今日係大年初二，大Ka ．Mia祝大家馬年快樂、
身體健康、心想事成，
大Ka ．Mia希望今年可以去多d旅行，再同大家分享!
第一日既行程係最遠最長，由峇里島南面到北面甘滯，
紅色條線就係行車路線，雖然整得唔係好靚，
但大家睇一睇峇里島既地圖就會有概念大Ka ．Mia去左邊度玩!
原本預定既行程:
由峇里機場－蠟染村－銀飾村－咖啡農莊－烏布皇宮－梯田－遠眺巴杜爾火山－入住 lovina 酒店，
但峇里既天氣太變幻莫測，行程都改左少少!
唔可以唔承認大Ka ．Mia去左兩個可以唔去既地方，
即係鴨仔團必去既購物點，行左白鴿轉睇下就會走，
一個係蠟染村另一個銀飾村，
其實兩個地方都係司機必定會推薦既去既地方，
因為大Ka ．Mi係呢兩個地方遇到好多不同國藉既遊客，
不過一場去到峇里都係要去見識下既!
所有圖案都係用呢支筆同碗蠟同埋工人既一雙巧手畫出黎!
工人既畫工真係唔錯，草稿都唔洗起，手起就就筆落，
呢隻好似神獸既野真係畫得好可愛，
大Ka都買左件t恤比朋友做生日禮物，
比工人畫圖案上去後比番少少tips工人就可以，
當完成左畫畫後打算比tips就走，
係呢度大Ka ．Mia又發生左一件好傻既事，
因為成手幾百萬印尼盾，
係香港或其他地方都好少用到甘大面值既鈔票，
大Ka ．Mia出現左運算問題，
比tips工人時就比左(唔記得2000/3000印尼盾)比工人，
工人就用好奇怪既眼神望住大Ka ．Mia，甘即係賺少了!
因為運算問題大Ka ．Mia以為1000印尼盾係等如港幣7-8蚊，
甘2000- 3000印尼盾都港幣2x元，仲想點wor，
旁邊個工作人員就叫大Ka ．Mia比多些約10000-20000印尼盾，
大Ka ．Mia就覺得工人都幾貪心，無再加錢比工人走左去就算 !
返到上車大Ka ．Mia都係度討論呢個問題，
點解個工人甘貪心嫁?真係當遊客係水魚咩?
但經過反覆既運算後先知原來10000印尼盾約港幣7-8蚊，
所以2000- 3000印尼盾即約港幣2-3蚊左右，
甘又真係少左少少，希望工人唔好對香港人有唔好既印象，
唔係大Ka ．Mia變態地比得少tips，
只係當時唔識得用印尼盾!
跟住大Ka ．Mia就去左銀飾村，
即一個大型銀飾生產工場同直銷場，
相都無影過一張，不過佢地既工作環境真係唔ok，
又熱又焗似火爐，銀飾既款都比較老土，
行左個圈落車到上車加埋都唔夠10分鐘!
再跟住大Ka ．Mia就去左咖啡農莊，
英文司機落車前叮囑大Ka ．Mia可以免費試飲，
亦可以唔買佢地既產品!
英文司機好怕大Ka ．Mia比人呃!之後仲有好多次提醒!
一開始有個姐姐帶住大Ka ．Mia參觀同講解，
個咖啡農莊除左種左超多植物之外，
仲養左好多奇怪動物，有吸血鬼代表--蝙蝠
起初以為係佢地係蒼鼠，原來小刺蝟!
仲有姐姐介紹時叫佢做製造咖啡既"機器"既麝香貓，
好出名既貓屎咖啡就係靠佢地製造出黎，
貓屎咖啡是由印尼椰子貓（一種麝香貓）的糞便作為原料所生產，
故叫「貓屎咖啡」。
麝香貓主要以咖啡豆為食，在椰子貓胃裡完成發酵後，
破壞蛋白質，產生短肽和更多的自由胺基酸，
咖啡的苦澀味會降低，再排出來的糞便便是主要原料，
由於咖啡豆不能被消化，
會被排泄出來，經過清洗、烘培後就成了貓屎咖啡。
P.S.資料來源維基百科
咖啡農莊不可少既咖啡，
又真係好多唔同既咖啡豆，
原來Mia最愛既玉桂未磨粉之前係樹皮，
真係唔知道，呢盆玉桂超香呀 !
呢款係姐姐話好勁辣既峇里辣椒，但個樣就似中藥多d!
