今日決定玩嚴肅，寫d比較serious o既野。身為一個大學畢業生，有時應該識得對時事做一些反思‧不過我自己畢業後都好耐冇做’
尋晚睇左鮮魚會小學校長-既專訪。其實之前對於鮮魚會小學0既新聞都有留意。鮮魚會小學呢個名，一聽就知唔會係咩名校/貴族學校。面臨殺校威脅，曾經係教育署高層0既鮮校校長積極面對0既精神實在值得欣賞。
本來我對教改/殺校/基準試等問題並沒有太大反感。香港出身率下降，多餘0既學校被殺，係好自然; 老師冇料，以基準試去淘汰未夠資格者，都冇乜問題‧不過鮮校校長0既專訪令我識得企0係教育工作者0既角度去睇呢件事。殺校單以"小一收生23人"為標準實在死板且不近人情。點解23個就可以留，少一個22個就即刻死? 咁係咪好唔公平呢? 學校搶學生，將大量資源放係宣傳上，影響學校本身教學質素，對成間學校來講都冇好處。鮮校校長講得好0岩，一間學校幾百人，點可以俾小一果23人決定命運?
好欣賞鮮校校長對於老師-0既尊重。面對殺校威脅，校長寧願自己親自到幼稚園宣傳學校，也不想影響老師們教學。老師的專業是教書，要一個老師做推廣宣傳，實在很悲哀。似乎尊師重道0既精神0係香港已逐漸消失。讀中學時亦常常質疑一些老師0既知識同教學水平，經常同同學討論邊個老師唔識教書，邊個先生呃飯食。但當教育署都對老師專業資格有懷疑，而要用基準試去考核老師能力0既時候，學生同家長又點會唔質疑老師? 其實基準試考核0既好大程度係應試技巧，考得好，可以証明你考試叻，但証明唔到你識教書。對於基準試，鮮校校長妙用養魚作比喻: 「漁民0係魚棚養魚，魚被困魚棚內，一直相安無事。突然紅潮出現，魚死，人們不去檢討養魚0既方法，而去質疑漁民0既專業知識。漁民被迫進修考試，無時間照顧d魚，結果更多魚死。」
教改死板，未能從根本解決問題，卻為教育工作者帶來沉重壓力。咁點樣改革先知得呢?我真係唔識。香港學生"求學等於求分數" 0既功利意識太根深柢固，不容易解決。當整個社會都以考試成績去評定一個人0既存在價值，學校為求生存，惟有力谷學生應付考試，無暇兼顧甚麼"德、志、體、群、美" 0既教育理念; 學生為了應付考試，對於考試範圍以外0既知識，亦沒有想去學0既意識。就算想學，都冇時間去學。結果整個教育制度，以應付考試作主導，學生被訓練成應付考試0既機器。"讀得書"的，只可証明佢係一個識考試0既人，係一個對於考試範圍以內0既學術知識有透徹理解0既人，但未必係一個叻人，未必係一個有能力面社會/工作需要0既人。
0係澳洲旅行時同一d外國年輕人傾計，發覺佢地大多比香港教輕人有膽識，有自信，有主見，有獨立能力。佢地0既世界係整個地球，讀完書，可以去世界任何佢地想去0既地方工作/生活。但香港人0既世界只係香港或者中國，有幾多個香港學生會諗住畢業之後去香港or中國以外0既地方生活/工作? 我覺得好多香港年輕人都唔知自己想做d乜，唔知自己想過d咩生活。因為佢地0既世界其實好細，無意識到原來生活除左ordinary 番工放工食飯打機搭車訓覺之外，仲有好多其他選擇。就算知道有，有勇氣豁出去作另類選擇0既人都唔多。
香港人功利，係教育制度0既問題。香港教育制度唔得，係大氣候問題。殺校/基準試唔可以解決問題。點先可以解決問題，我都唔知。因為我只不果係其中一個視野狹窄而功利0既典型香港大學畢業生，只識解決試題，唔識解決問題。
============================================
感謝 lingwhatever 提供以上資料
lingwhatever的網誌: http://lingwhatever.blogspot.hk/
============================================
