26 MARCH 2014(WED)
繼上次聖誕節小小豬係學校表演過青蛙仔舞之後(有興趣重溫小小豬舞姿嘅朋友請按)，今日學校舉行左另一個表演活動，就係全體K1小朋友嘅體操表演啦~自上次聖誕聯歡會表演過之後，我仲以為要等出年先有機會再睇小小豬表演。點知，原來學校有一個體操匯演，所以我個期待嘅心又開始啦！
其實當初一知道小小豬有表演時，我都好緊張，因為上次聖誕表演初時，小小豬都唔太合作，所以都好驚會案件重演。
好在當我問老師小小豬綵排情況時，老師話小小豬今次好好，好合作又做得幾好，我先放下心頭大石，迎接體操匯演嘅來臨呀！
為左今次依個匯演，大肥豬都請左半日假，帶齊晒重裝備，去拍底小小豬嘅表演情況。不過我地晏左去霸位，所以最後只可以係禮堂樓上睇，慶幸有支長鏡同埋部DV可以影近啲，所以都拍攝到小小豬跳舞時嘅情況。
匯演開始時，五班K1小朋友一齊表演體操舞，不過因為背住我地跳，加上又多小朋友，真係好唔容易先搵到小小豬呀~
第三PART就到小小豬嗰班表演，雖然我地去左禮堂樓上，不過好在有長鏡頭，加上小小豬企個位置又算幾好，都總算影到小小豬嘅可愛舞姿。
小小豬嗰班連同另一班K1小朋友表演"貓咪狗狗好朋友"，差唔多成80個小朋友一齊跳，其實都幾得意。
一睇小小豬就知佢係扮緊狗狗啦~
其實成個匯演都有成一個鐘，小小豬嗰班都表演左十幾分鐘，為免悶親大家，所以將最正面同攪笑嘅幾分鐘同大家分享啦~
其實小小豬嘅表現比我預期嘅好，只係中途好似有少少迷失之外，整體上都表現得好落力，好投入又跟住啲指令做晒啲動作，所以已經係好叻仔呀！
其他博客區
※※ SINA ※※
※※ MyBB星級Blogger ※※
※※ WeShare ※※
※※ She.com ※※
