14-7-2010 (農曆六月初三)
今日約咗師傅偉落主場，睇有冇烏頭釣。見時間仲早，我就出發前喺屋企個雪柜度，攞咗盒千年雪虾，搣好Ｄ虾殼，準備用虾仁釣魚仔玩吓！
18:30落到主場，剛剛開始起流，我就剩係開一枝筏仔，鈎粒虾肉放落去，坐定定等運到！
19:15釣咗一陣，特然記得有個師兄曾經教過我，落咗
久唔久拉起佢，引吓Ｄ魚埋黎咁話！咁我就試吓喇，我就慢
慢提起枝竿，等粒餌離地，又慢慢放番低佢，如是者兩三次
，個心諗...得唔得架!!點知話口未完，感到竿頭郁咗幾吓，
我就即刻靜止動作，當佢大力一拉果吓我就揪竿，跟住連攪
幾野，嘩！好好力水喎，一頂一收，兩三個回合就上水面喇
，嗯!!紅鮋黎喎！自已用撈箕撈埋條魚，落埋生扣一腳踢。
呢個時候師傅偉啱啱到，佢就開竿釣烏頭，我就繼續用我嘅
放餌落去唔夠十分鐘，又用番之前咁嘅動作，果然又有魚訊
，當佢用力搶餌果吓，我就揪竿，又中呀！都係好好力水，
咁我就知又係紅鮋喇，快手快腳將佢上水，跟住落好生扣，
呢次落餌就冇晒動靜喇，一路釣到21:30，轉咗幾次位，都
冇老烏釣到先。過到去佢話一口都未食過，可能日子時間仲早，睇要打完呢場颱風先至有得釣囉。
22:00就收埋Ｄ魚穫落冰箱，早Ｄ去宵夜好過喇！
好彩有師傅偉同我影相嘖。
驚影唔到再補多飛先。
都幾好，一條斤十兩，另一條斤四。
感謝 白果魚神 提供以上資料
白果魚神的網誌: http://a991952.blogspot.hk/
