31-7-2012 喺旺角倫敦酒樓敍餐
回想四十年前嘅今日，係我踏入消防呢個行業嘅第一日，成班師兄弟跟師傅去北角制服倉攞個人裝備，初時見我地操班嘅師傅(勞Sir)個惡形惡相，心諗屎喇，唔知頂唔頂得順添！
攞好制服就坐住架紅色嘅消防大貨車，直駛新界八鄉消防訓練學校，我地被編為該校嘅第【45】隊學員！
喺六個月嘅受訓其間，有苦有樂，最直得慶幸嘅就係跟到呢位師傅，原來佢真係好到不得了，賞罰分明，仲好關心我地班24個反斗星添；啱啱今年佢老人家由外國回港定居，咁梗係即刻請埋佢黎我地個【45】隊嘅40週年敘餐喇！
到齊人就黎張大合照先，坐喺我右手面嘅就係我地最敬佩嘅師傅(勞Sir)喇！
![]()
除咗有幾個同班師兄弟移咗民，有Ｄ就離咗職另謀高就，有兩個就行先一步，去咗另外一個世界，其餘嘅都到齊慶祝。
![]()
當年成班嘅反斗星，依家個個都白髮蒼蒼喇。![]()
第一道菜上黎，即刻回復當年喺學堂搶餸食嘅場面。
![]()
咁嘅情况，攪到個個都哈哈大笑！
北菰扣鵝掌。
![]()
乾煎鼓油皇大蝦。
![]()
碧玉藏寶珠，喺裹面好多正野架。
![]()
碎蒸龍躉頭腩。
![]()
炸子雞。
![]()
驚唔夠飽，伊麵、荷葉飯梗唔少得！
飯後甜品係芒果布甸。
呢個果盆好似喺內地食團餐咁款！
![]()
飲飽食醉仲繼續喺度講當年勇。
![]()
大家都開開心心咁傾到唔願走，仲要約定下次敍會嘅時間，一路傾到成十點幾先懷住愉快嘅心情各自回家。
感謝 白果魚神 提供以上資料
白果魚神的網誌: http://a991952.blogspot.hk/
