![]()
|
|
晝上黑圈的是二邊通風排氣口
|
cos lettuce 有網友話香港叫羅馬生菜
呢間温室是我一個人建做的,當時互聯網並不普及,冇網上炒股,冇博友吹水,亦冇寬頻,只有64 K上網,速度如龜,每天下午放工回家後冇事可做,因我有些木工和電工的基本智識,走去圖書館揾資料後,咪自己一個人去買木,買透明 ACRYLIC 膠板,每天花一至二小時,由畫圖到水泥基座,木柱,二邊通風排風口,ACRYLIC 天窗,邊窗,二邊的木門,油漆,拉電線等,做咗大半年有多,依家都想唔明,當時體力為何會如此好?
個陣時小兒小女放學後,貪好玩有時幫我淋下水,有一年冬天特別凍,而又種咗好多節瓜,番茄,点知電費單來的時侯好傷,因冬天每天從晚上到早上都要開暖氣,光是這二個多月的電費換算就要花2000多港元,所以以後的冬天都冇再種嘢,夏天亦冇種嘢,因要開冷風機調節,否則果菜會焗瓜和高温熱死.
丟空冇種嘢後,都冇乜時間入去睇,可能小兒入去玩時忘記関門,有一日我聽到有小貓仔的咪咪叫聲,走去睇下,嘩見到內裡有隻貓乸向我怒目而視,極兇惡的想撲向我,嚇到我即刻走開,原來是有隻野貓走來生咗四隻貓仔,以為我入去捉佢地的貓仔,我一向都討厭野貓,用貓爪挖我的菜田,到處大小便,見到貓乸出外揾食時,我都冇捉走小貓,讓牠們住到自行離開,初生未開眼的動物一定要飲一口母乳,否則冇抗體,生存機會不大.幾年前見到木又霉, ACRYLIC膠又龜裂,咪將呢間温室拆掉.
============================================
感謝 wai 提供以上資料
wai的網誌: http://ngwai.blogspot.hk/
============================================
