新加坡勁食生日之旅 Day2

由 AABB遊世界於 2010-05-27 00:00:00 發表 | 累積瀏覽 541

分類：

Day2 (21 May 2010)

一張舒服嘅床，令我哋瞓醒後精神飽滿！今日去聖淘沙環球影城玩，所以我哋七點半就起咗身！梳洗過後，就搭的士去牛車水亞坤食早餐～

亞坤咖央多

我地叫咗兩個set，新加坡人喜歡食生熟蛋做早餐，佢地鍾意加豉油攪拌，然後用咖央多點嚟食。我哋有樣學樣，不過豉油落得太多，令到蛋汁有啲鹹…咖央多真係幾好味，不過點解凍冰冰嘅？如果熱辣辣會更好味！飲埋杯南洋奶茶同咖啡，我哋就出發去環球影城lu～

亞坤
地址: 18 China Street #01-01
電話: (65) 6438 3638
營業時間: 周一至五0730-1900﹑周六及日0800-1800

休息: 公眾假期
網址: www.yakun.com

行過地鐵站途中，發現Hong
Lim 熟食中心搬咗！旅遊書有介紹過架，好彩我哋冇諗住嚟食早餐，如果唔係食白果又唔開心。

依度好似香港嘅公屋

新加坡環球影城

前往聖淘沙的其中一個方法是在Harbour
Front站Vivo City內搭sentosa express，入島費SG3，第一個站就喺環球影城喇！去到影城，九點半，天書明明話九點就開門，原來十點先開＠＠諗住問下有冇得加錢upgrade做快證，點知連買飛counter都未開呀！嚟早咗都好，可以周圍影下相！

因為我哋一早買咗飛嘅關係，可以提早入場。其他冇飛嘅人，就只有恨的份兒。入到場，功夫熊貓已經在大街上迎接我哋。因為園內的遊戲還未開放，所以我哋都排隊影相。

樂園地圖同迪迪尼好似，都係中間入，然後向左／向右兜圈行，我哋趁有時間，劃咗個攻略圖，先主攻一些受歡迎遊戲！最後果然成功，頭一個鐘玩所有野都唔洗排隊，中午時份開始多人入園，所有遊戲都要排半個鐘以上，所以後半截好多嘢我哋都冇玩。米芝蓮有個食店評分，等我都整返個「AABB影城評分先」！

一粒星：不玩也沒有損失

二粒星：冇人排隊可以玩下

三粒星：值得排隊玩

古埃及 (Ancient Egypt)

木乃伊復仇記Revenge
of the Mummy ☆☆☆

真係好似迪迪尼飛越太空山嘅室內過山車，不過這個更刺激！光是步行入去那段路已經夠驚嚇！過山車在漆黑一片的環境穿梭，並加入了許多意想不到的效果，係幾好玩的。Locker只有半小時免費，其後要收錢

尋寶奇兵Treasure
Hunters ☆

類似迪迪尼的揸車，不過依個慢好多。冇人排隊咪玩下囉，否則唔玩都冇咩損失。

失落的世界 (The Lost World)

侏羅紀河流探險Jurassic
Park Rapids Adventure ☆☆☆

坐在圓形橡皮艇上漂流，最後直衝落水，不過我地唔敢玩，所以評論唔到，哈哈。

天幕飛行Canopy
Flyer ☆☆

坐在雙腳懸空的坐椅上，在高空飛行，繞過「失落的世界」一周。整個過程30秒左右，工作人員話唔快，只係欣賞風景，但係衝落去果下同返去果下都有少少離心力，有少少嚇親架。

恐龍騎士Dino-Soarin ☆

似迪迪尼的小飛象，不過佢換咗隻龍。因為玩過類似嘅嘢，所以冇玩到。

琥珀攀岩牆Amber
Rock Climb ☆

即係攀石，不過此項目要另外收費的。

未來水世界WaterWorld ☆☆☆

在水世界內，高難度特技表演，令人嘆為觀止的爆炸特效，驚險萬分。每日只上演３場，分別係：1300﹑1500﹑1700，一定要睇！

遙遠王國 (Far Far Away)

史瑞克４-Ｄ影院Shrek 4-D Adventure ☆☆☆

好似迪迪尼個４-Ｄ影院，不過我覺得依個仲刺激。哈哈，好睇！

多話驢耍寶秀Donkey
LIVE ☆

冇玩到，不過估係似迪迪尼個「會面史迪仔」，驢友會出來同大家玩互動talk show。

小龍飛行學校Enchanted
Airways ☆☆

好似西九龍果部飛龍過山車咁，適合大人小朋友玩的過山車。

魔法轉輪Magic
Potion Spin ☆

超迷李版摩天倫，似海洋公園兒童王國果個，不過果個室外，依個室內，都是屬於啱小朋友玩的玩意。

馬達加斯加 (Madagascar)

