青島之旅 Day2.9 登州路晚飯

由 AABB遊世界於 2011-05-27 00:00:00 發表 | 累積瀏覽 516

分類：

Day2.9 (2011-4-9)

行程: 酒店早餐-->信號山公園-->基督教堂-->迎賓館-->奧帆中心心海廣場-->
葡萄酒街-->啤酒博物館-->電視塔-->婚紗街-->登州路-->酒店

上回講到, 我地靠「下山石階」落山, 果然冇呃我地5分鐘真係得!
落到去, 就係上清路。食度d屋好有歐陸感覺, 我鍾意~~

青島俾我o既感覺係繁華﹑有錢。
截左一陣都冇的士, 所以我地行過去啤酒街搵食!
沿住地圖, 唔覺意俾我地轉入一條小巷, 如果我冇估錯, 依度應該係平民區。
條街好多垃圾, 一開始比靜, 後來漸漸見到一d舖頭。

有批發茶庄, 價錢肯定平, 問題係你敢唔敢買?

街邊有好多小食檔, 但係衛生情況欠佳, 我地都唔敢食。

見到依檔肉店, 我諗起周星馳國產凌凌漆XD

沿路好多菜販﹑水果販, 好似旺角個街市喎。
再行前d, 就出返大街~

過左平民區, 我地就轉入延安二路(青島婚紗街), 依度簡直係青島版「金巴利道」!

條街都幾長, 大Brand如「薇薇新娘」﹑「金夫人」等都在指示牌上找到!

過左婚紗街(延安二路), 就到達啤酒街(登州路)。

找來找去, 都唔知去邊間食好~
今晚其實我地主打都係食海鮮, 但原來啤酒街賣海鮮的餐館唔多!
話明啤酒街ma...梗係飲啤酒啦! 所以...揀左好耐都唔知食邊間好!

博物館對面新開左間「海哈"虫利"」, 但係新開超多人, 逼都入唔到去。
揀唔到, 又係果招, 邊間人多就去邊間!
「海哈"虫利"」斜對面有間叫「台北傳奇」, 裡面有好多人, 見佢三層高, 坐得又舒服, 又有海鮮食, 好似唔錯, 於是我地就入左去喇。

o黎青島食台灣野...其實真係有d奇怪:p

招牌菜: 肉沫海參, 個汁幾好, 送飯唔錯, 不過條海參呢...都唔係想像中咁好乍噃

(左起) 烤馬步魚﹑烤多味魚﹑烤肉筋
烤肉串唔錯喎~ 烤馬步魚比較硬身, 難咬開不過味道不錯!
烤多味魚有d似金汁魚, 幾好。
烤肉筋, 有肉汁, 燒得好惹味, 食完一串我地再Encore!

台灣三杯雞, 好香, 送飯一流

尋日冇食魚, 今日食返。依條老板魚個樣好似魔鬼魚, 肉質較實, 配合埋獨特醬汁, 係一個新嚐試。

後來加埋串燒, 埋單大概￥160。
但係我地身上唔夠人仔, 想簽卡又唔知解張卡失靈...我其他信用卡又留左在酒店。
點算呀?? 真係好驚要留係度洗碗......
好彩老闆娘肯收港幣, $200蚊o岩o岩好, 呼~~

總括呢, 飲啤酒還是去啤酒街, 食海鮮呢...還是去雲霄路吧!

食飽飽, 我地就打的返酒店。
搭的士, 我地又遇到奇遇。

今次依個的士司機一如既往都係咁多野講, 不過佢d口音好難聽, 我地幾乎係完全聽唔明@@ 返到酒店都係￥20, 真係好平, 我俾左一百蚊紙佢, 點知佢冇得找...口up up, 有d嬲咁款, 我地聽得最清楚係: 「你又不早說」。跟住佢突然開車, 駛離酒店範圍, 我地梗係好驚啦, 即刻問佢:「你要去哪兒?」佢又唔應我地。後尾在酒店後兩條街, 佢將部車停埋一邊, 然後佢落車, 走過對面馬路的便利店, 見佢好似買野。大概5分鐘, 司機返o黎, 載返我地去酒店, 然後收我￥100, 找返￥80俾我地。我不停同佢講唔好意思, 佢好瀟洒咁話唔緊要, 跟住就走喇。

依度d的士司機真係好和藹可親, 佢地好人到會幫你幫飛, 又會為左找錢俾你而特登去買野, 令作為遊客o既我地有賓至如歸o既感覺!

最後一晚, 真係有d唔捨得, 好想留多幾日先走。

下一篇

青島之旅 Day3.1 奧帆中心五四廣場

感謝 AABB遊世界提供以上資料

AABB遊世界的網誌: http://aabbhappytravel.blogspot.hk/

鐘意SeeWide的分享，給我們一個Like吧！