12-Jan-10是日要為老婆慶祝生日, 已經揀過好多中西食店, 到最後都係揀食日本料理. 去左尖咀嘅旬菜富, 食嘅係季節懷石料理, 菜式每日都有D唔同, 視乎當日材料再由大廚決定. 之前喺度試過Lunch已經覺得好正. 今晚我地食嘅係Omakase, 每位七佰大元, 11款菜式都相當精釆, 服務態度好好, 日籍廚師仲會出黎同你打招呼, 非常大滿足嘅一餐.
地方唔算太大, 最多祗可容納二十位客人.
Open Kitchen - 廚房廚師與及食材都一目了然.
慶祝生日, 當然要飲杯熱Sake喇.
(先付)雪魚白子燒 - 通常白子都係蘸酸汁凍食, 燒嘅都係第一次, 甘香軟滑.
(前菜)炸公魚 - 原條連骨都可以食埋, 夠曬香酥脆.
(吸物)酒泊野菜湯 - 豐富素材, 啖啖酒香好好飲.
(剌身) - 名門鯛, 赤貝, 甜蝦, 魷魚, 青花, 立魚, 池魚, 油甘同Toro, 全部都超新鮮.
(燒物)大蔥鴨胸燒 - 香口好滋味.
(煮物)希靈魚野菜煮 - 筍同小芋一爽一淋, 昆布包住希靈魚, 煮得鬆化可口.
(揚物)蝦天婦羅 - 大蝦切段混合野菜同炸, 香脆唔油膩.
(酢物)日本生蠔 - 蠔味較淡, 但蠔身爽脆有海水味.
(食事)三文魚子海膽斧飯 - 熱食嘅三文魚子海膽飯都係首次, 奉上時刻意壓破魚子讓魚油流在飯上, 每口飯都鹹鮮甘香稠口, 天下無敵嘅人間美味.
(漬物)清清味蕾嘅漬物, 清新爽脆.
(甘物)芝麻雪糕 - 少少麻香又唔太甜.
27-Oct-07 今日返半日工, 心情大靚就想食日本Lunch, 唔想食壽司所以冇去見城同孝勢. 最後去左試尖咀棉登徑嘅"旬", "旬"做的是季節料理, 餐牌內嘅樣樣都想試,最终叫了$150的懷石午餐. 先黎一碗木魚湯烏東, 湯清烏東軟滑但有咬口, 跟著的便當內有五款刺身(好新鮮),炸日本蠔, 鴨胸(鮮嫩又入味)魚子(半鮮半醃制,仲成揪上), 燒日本銀雪魚(香滑),勁正! 燒日本沙丁魚,夠甘香肥美. 最後嘅雲呢拿雪糕, 有真正的雲呢拿粒子係入面,同埋仲有好特別的鹽味雪糕.
瀏覽人數 :
感謝 大力 提供以上資料
大力的網誌: http://www.daileghk.com/
