Hello !
今日發生左一單真人真事 , 件事係教訓我地 ,
做人千祈唔好貪懶 , 否則後果可以好嚴重 .
話說今次去完 "北海道" 返番黎 "香港" ,
諗住寫網誌記錄低整個行程 , 俾將來自己睇番以及公諸同好 ,
起初都好順利 , 寫到第6日半既行程 .
而D相&短片 , 分別收藏在3張記憶咭裡面 ,
平時寫網誌只係將張咭插入讀咭機裡面 , 執執佢之後就上載 Yahoo ,
因為貪懶冇Save到落電腦硬碟度 , 第一張咭功成身退 ,
第二張咭讀取了3份一資料 , 今日無端端執電腦硬碟 ,
錯手將第二張咭資料格式化 , 由於冇存底 ,
所以一切相片&短片都化為烏有 , 依家只剩第三張咭既尾聲行程 ,
正式係欲哭無淚 , 最慘係經已寫到行程最精彩既高潮位 ,
離開大霧中心點 , 去到天清氣朗既 "襟裳岬" ,
果度無論天氣及風景都靚到冇朋友 , 依家D相片&短片都冇晒 ,
只能夠在腦海中回憶 , 唔能夠公諸同好 , 真係心痛欲絕 , 後悔難返 .
~~~~~~~~~~~~~~~~~~~~~~~~~~~~~~~~~~~~~~~~~
現存既相片一跳就跳到從 "登別" 開始 , 經檢算過損失了 ,
釧路酒店 ~ 晚餐 ~ 早餐(勝手丼) 翌日幾個海邊景點 .
襟裳岬 ~ うらかわ優駿AERU酒店 ~ 之後幾個海邊景點 .
洞爺湖觀光船 ~ 熊牧場 ~ 夜晚煙花表演 ~ 洞爺湖酒店&晚餐 .
大致上係咁多 , 可謂損失慘重 . >_< !!
~~~~~~~~~~~~~~~~~~~~~~~~~~~~~~~~~~~~~~~~~~~~~
最後 : 想再講多次 , 如果有相同情況既 Blog友 ,
記得將D相片&短片 , Save落硬碟度呀 , SD咭都係靠唔住 , 總之咪貪懶 .
唉 ~ 寫過咁多次旅遊網誌 , 都未試過爛尾 ,
真係一生總有第一次 .
Bye Bye !
感謝 Man Wai 提供以上資料
Man Wai的網誌: http://1226manwai.blogspot.hk/
