11-11-2009 (農曆九月廿五) 大東風
今日一早起身，同架老爺車去驗車，買保險，又去運輸處攞埋行車証，攪咗大半日，見晚上得閒，就落主場玩番轉！
19:20落到主場，嘩好大風喎，心諗今次多數都係龜啦。開好晒竿坐定定等運到，點知全程落流都冇魚訊，剩得Ｄ蟹喺度偷食。停咗流我就轉個位，又過咗幾刻鐘，釣半水果枝竿有幾吓輕微嘅魚訊，我就拎起之竿準備，佢好快就有反應，一吓強而有力嘅魚訊，我就往上一提，中呀！但感覺唔係咁重，條友仔飛快出海，初初我重以為係小鱸魚，同佢玩番兩轉先，但好快佢就冇勿力，咁我就收佢埋黎一睇，咦！唔係鱸魚喎，係大眼海鰱喎，一野就飛佢上岸，費事洗撈箕，影好相，放入冰箱，繼續釣。
23:30都好！有一咀過吓引，見再冇魚訊，就拾埋架生，清理好釣場走人，去食埋宵夜就番屋企喇！
條海鰱斤零重，但冇勿力水。
同佢影番張合照先得。
昇盤比例照都唔少得。
清蒸大海鰱，須然多骨，肉質較淋，但勝在有魚嘅鮮香味，一個字~~正！！