大Ka ．Mia行完咖啡農莊一個圈之後就到左試飲咖啡/茶時間，
姐姐問要唔要試下貓屎咖啡，
但要收50000印尼盾，所以唔試了!
其實甘多杯野飲都飲唔晒，淨係飲晒鍾意飲果幾杯，
試完晒之後，大Ka最愛檸檬草茶，Mia最愛峇里咖啡(齋啡)
仲有Mia最愛炸香蕉加埋糖加玉桂粉為配咖啡既小食，
好味到無得彈!
大Ka ．Mia最後買左一包檸檬草茶同峇里咖啡，
下一站就係鳥布了!
大概坐左40分鐘左右到左烏布，
原來搞搞下就到左中午了，大Ka ．Mia要去醫肚了!
今餐係食dirty duck髒鴨，
Bebek Bengil Dirty Duck Diner髒鴨子餐廳，
在烏布Ubud區內非常有名，
好在大Ka ．Mia早左一步到，
當大Ka ．Mia點完菜之後眼見到既地方都坐滿左客人!
間餐廳好大，又一間間獨立屋既座位、水池仲有一大片草地，
大Ka ．Mia堅持要坐梳化位，
原本坐係地下果層，點知太暗影唔到相，
再加上超超超超多烏蠅，
野食都未到已經甘多烏蠅，
甘野食到左一對手係食野好定趕烏蠅好，
所以即使比個待應白眼都要換位，
最終上左2樓坐，太好了!
境觀開揚又少烏蠅!
不過天色已經開始轉暗同落雨!
落雨都唔理甘多了食左先算，
大Ka ．Mia點左最出名既The Original Crispy Duck，
不過覺得佢似乳鴿多d因為好細隻，
隻鴨好瘦一d都唔肥，唔會食到成口油，
而且連骨都好脆，都幾入味!有好香既牛油味!
大Ka ．Mia仲點多個沙律Ginger rogers食下，
沙律有雞肉、菠蘿、腰果，
個沙律既味道唔係一般沙律既味道，都唔知點形容，
總之係幾有特色!
沙律就跟埋呢個pita bread，
老實講個餅真係唔好食好乾好硬!
一張可能引起大家不安既相，
因為大Ka ．Mia已經通左一晚頂，
加上全素顏，希望唔會嚇親大家!
呢餐好貴呀!服務費同稅要加16%，
要成30幾萬印尼盾!
因為開始落大雨，
原本plan左要去既梯田同烏布皇宮都取消左，
去左烏布傳統市場行下，有瓦遮頭，
英文司機既溫馨提示又黎了，
佢話一定要講價，仲要係一半價錢以上，
其實每間店賣既野都千篇一律，
隨意選一間都可以，行左半個鐘左右，
大Ka ．Mia每人都買左一條勁有民俗特色既褲，
梗係有講價了，仲講到3折左右!
總算無比人呃掛!
再繼續行程大Ka ．Mia到左一個幾開揚的地方，
遠眺巴杜爾火山，
好在到既時候已經開始細雨，
影影下相仲停埋雨，
因為有霧既關係令個火山多左一份仙氣!
其實大Ka ．Mia企緊個位跟本就係山崖邊!!
深呼吸一下!
再講一次大Ka ．Mia已經通左一晚頂，
仲識得笑已經好好!
睇完火山之後時候已經唔早，
要開車去lovina既酒店!
去到酒店已經晚上7點幾了，
酒店即送上welcome drink!
係飲緊杯果汁時望上牆上有成20條壁虎，
多到嚇死人!
大Ka ．Mia今次訂既係獨立小屋房，
以竹既家具為主!
雖然間房有少少簡陋，但都算乾淨!
其實大Ka ．Mia去到lovina甘遠為既就係睇海豚，
已經晚上8點了，但大Ka ．Mia仲未訂Local tour，
問左酒店既local tour要15萬一位，
甘大Ka ．Mia就問黃先生貴唔貴，
黃先生即話太貴了!
黃先生既貼心服務又黎了!
黃先生立刻幫大Ka ．Mia找船，10萬一位，
同埋已聯絡好英文司機明早接大Ka ．Mia去沙灘出海!
由於明天約左司機5點半，
大Ka ．Mia 都唔想周圍行，
係酒店餐廳解決算了!
大Ka ．Mia點左pizza同一個印尼飯食再加兩杯果汁!
味道都唔錯!食飽就返去小屋訓覺了!
明天超早起!
待續......
============================================
感謝 ka_mia 提供以上資料
ka_mia的網誌: http://kaandmia.blogspot.hk/
============================================
