長. 早幾日見到報導話三色台想將譚玉瑛姐姐從主持轉做顧問, 變相減薪. 聽到這個消息, 覺得三色台做法好殘忍. 譚玉瑛姐姐由節目開台做到而家, 她只為主帶畀小朋友歡樂, 亦想有份穩定工作. 雖則明白長江後浪推前浪, 但冇理由見人差不多約滿, 就續約變相減薪. 其實三色台除咗烹飪; 飲食節目, 其他節目都已經好少睇囉, 加上淘視事件更令我覺得三色台霸道.
牛肋條大家多數會諗到韓式, 其實用上其他醬料配搭, 味道依然咁吸引. 用它的醬汁撈泰國粉絲, 更令人食唔停口. 我好喜歡泰國粉絲, 它煮起都仲煙'un', 唔會'lum pat pat'.
蜜糖芥末醬炆牛肋條伴泰國粉絲 (2人份量)
材料:
牛肋條 250克
紅蘿蔔 1條
薯仔1個
洋蔥 1個
泰粉絲 2包
醃料:
魚露 1湯匙
豉油 1湯匙
糖 1茶匙
胡椒粉 少許
油 1茶匙
生粉 1 1/2茶匙
麻油 少許
紹酒 1湯匙
蜜糖芥末醬 1湯匙
黃芥末醬 1湯匙
做法:
1. 牛肋條洗淨, 切粒, 加入醃料醃1小時.
2. 泰國粉絲用水浸軟備用.
3. 紅蘿蔔及薯仔刨皮, 用滾刀切塊, 洋蔥切絲, 備用.
4. 先將紅蘿蔔及薯仔汆水備用.
5. 燒紅鑊, 爆香洋蔥; 紅蘿蔔及薯仔後盛起備用.
6. 落少許油將牛肋條煎至兩面微金黃
7. 將洋蔥; 紅蘿蔔及薯仔回鑊, 倒入醃牛肋條的汁料滾後加水轉細火炆約10分鐘
8. 最後加入粉絲同炆5分鐘, 即成.
**小小分享**
1. 想牛肋條比較入味, 可預早一晚醃.
2. 炆牛肋條, 請留意水份是否足夠, 如不夠就加水.
累積瀏覽 256716
全部攻略 245
全部回應 148
