深水埗「桂林夜市」(農曆新年限定)

大年初一，當我拜完年回到深水埗，一出地鐵站驚見超多人，成條桂林街變左小食街，人山人海，小食種類超多，連Kebab同印度烤餅都有，勁！我立即忍唔住拍下一張照片上載至Facebook，巡視一圈之後就回家。

人生人海的深水埗桂林街

往後幾先發現很多朋友都有去「朝聖」，反而我咁近，一次都未試過。年初三，我心思思落街尋找印度烤餅，已經12點幾落去，咩事，仲係咁多人？！？

唔知係咪食環署掃過場，還是已經入夜，小食檔明顯比初一見到的少。但是印巴藉朋友開的小食檔依然客似雲來，最誇張的是我想試那檔印度烤餅，人龍圍著黃金電腦商場，由桂林街頭排到轉入福榮街，保守估計要排成粒鐘先食到。





除了印度烤餅，成條街最多就是即燒烤肉，就係唔知係咪物以罕為貴，外藉人士經營的明顯比港人經營的好生意。


港式經典小食如腸粉、生菜魚肉、魚旦、臭豆腐梗係唔少得，友人話檔臭豆腐都唔少嘢，起碼排十幾二十分鐘仲要驚冇得食，認真巴閉！食到口渴了，有港式糖水紅豆沙、蕃薯糖水任君選擇，仲有夏桑菊，下火一流。

桂林夜市，仲旺過士林 (Photo Credits to CH Yeung & Man Rosa)

可惜來得太遲，找不到合心水美食，二來想試的印度烤餅實在太多人了，白行一敞便回家。A先生話：「呢檔烤餅咪同你樓下果間印度嘢一樣，平時都有得食啦，點解係要揀今日食？」Hmm......開心嘛，平時就是一次都未試過，見到佢個印度洞窯就好想食喇。唉，女人，都是容易被外貌所蒙蔽。原來日前蘋果都有報導過「桂林夜市」，唔講真係唔知，唔怪得貢貢貢多人啦～ 報導原文：「桂林街新年夜市　地道小吃重現 」 每年農曆新年初一至初三都會「重現」，今年錯過了的朋友，明年請早。

其實我真係很愛深水埗，住在這裡經常發掘到新驚喜，下次再和大家分享。

感謝 AABB遊世界 提供以上資料

AABB遊世界的網誌: http://aabbhappytravel.blogspot.hk/