2-1-2010 (農曆十一月十八) 大生流 有雨
話說尼日嘅前一晚，因第日要05:00早起，強制自己於22:30上床瞓覺，但係唔習慣早瞓嘅我，瞓極都瞓唔著，一路都半夢半醒，直至鬧鐘響就即刻彈起身，梳洗好，整番杯奶水旦飲吓，執埋釣魚架生，落樓去停車場，揸架老爺車，到北角接埋師傅偉去食早餐，跟住揸車去粉嶺火車站附近嘅停車場泊好車(果度全日泊都係25蚊真低泊)，各自攞埋釣魚架生，搭火車往羅湖過關，過到深圳，已經見到大衛喺往淡水嘅旅游巴站等我地，咁一行三人就即刻上車往目的地進發喇。
經個多小時車程，到咗淡水嘅花街總站落車，轉乘的士入澳頭碼頭，去到師傅偉預約嘅釣具店，通知艇家我地到咗，買埋糧水、魚餌，跟住就出碼頭落艇，尼次嘅艇家，又係上次果個叫大老表嘅舵手。
我地好似好有信心咁樣喎！
戴住紅帽果位，就係艇家大老表喇！
跟住先出馬鞭釣鱸魚。
今次冇攝影師，唯有玩自拍喇！
經過唔知叫乜野嘅碼頭。
差唔多半小時，釣點在望。
架艇一入去，各人即刻落餌，首先我枝筏竿頭點吓點吓，我大叫鱸魚開口喇！但係食得好精，又唔拉竿，等左大約十秒，條魚開始用力拉喇，我順勢一帶，條友仔就知屎啦，狂標埋樁，我就立即揪竿，狂攪七八野，帶順條魚，一路收佢上黎，師傅偉見我中魚，問使唔使撈箕，我話:咁易收嘅魚大極有限，唔使！收到上水面，真係條唔夠一斤嘅BB鱸，一手掟佢上艇，解鈎落生倉。
過咗冇奈師傅偉中魚，我又有得學野喇，睇佢又頂又放，輕鬆自然，玩咗一輪，我梗係做魚童啦，三斤幾鱸魚，撈箕同佢上水。大老表手絲未郁過，而大衛冇釣鱸，沉底釣立又冇魚訊，再過一陣都冇料到，而我地又攞咗頭彩，算啦，轉去東聯果邊釣黃腳立。
就係呢度，我同偉哥先攞頭彩。
架艇又車咗半粒鐘，去到東聯，大衛揾過靚浮泡位，開始釣立喇！
大衛話:5係代表喺度有五斤魚釣喎！虾~果然有四五斤黃腳釣吓。
而我呢，因釣術未精，只有十數條黃腳比我釣到，見咁得閒，又玩吓自拍先。
中午食Ｄ乾糧，繼續釣立。點知大約喺15:30左右開始起北風，跟住仲落埋雨添，好彩我地嘅裝備充足，冇冷親，又冇比雨淋濕身，但係相就冇繼續影囉！
一路轉咗幾個浮泡，大家都釣咗幾多立，咁師傅偉又想去釣吓鱸，點知艇家大老表好似唔想去咁，算啦唯有繼續釣立喇~~
到咗17:45天開始黑，我地就收拾好架生，回航澳頭碼頭喇！埋到岸，將Ｄ魚穫入好冰箱，到釣具店找數，跟住去望海樓食晚飯。食飽飯，大約九點幾，上車回港，回到粉嶺火車站落車，大衛架車都係擺喺附近嘅停車場，不過唔係我地果個，所以先同佢講再見，日后再玩過，再去攞車，送師傅偉番屋企，23:20至回到家。
今次釣鱸魚嘅時間須然少，但係學會釣精口魚仔，都算係一個唔錯嘅釣程。
部份魚穫。鱸先生幾肥大！
Ｄ黃小姐幾靚！
