探險家攻略 > 休閒玩樂 / 城中探秘 / 旅遊 > 海灘 / 特色景點 / 古蹟 / 其他 / 長線旅遊 > 土耳其八天之旅第 (5)天

土耳其八天之旅第 (5)天

由白果魚神於 2011-10-08 00:00:00 發表 | 累積瀏覽 431

分類：海灘長線旅遊特色景點古蹟其他；地區：其他

8-10-2011 (第五日)

今日07:15起床，喺酒店食埋早餐，08:45出發去參觀皮具店喇(即係帶我地去買野)！

晨早出露台呼吸吓清新嘅空氣，遠眺愛琴海，人都醒神Ｄ嘅！

夠鐘出門口等上車喇！

去到皮具店，首先黎一場皮具時裝表演比我地簡衫。

我睇完表演就雞咁腳出咗門口，見有隻〝金毛〞就同佢玩咗一陣。

連譚老板都話呢隻野好乖！

三個女豪客又買咗野，其他成員同我一樣冇幫襯。

上番車，離開「古薩達斯」，繼續出發去我地今日嘅景點「巴格門古城」。

沿途嘅風景雖然唔係好靚，但係都要影低佢同大家分享嘅。

黎到海邊，就見到有人喺度釣魚。

呢支就係【土耳其】嘅國旗。

行咗兩個多小時車程，又到食午餐嘅時間喇。

都係自助餐，我攞夠一碟，加碗湯，費事行多轉。

好彩早到，越黎越多人，唔係排隊都有排輪。

食飽就繼續行程，途中見有好多靚靚嘅清真寺。

十幾分鐘車程就到咗〝巴格門古城〞山腳，我地要坐吊車上山。

地要坐吊車上山。

我同陳生互影。

都唔使十分鐘就上到山頂喇，都幾大風吓。

今次真係黎到「巴格門古城」門口喇！〝巴格門〞曾經係古希臘最繁盛嘅古城之一，佢曾經被用黎收藏寶藏嘅地方，而近代考古學家仲揾到一Ｄ古跡，証明咗佢係石器時代第一個有人類居住嘅地方，另外「巴格門古城」係一個位於高山上嘅衛城，好似雅典嘅〝巴特濃神殿〞一樣，有寺廟、遺跡同美麗嘅風景。

呢Ｄ古水硑變成貓窩。

呢幾棵樹都有段古架，不過我冇心聽，走咗去影相。

一路行入去就見到古城樓喇。

行到上黎呢度最大風，占太唔夠磅，要我磅住佢先上到去，如果唔係實比Ｄ狂風吹跌。

呢個廣場，曾經有位已故世界知名嘅男高音演唱家，都喺呢度開過演唱會喎！

唔左大家繼續睇爛野。

呢位村姑喺度採擇橄欖。

嗯!!固住頂帽唔好比風吹走！

大人繼續做我嘅模特兒。

呢兩隻莫非係恐龍蛋！

卒之比我揾到靚景喇。

未得住呀，好大風，幾乎吹咗頂帽！

大風到我都要同大人捉實頂帽，如果唔係就比風吹咗去架喇。

睇完古城Ｄ爛野，就黎吊車站坐吊車落番山。

呢個儲水庫唔知有冇我地嘅萬宜水庫咁大呢！

落咗山，上番旅遊巴，幾個字車程就到咗今晚我地入住嘅 Grand Ozcelik酒店喇。

就係今日我地嘅一位團友話佢晚晚都係住喺最尾個間房，要求領隊換房，點知個領隊好唔客氣咁話:「想換房自己比錢換喇」！試問咁嘅態度有邊位客人會接受吖，跟住就嘈起上黎，我為咗息事靈人，費事比條契弟破壞開心旅遊嘅氣氛，主動提出同呢位團友對換房間，咁先至平息咗呢場風波！