探險家攻略 > 休閒玩樂 / 城中探秘 / 旅遊 / 美食之旅 > 主題公園 / 特色景點 / 長線旅遊 / 餐廳 > 紐西蘭南島10天自駕遊 (Day 1 & Day 2)

紐西蘭南島10天自駕遊 (Day 1 & Day 2)

由大力於 2013-02-08 00:00:00 發表 | 累積瀏覽 711

分類：主題公園長線旅遊餐廳特色景點；地區：其他

今個農曆新年攞多2日就可以有9日長假期, 可以去旅遊嘅地方選擇多好多(雖然仍然都好想去日本), 再三考慮之後決定衝出東南亞, 歐洲依家係冬季日短夜長無嘜著數, 澳紐正值夏季日長夜短就最正, 澳洲已去過兩次, 所以最後決定今次遠征紐西蘭. 大半年前巳開始籌備, 初時諗住夜機去就有10日時間足夠玩晒南北島(一般旅行社都係10日南北島行程), 買左2本紐西蘭嘅旅遊書, 上網睇Blog揾吓資料之後就發覺原來紐西蘭真係好大, 時間唔夠之下唯有衹去南島. 今次用英文GPS(之前用過日文同韓文)原來超好用, 可以直接輸入英文地址同聽得明嘅英語提示, 由其係車速檢測器提示真係好洗好用, 新西蘭D公路好多由時速100轉50嘅陷阱, 如果唔係罰超速都幾金. 南島10日行程夜去早返, 連埋11個鍾頭機去北島奧克蘭加2小時內陸機去南島, 實際得7日玩. 有local agent 幫手一齊計劃呢個行程方便好多, 同時安排得都幾豐富, 可以坐象皮艇近距離睇塔斯曼冰川(Tasman Glacier), 見到全世界最大嘅海鳥信天翁(Albatross), 野生黃眼企鵝(Penguin)同海獅(Sea Lion)(不過要行過幾個山崖先見到, 極大體力勞動), 超近距離睇海豹(Seal), 出海睇全世界最大嘅魚類抹香鯨(Sperm Whale), 同暗色斑紋海豚(Dusky Dolphin)係水中追逐(當然游得無佢地咁快啦 ). 紐西蘭嘅零污染天然靚景真係超無敵, 湖光山色好迷人, 非常Amazing.

Day 1 & 2 : (香港 - 奧克蘭機場 - 皇后鎮 - Bob's Peak[Skyline Gondola & Luge] - 古董蒸氣船碼頭[Steamer Wharf])

大半年前巳開始換紐元, 由6.189至6.312, 平多均價為6.271. 到出發時已升到6.55, 好在之前已經入食定晒貨 .

出發前已經知道此行程雖要行山, 所以我地買左對新嘅運動鞋, 防水防滑加透氣, 超輕好行勁正.

今晚七點幾機, 喺翠華打左個底先上機.

紐西蘭航空中式飛機晚餐 - 牛肉飯, OK啦, 勝在有菜有飯食吓. 食完諗住可以大覺瞓幾粒鍾, 點知瞓唔著仲好快肚餓添.

紐西蘭航空中式飛機早餐 - 雞肉炒麵, 味道一般, 因為勁肚餓所以都食晒.

奧克蘭內陸機場, 喺國際機場行500公呎先黎到.

內陸機自已 check-in同寄行理架.

奧克蘭內陸機場 food court, 選擇都幾多.

內陸機無野食供應, 打個底先上機啦, 呢度嘅麥記居然有安格斯漢堡, 梗係要試啦, 味道唔錯. 個餐嘅薯條仲可以轉沙律, 沙律菜非常清新爽脆, 正.

紐西蘭航空內陸機, 比起喺香港搭黎嗰架細DD.

今日天氣勁好, 雲層好薄.

架飛機同個山峰好接近呀!

2小時機程好快就到皇后鎮.

皇后鎮機場好細, 要自已行入去機場度架.

攞完行理第一時間去租車公司攞車先, 辦好手續就交條車匙同部GPS比我, 自已去攞車, 自助形式幾特別.

架紅色 Toyota好sharp醒, 仲好好馬力. 揸足7日車租(NZD870), 行左 1,600公哩油錢 NZD279(HK$1,750), 大約 HK$1.10 行 1公哩好合理, 用D同D3波行車以經非常足夠, 行到時速160公哩都好穩定, 逢車過車, 勁爽.

第一站去搭吊車上山頂, Set 好 GPS就出發啦.

Kiwi & Birdlife Park奇異鳥類生態園, 車頂嘅史前生物背刺鱷蜥(Tuatara), 外形獨特.

十零分鍾車程就到吊車站.

兩個人搭Skyline Gondola加埋玩 Luge 費用為NZD72. 呢度D吊車仲可以載埋架單車上山頂, 真有趣.

架Gondola吊車上山時都幾快同幾chok, 初時有D唔舒服.

喺山頂海拔795M Bob's Peak 嘅瞭望臺上, 就係欣賞皇后鎮, Lake Wakatipu同雄偉山峰群嘅好地方.

皇后鎮同Lake Wakatipu 真係好靚好平靜, 令人心曠神怡, 我地今晚住嘅酒店Novotel就喺湖邊.

跟住就搭高空吊車上山玩小雪橇(Luge).

小雪橇(Luge)從專用滑雪道滑下, 速度加減可以自己控制, 超好玩.

玩完Luge就去酒店Novotel check-in.

酒店位於湖邊, 面對Lake Wakatipu, 露台觀景開揚, 可以見到山頂嘅吊車站.

酒店位於市中心, 附近好熱鬧.

行幾分鐘就到古董蒸氣船碼頭, 非常方便.

我地今晚就喺碼頭傍嘅 Pier 19 食晚餐, 環境同氣氛都好正, 地產地食嘅紐西蘭菜式更加一流.

8點幾都未日落, 叫左兩杯飲品慢慢欣賞吓Lake Wakatipu嘅湖光山色, Ginger Beer(NZD4.50) & Lemon Lime Bitters(NZD4.00), 同樣清新醒神.

Breads Plate (NZD10.00) - 麵包新鮮香脆, 無論醮香草橄欖油或海鹽牛油都一樣咁好美.

Blueskin Bay Southern Clam Chowder(NZD16.00) - 粟米蓉作周打湯底都幾特別, 入口香滑甜, 蜆肉粒軟熟鮮味.

High country Merino duo of Lamb, seared fillet and confit of shoulder, manuka smoked potato, pea puree, mint and rosemary jus(NZD34.00) - 將紐西蘭羊肉用兩種烹調方法上碟, 烤羊柳皮脆肉嫩有肉汁, 24小時慢煮羊肩入口鬆化肉味濃郁，加上蜜燻薯蓉同豆蓉醬伴食, 各不同口感與風味, 滋味無窮.

Pan seared fish of the day, herb and lemon potato cake, sauteed zucchini, mussel and thyme sauce(NZD33.00) - 煎紐西蘭安康魚(Monkfish)外脆內軟, 香鮮好味道, 香草薯餅同樣香口, 青瓜勁爽脆多汁, 青口軟熟鮮味, 味道同層次感都非常豐富嘅主菜, 勁正斗.

食完行返洒店, 早D大覺瞓, 不過上床都11點喇, 聽日起身才是正式我地嘅紐西蘭南島行程.

瀏覽人數 :