19-3-2010 (農曆二月初四) 生流 微寒
前晚走咗條沉底怪獸，兩晚都瞓唔著，要醫番好走魚失眠症，最好嘅方法就係去釣魚喇(值口黎嘅)！
今晚就單人匹馬到主場，落兩枝竿主打沉底，不過都放枝釣鱸嘅竿等運到。
我金睛火眼望住枝打沉底嘅筏仔，到咗19:30沉底枝竿開始有反應喇，條魚試咗三四吓餌就搶餌喇，我一手就將枝筏仔往上一揪，跟住一手都唔放，一頂一收，好容易就上水，係斤半左右牛屎，見咁細，一手就掟佢上岸，費事洗撈箕，落好生扣就繼續釣。
中咗條牛屎之後，一路都冇魚訊，又到咗21:00，旣然目的已達，都係唔磨爛蓆喇，於是拾好架生，清理埋釣場，去宵夜好過囉！
斤半良型牛屎立，今晚應該好好瞓囉。
