坊間嘅西班牙餐廳唔算好多, 以前食過集團經營嘅EL CID 感覺就一般. 最近尖咀有一間新開嘅Fandango, 9-Jan-10第一次幫襯時己經好滿意, 襯住今日又係星期六就去再試吓, lunch menu每星期轉一次, 有Tapas + Soup/Salad (2選1) + main course (3選1), 依家佢地仲加埋甜品, 每位收$128 不算便宜, 但出品一絲不苟, 材料靚份量足同高質素, 環境同氣氛都非常之好, 幫襯左5次都非常滿意, 開心滿足嘅一個 lunch.
門前兩個武士盔甲幾有氣勢.
環境非常好, 氣氛夠之餘仲好有西班牙特色, 9-Jan-10嗰日我地2個人仲包埋場. 27-Feb-10就有3枱客, 今日黎就已經有好多枱客, 即係越黎越多人知喇. 依家佢地 set lunch 仲加多左一道甜品, 更加豐富.
19-Jun-10 / 10-Jul-10 午餐
Crab Meat and Mushroom Croquette Salad蟹肉磨菇球沙律 - 入口有蟹肉磨菇加芝士嘅香味, 幾有特色嘅小食.
Marinated Salmon Salad 三文魚沙律 - 新鮮三文魚浸上欖油做嘅醬汁, 食落特別香鮮腍滑.
Gazpacho 西班牙凍湯 - 傳統地道嘅凍飲蕃茄雜菜湯, 清新醒神好味.
Seafood Paelle 西班牙海鮮飯 - 傳統招牌菜色, 1人份都好大鑊, 除左面頭嘅大蝦同蜆好味之外, 飯係用濃海鮮湯由生米煮到熟, 所以吸收晒海鮮精華, 再加入埋魷魚碎, 每口飯都香濃鮮美, 比海鮮湯飯更加精釆.
Grilled Tuna Fillet 烤吞那魚扒 - 好有燒烤風味, 皮香肉芯鮮嫩軟腍唔鞋口, 火喉恰到好處.
Grouper Caldereta Stew - 西班牙北部嘅傳統湯餸, 有D似法國普羅旺斯海鮮湯, 用左大量蔬菜同白酒煮成湯底再加上各樣海鮮, 今次嘅石斑先烤過所以皮香肉軟, 大蝦鮮爽甜同樣出色, 滋味無窮.
Catalonia Cream - 加泰農尼亞式暖食嘅甜品, 上面香脆焦糖, 下面嘅奶油忌廉香滑甜, 地道嘅特色甜品.
Caramel Custard with Marinated Strawberries - 焦糖蛋布甸香滑唔太甜, 奄製過嘅士多啤梨酸甜醒胃, 係一個好好嘅餐後甜品.
Chocolate Brownie with Ginger Orange Sauce - 朱古力布朗尼蛋糕味香甜唔太實, 配上薑橙汁更加開胃醒神.
27-Feb-10 午餐
Tapas - 同上次一樣好味, 尤其係D香草蒜蓉牛油磨菇, 好有食法國田螺嘅感覺.
Onion Soup洋蔥湯 - 比較普通, 尚算香口.
Roasted Pepper Salad烤甜椒沙律 - 好有地中海嘅特式, D鯷魚夠鹹香, 其實可以切碎撈埋落沙律到, 更一流.
Codfish with Black Rice烤銀雪魚墨魚墨汁飯 - 烤銀雪皮脆肉嫩又甘香, D飯加入墨魚同墨汁一齊煮, 每粒飯都鮮香味美, 勁好味.
Roasted Suckling Pig in Segovia Way烤乳豬 - 今次再食嘅係乳豬後腿, 依然肉質腍嫩多汁, 皮薄鹹香脆口超好味.
餐後咖啡都夠香濃, 好醒神.
9-Jan-10 午餐
Tapas-好味道嘅小食, 磨菇香, 芝士薯粒微辣味濃, 橄欖夠清新.
地中海沙律 - 材料清新夾豐富, 仲有吞那魚肉碎, 食完都已經飽左大半.
雞肉沙律 - 份量夠同好清新, 賣相已經攞滿分.
燒乳豬 - 乳豬皮薄鬆化唔肥膩, 肉嫩香軟多汁, 超級好味道.
海鮮湯飯 - 原煲席前奉上好有大菜Feel, 湯底鮮濃香口, 有大蝦大蜆同好多海鮮粒, 鮮甜濃香嘅海鮮味都滲入每粒飯埋, 超級無敵嘅好味.
飲埋杯香濃咖啡就夠曬 prefect la.
瀏覽人數 :
感謝 大力 提供以上資料
大力的網誌: http://www.daileghk.com/
