話說星期二早上，約了
Uncle L上公司簽文件，簽妥閒聊，
Uncle L就問，知唔知老闆喺邊，我便回說今天他老人家約了親人前往拜祭先人，
Uncle L聽罷，連忙與老闆通電，說稍後一同前往拜祭云云。
約早上十時半左右，
Uncle L 來電，說約了老闆在美孚飲茶，叫我一起前往，以下便是當時的通話內容：↓
Uncle L：「
喂，亞Kent，我約咗你老闆喺美孚飲茶噃，不如你都出埋嚟吖！」
本人：「
吓，佢今日拜山喎！」
Uncle L：「
唓，飲完茶先去拜啫，嗱，我而家去攞位，你到咗美孚打電話畀我啦！」
本人：「
．．．我都係唔嚟啦，啱啱先食完早餐，咁早邊食得落嘢呀！」
Uncle L：「
唓，橫掂都冇乜嘢做，嚟坐吓傾吓偈啦！」
本人：「
．．．唔係呀，我陣間要攞埋啲嘢出去畀會計師，如果出嚟飲茶，佢都唔知坐到幾時，你都知佢嗰個係糯米籮柚嚟架啦！」
Uncle L：「
得架啦，飲陣間茶我會叫走架啦！」
本人：「
．．．咁，去邊間呀？」
Uncle L：「
桃源呀，你到咗畀電話我啦！」
就係咁，我就攞齊啲文件，準備飲完茶就出去辦事。到咗美孚桃源，搵勻成間酒樓都唔見人，就連忙打電話畀
Uncle L。
本人：「
喂，我到咗咯喎，你哋喺邊張枱呀？」
Uncle L：「
我而家嚟緊，你打電話問你老細啦！」
本人：「
．．．（心諗，你又話嚟攞位先嘅！）」
連忙打電話問老細，電話接通。
本人：「
老細，你而家喺邊呀？」
老細：「
我而家喺美孚咯！」
本人：「
我到咗桃源咯喎，都唔見你哋嘅？」
老細：「
唔係啩，你有冇搵錯地方呀，喺大家樂隔離嗰間喎！」
本人：「
係呀，我而家咪喺嗰度囉，你喺邊張枱呀？」
老細：「
．．．乜嘢枱呀，我喺地下喎，你喺邊度呀？」
本人：「
我喺二樓咯，乜地下都係嘅咩？」
老細：「
你上去二樓托ｘ呀！」
本人：「
吓，Uncle L話約咗你喺度飲茶架嘛！」
老細：「
飲茶？佢都Short Short哋嘅，而家飲茶，咁幾時至去拜山呀，唔通等到黃昏至上山拜呀！」
本人：「
咁．．．咁我而家落返嚟啦！」
冇幾耐，
Uncle L打電話嚟（當時我坐喺架車度，見到佢一路走，個肥肚腩就一路盪來盪去）。
Uncle L：「
亞Kent，我就到啦，你哋喺幾多號枱呀？」
本人：「
我見到你啦，你唔使走啦，我而家喺老細架車度呀！」
Uncle L：「
吓，乜唔係去飲茶先咩？」
本人：「
唔知呀，你同我老細講嘞！」
結尾都唔駛點講，就係咁，嗰日焗住攞住啲文件入咗去和合石度，首先就拜佢個亞嫲，跟住就到佢老豆，然後就到佢老母，每拜完一個山墳，佢個細妹就畀返一封利是過我哋，到全部搞掂，都成下午四點幾鐘，五點零鐘就車到沙田食飯，食完飯重要返公司攞番啲嘢至走得，估唔到飲餐茶，竟然變咗拜山，重要一次過拜三座咁多。
============================================
感謝 甘蔗 提供以上資料
甘蔗的網誌: http://kentseky.blogspot.hk/
============================================