馬達加斯加木廂漂流記 Madagascar : A Crate Adventure ☆☆☆

未開，冇得玩。

朱利安國王旋轉舞會 King Julien’s Beach Party-Go-Round ☆☆

即係旋轉木馬，不過依個「木馬」好得意，全部都係荒失失奇兵的主角扮演，好特別。

紐約 (New York)

斯匹堡大導演主持的電影特效片場 Lights, Camera, Action! Hosted by Steven Spielberg ☆☆☆

現場上演一場特效表演，一個空蕩蕩的片場，頓時化身成五級颶風的紐約城，滿目瘡痍觸目驚心。電影特效讓遊客置身現場感受，彷似身歷其景。觀景台有三排，記得站在最前排，更刺激呢。

28號片場
Stage 28 (唔知點評分)

一個嶄新的電影製片廠，讓你走進幕後體驗第八藝術的魅力。冇開到，冇得玩>_<

科幻城市 (Sci-Fi City)

太空堡壘機械戰隊
(藍色軌道) Battlestar Galactica
CYLON (唔知點評分)

太空堡壘人類戰隊
(紅色軌道) Battlestar Galactica
HUMAN (唔知點評分)

大名鼎鼎的雙軌過山車，樂園未開已經出晒名，人人爭相報導。不過由於先前發生了一些故障而暫停開放，直至另行通知為止。喜歡刺激的人可能會覺得好可惜。

旋轉飛盤
Accelerator ☆☆

似海洋公園激流隔離果個飛盤。AABB一向不愛刺激，所以冇玩到。

好萊塢 (Hollywood)

好萊塢劇院Pantages
Hollywood Theater ☆☆

環球影城一班怪獸的Rock-n-Roll歌舞SHOW，東方人可能會覺得悶d，好多人中途離場。表演員好投入，喜歡搖滾樂嘅朋友應該鍾意。

買個獎送俾伴侶，一定tum得佢好歡喜♥

AABB遊園小tips

．園內嘅飲品偏貴，且選擇唔多，建議自行帶飲料。

．食物價錢較公道，例如一碗喇沙麵$43hkd，都未算好離譜，大家可以自擕食物入場，或者在園內吃都可以。

．建議預先買定飛，透過官網或TravelAgent訂購均可。我是在Asia Travel Care個「facebook有獎」問答遊戲中以優惠價買的，$340 only，慳咗$30。

．建議在平日時間遊樂園，並且早到半小時以上。

．入場後先攻喜歡的遊戲，這樣不用花太多時間排隊。

．到場執生！如果太多人，買fast
pass較化算。

因為早入場嘅關係，所以玩到３點我哋就離開環球影城，前往聖淘沙其他玩樂景點。烈日當空，太熱了，依個時候去玩簡直係折磨自己，所以我哋去左Toast Box坐低飲杯野抖下先，叉足電，又再出發！第一個玩樂區就係期待已久嘅MegaZip。

MegaZip 極速下山 ☆☆☆

先前的文章已經介紹過，MegaZip是看似超激的索道滑行，單靠穿在身上的一個扣和一組滑輪，從山頂越過樹林頂一躍而下，不消45秒便滑到400米外的小島上！先前一直好期待，但當上到山頂，買埋飛之後，我開始「拗底」。望住個高台，越諗越驚，驚到想縮沙。猶豫咗好耐，我走埋櫃位同姐姐講：「I feel scared and nervous, can I refund my money?」跟住佢話唔洗驚，唔會好快，just 50km/h，初時可能會驚，但落到去之後，you feel nothing。仲補多句:”You Must Try it!” Really? ? 我懷著半信半疑的心情再次踏足這條路，但我真係好緊張，幾乎同每一個工作人員都講一次「我好驚」。因為兩個人體重不超過150kg可以一齊玩，所以我就要求同Ａ先生一齊。上到去高台，因為我好緊張，非常唔合作，擾攘咗好耐終於出發！頭幾秒真係好驚，有離心力，但係正如姐姐話齋，跟住就free falling，好free好爽好正！玩完的確想翻啅！但係太貴了，玩完都唔洗30秒。下次有機會，我要一個人飛落去，嘿！

玩完MegaZip，我地沿著沙灘步行去另一邊玩Luge & Skyride。當時天氣好到不得之了，看著比堅尼女郎曬太陽，肌肉男在玩滑浪，令到整個人都不禁懶洋洋起來！聖淘沙果真是一個渡假聖地～

