31-10-2012 (農曆九月十七)
落咗幾日雨冇去呔椅，今日晏晝都未夠五點，就落去街市執三十蚊蝦，落到主場，有理冇理開三枝竿，一枝半水釣鱸，兩枝沉底博符碌！
行緊大流，釣咗兩三個鐘都係中得條泥婆，心裹打定輸數，呢個時候師傅偉剛到，佢就一枝竿齋釣半水；Ｄ流開始慢，我釣鱸枝竿比魚拉咗一吓，即刻拿番起枝竿，條魚以經發力，我順勢一抽，連攪幾野，已感到條魚線Hi住條樁，唔敢同佢梗拼，放番少少比佢，點知咁一放就去咗成七八呎，咁好力嘅!!肯定係大野~經過一放，條魚就游開咗，我就即刻把握呢個机會，往上一頂，使出絕招...『無敵風火輪』，一路攪到條魚上到水面，嘩!!條鱸起碼七八野，師傅偉幫我撈魚，條魚上咗黎我就抖番順條氣先，跟住就落埋生扣，換過花咗Ｄ魚線，落餌繼續；唔夠兩分鐘，師傅偉起條兩斤度嘅花鱸，跟住又到我中多條斤頭鱸，過咗一陣，我沉底枝竿個鉸響咗一吓，我一手執起枝順勢一帶，條魚以經蹤頭，力度唔大，三兩吓就將條魚收上水，上黎係條磅頭嘅芝蔴仔，之後Ｄ流又開始轉急，我就收起Ｄ竿，同師傅偉轉釣劃仔，釣咗一陣都有幾條，好疏口，望吓個錶，又夠鐘走人，我地執埋Ｄ架生去宵夜喇！
今季第一條鱸就咁大，係好嘅開始。
詁唔到一開季就中大野。
![]()
水口都未凍，Ｄ花鱸咁快黎到。
仲要釣埋條芝蔴仔添。
![]()
條花鱸過磅係八斤。
![]()
全長85Cm。
![]()
磅頭芝蔴啱老婆食。![]()
除咗鱸仔，仲有班仔、泥婆仔、劃仔。
![]()
今次用新買果把陽江十八子骨刀黎劏魚，真係冇得頂！
感謝 白果魚神 提供以上資料
白果魚神的網誌: http://a991952.blogspot.hk/
