28-4-2010 (農曆三月十五) 生流 暖
今日晏晝同大人過咗尖沙咀開茶會，準備下月四號出發日本北海道四天之旅。攪惦晒都成六點幾，見都仲有時間，嗱嗱聲攞起釣魚架生，就往主場再搏殺。
落到去都七點幾，見仲未轉流，就慢慢開好兩枝竿，一枝沉底博大霧，一枝十幾呎釣鱸。八點師傅偉又到咗，一路都冇魚訊，佢話今日都係龜喇，到十點佢就拾野走人，我就繼續磨爛蓆。
佢走咗冇幾奈，大約十點七左右，我都諗住走人，收起枝沉底竿先，點知特然間聽到一吓微弱嘅攪響聲，我即刻放低手上枝沉底竿，走番過去攞起枝釣鱸竿，一攞起已感覺到有魚拉，仲係大野添呀，我都費事揪竿喇，即刻就快速攪咗六七野，但條魚就發力開尾，我就比番幾呎佢走吓，當我再用力拉嘅時候，見條鱸出現喺隔咗兩枝樁果度，飛出水面想洗鰓，我心寒一寒，屎喇又包樁，仲要包兩枝樁添，焗住立即放攪，比佢鐘番落去，我再用陰力一帶，順勢攪咗八九野，將條魚帶順番出黎，再攪幾野，條鱸比我收上水面喇，跟住用力張佢揪高少少，再一左一右咁帶咗三吓，佢就冇晒方向，反肚投降，我就速落撈箕將佢上水，即落冰箱，順手拾埋Ｄ架生走人喇。
叫老友King Kong 仔同我影相。
好奈冇上過魚，所以特別開心。
番到屋企大人又瞓咗，唯有自拍喇。
都係咁樣有形Ｄ。
花鱸五斤四 73Cm