Luge & Skyride 斜坡滑車 ☆☆☆

斜坡滑車(Luge)是從新西蘭引入的玩意，駕駛者從樓高12層的山坡上，沿著650公尺的跑道迅速滑下，拐過一彎又一彎，完全自主控制車速加倍刺激！旅程5分鐘，玩完想再玩？可以乘坐吊車(Skyride)經過320米的索道返回山頂，全程懸著雙腳，腳下是綠林，遠眺是美麗港灣。

這又是另一非常期待之玩意，玩完之後都冇令我地失望，真係非常之好玩！Ａ先生直頭愛上這玩意，回來後一直排念著呢～早知咁好玩就買多幾次啦，哈哈！提提大家：跑道有兩條架，一條曲折d，一條正較直，建議大家玩曲折果條，刺激好玩好多架^^

玩完滑車都已經六點，原本plan咗睇Song of the Sea，但係因為類似嘅表演已經睇得太多，突然失去興趣，所以決定提早走，出去市區食好嘢！嘻嘻。

今日係我B小姐生日，唔買返個蛋糕慶祝下點得？據我所知Vivo City內有間Secret Recipe，芝士蛋糕好出名，橫掂順路梗係要買嚟試下啦！款款都好吸引，最後揀咗oreo
cheese cake & marble cheese cake。買完就去新海山。

惹味招牌黑胡椒蟹 - 新海山

新海山是一間出名的海鮮餐館，招牌菜是辣椒炒蟹同黑胡椒炒蟹！不過搵依間新海山就辛苦了，本書話由Outram Park 或者 Tiong Bahru行過去10分鐘，但係又唔講邊個地鐵站出口，個地圖大到呢……真係唔好再放大d？我真係冇可能確定到我究竟方向啱唔啱，結果，行完一次又一次冤枉路，最後問人，佢話距離好遠架，起碼行半個鐘。跟住佢教我地搭巴士，33號﹑63號﹑851號。很有趣，佢讀個three做tree，以下係我哋嘅對話：

「Thirty Tree，Sixty Tree，Eight Five One」路人

「Thirty Tree? Pardon, do you mean Fifty Three?」我

「No! Thirty Tree，Sixty Tree & Eight Five One」路人

「Thirty THREE，Sixty THREE & Eight Five One」A先生

「Yes! Thirty Tree，Sixty Tree & Eight Five One」路人

我地重覆時讀Thirty
THREE，佢都係要講返TREE，係咪個個新加坡人都會咁嘅呢？

上左巴士過咗幾個站，順利去到新海山！一坐低，侍應強烈向我哋推介冰涼蘆薈，話自家制好清甜。唔知係乜嚟，叫左一碗試下先，唔飲由至可，一飲停唔到。味道清甜又冰涼，有啲似檸蜜味道，不過清新版，蘆薈又好好味。不消一會，就俾我哋飲晒！本來想叫多碗，但係太貴了，成六蚊坡紙，都係叫壺茶算了。點咗隻黑胡椒蟹，同埋椒鹽蝦。椒鹽蝦炸得好脆好入味，蝦好新鮮，蝦頭好多膏！食咗一陣，隻黑胡椒蟹都上埋，聞落香噴噴，已經流晒口水，急不及待搶隻蟹鉗嚟食，黑胡椒好香，d汁好惹味，蟹肉非常鮮甜，好食到停唔到口，Ａ先生話好食過無招牌！隻蟹好快就俾我地食完，好唔捨得呢>_< 今餐好和味，價錢仲和味呀，足足食左SG104，差唔多六百蚊港幣！樣樣都收錢，擺明lur遊客水，建議大家自備濕紙巾，下次要試埋隻辣椒蟹先得！

新海山的蝦蟹類有很多種煮法，唔食辣嘅朋友可以選擇其他

新海山餐館
地址: Block 55, Tiong Bahru Road, #01-59, Singapore 160055 (Link Hotel對面)
電話: 62230810 / 62243905

參考價錢
清涼蘆薈----------------------------------------------------6.00
黑胡椒蟹 (1 x 1000G @ 60.00)-------------------------60.00
椒鹽蝦-----------------------------------------------------24.00
茶 (2 x 1.20)------------------------------------------------2.40
飯 (2 x 0.70)------------------------------------------------1.40
前菜---------------------------------------------------------2.00
濕紙巾 (2 x 0.30)------------------------------------------0.60

走嘅時候，我哋都係搭巴士，已忘記幾多號，去到Clarke Quay MRT之後就慢慢行返酒店，仲食多咗次「阿伯雪糕」呢^^