4-7-2013 (農曆五月廿七）
今日見冇乜野做，早少少落到主場，開好竿，都係釣金古，釣到九點幾，一路都係比泥鯭同梳籮化餌，諗住再冇就十點走人；換過口餌，想話飲啖水，見枝竿頭比魚拉咗兩吓，第三吓就拉到竿頭彎哂，我一手執起枝竿，順勢往上一抽，中咗！大野添喎～跟手攪咗兩三吓，條魚就發力鐘頭喇，磅頂即時發出閱耳嘅叮叮聲，頂咗幾秒，即刻追番幾手，條友仔又發力，嗯!! 唔似金古喎，更加唔似烏頭，一定係牛屎！又頂咗四五秒，因為鈎細線幼，所以唔敢同佢硬拚，就得就就，最緊要係唔比佢埋樁，收吓放吓四五轉，最後都比我收到上水面喇，只見銀光一閃，嘩 !! 唔怪之得咁好力喇，真係大黑牛，睇落起碼有三斤，速落撈箕，上咗黎解鈎即入冰箱；夠皮喇！見好就收，執埋Ｄ架生番屋企至食宵夜囉。
好奈冇中過牛屎喇，仲要咁大條添，專登大大聲嘈醒大人，等佢同我影相。
![]( "13-7-4好奈冇中過牛屎喇仲要咁大條添")
麵包中大黑牛零舍開心，又有得向大人耀武揚威 ～
![]( "13-7-4麵包中大黑牛零舍開心")
肥美嘅三斤牛屎立。
![]( "13-7-4(農曆五月廿七）牛屎立三斤")
劏好魚，即刻整番個宵夜食吓先 。
![]( "劏好魚整番個宵夜食吓先")
墨丸、魚腐、雞干、煎旦麵 ，係米好正呢！
感謝 白果魚神 提供以上資料
白果魚神的網誌: http://a991952.blogspot.hk/
